a9.2-7:2 Pet 1.17-18
b9.7:Mt 3.17; Mk 1.11; Lk 3.22
c9.11:Mal 4.5; Mt 11.14
d9.34:Lk 22.24
e9.35:Mt 20.26-27, 23.11; Mk 10.43-44; Lk 22.26
f9.37:Mt 10.40; Lk 10.16; Jn 13.20
g9.40:Mt 12.30; Lk 11.23
h9.41:Mt 10.42
i9.43:Mt 5.30
j9.47:Mt 5.29
k9.48:Is 66.24
l9.50:Mt 5.13; Lk 14.34-35

Mark 9

Jesus ga helekai, “Au e hagi adu gi goodou bolo hunu gau i ginei la hagalee mmade, ga dae loo gi di nadau gidee Tenua o God e dau mai mo ono mogobuna.”

Jesus gu madamada

(Matthew 17.1-13; Luke 9.28-36)

I muli nia laangi e ono, Jesus ga lahi a Peter, James mo John gi hongo di gonduu duuduu i nua mada ginaadou. Gei mee gu dina gee i mua digaula. a  Dono gahu gu madamada, gu kene hila mmaa, deai tangada i henuailala e mee di haga mmaa ono gahu beelaa ai. Nia dama agoago dogodolu aalaa ga mmada gi Elijah mo Moses e leelee ginaadou mo Jesus. Peter ga helekai gi Jesus, “Meenei, koia e humalia go tadau noho i ginei. Gimaadou ga haga duu aga madau damaa hale e dolu, e dahi ni oou, ge e dahi ni Moses, ge e dahi ni Elijah.” Mee gu de iloo ia di helekai, idimaa Peter mo ono ehoo e uli nadau gai. Gei di gololangi ga dehee mai, ga haga malu digaula, gei di lee ga lee eia i lodo di gololangi, “Deenei dagu Dama dela e aloho iei au, goodou hagalongo gi mee.” b  Digaula ga mmada adu hua, go Jesus hua modogoia i nadau baahi. I di nadau lloo ia i di gonduu, gei Jesus ga bule digaula, “Hudee hagi anga ina godou mee ala ne gidee gi tei dangada, ga dae loo gi Tama a Tangada ma ga mouli aga i di made.” 10 Digaula gu daudali ana helekai, gei digaula ga daamada ga heheeu i nadau mehanga tadinga telekai, “di mouli aga i di made”, le e hai bolo aha? 11 Digaula ga heeu gi Jesus, “Digau haga dondonu haganoho le e aha ala e helekai bolo Elijah le e hai loo gi hanimoi matagidagi?” c  12 Gei Jesus ga helekai, “E donu, Elijah le e hanimoi i mua, e hagatogomaalia nia mee huogodoo. Di Beebaa Dabu le e aha dela e helekai boloo, Tama a Tangada le e hagaduadua kono, ge haga balumee? 13 Au e hagi adu gi goodou bolo Elijah la gu hanimoi, gei nia daangada ne hai anga go nadau mee ala e hiihai ginai, be nnelekai ala gu hihi gi lodo di Beebaa Dabu.”

Jesus e hagabagi di hagataalunga huaidu tama daane

(Matthew 17.14-21; Luke 9.37-43a)

14 Di nadau dau adu hua gi ana dama agoago ala i golo, ginaadou ga mmada gi digau dogologo gu hii digaula gi lodo, mo digau haga dondonu haganoho e lagalagamaaloo gi digaula. 15 Di madagoaa o nia daangada ne gidee a Jesus, gei ginaadou gu homouli huoloo, ga llele adu ga hagaaloho gi mee. 16 Jesus ga heeu gi ana dama agoago, “Ma di aha dela e lagalagamaaloo ai goodou gi digaula?” 17 Taane i tagabuli deelaa ga helekai, “Tangada Agoago, au gu laha mai dagu dama daane gi di goe, i di hagataalunga huaidu la gu i ono lodo, mee e deemee di leelee. 18 Di madagoaa di hagataalunga huaidu ma ga ulu gi mee, geia gu hinga hua gi lala, gu puu biabi dono ngudu, ge e kadi ono niha, gei dono huaidina gu dumaaloo. Gei au ne wanga a mee gi au dama agoago, gi haga bagia di hagataalunga huaidu, gei digaula e deemee.” 19 Jesus ga helekai, “Goodou digau de hagadonu huoloo! E waalooloo behee au e hai gi noho i godou baahi? Ge waalooloo behee dogu hagakono ogu lodo i goodou? Laha mai tama daane!” 20 Digaula ga laha mai a mee gi Jesus. Di madagoaa hua di hagataalunga huaidu ne gidee ia a Jesus, ga hai tama daane deelaa gi bolebole, ga hinga gi lala, ga gaehagaeha i hongo di gelegele, ga puu biabi dono ngudu. 21 Jesus ga heeu gi tamana di tama, “Gu waalooloo behee dono hai beenei?”

Gei tamana ga helekai, “Mai hua i tama.
22 Nia holongo e logo, gei di hagataalunga huaidu belee daaligi a mee gi made, i dana huduhudu a mee gi lodo di ahi, mo lodo nia monowai. Goe laa aloho mai, hagamaamaa ina mai gimaaua, maa goe e mee!” 23 Jesus ga helekai, “Uaa, maa goe e mee di hagadonu. Nia mee huogodoo le e mee i baahi digau ala nadau hagadonu i golo.” 24 Di madagoaa hua deelaa, tamana o tamagiigi daane la ga wolo gi nua, “Au e hagadonu, gei au e dee dohu loo. Hagamaamaa ina au i dogu hagadonu gi maaloo!” 25 Jesus ga mmada gi tagabuulinga daangada deelaa, dela gu honodia hua gu hii ginaadou gi lodo, geia ga hai dana hagamodu gi di hagataalunga huaidu deelaa, “Goe go di hagataalunga longoduli ge hagalee leelee, au e helekai adu gi ulu mai gi daha mo tamagiigi daane deenei, hudee ulu labelaa gi lodo o mee.” 26 Gei di hagataalunga deelaa ga dangi, ga haga hinga tama daane gi hongo nia gelegele, ga ulu mai gi daha, gei tama daane la gu hai be tangada gu made, gei hunu gau gu helekai bolo mee gu made. 27 Gei Jesus ga kumi di lima o maa, ga hagamaamaa aga a mee gi duu gi nua. 28 Jesus mo ana dama agoago mada ginaadou ne ulu gi lodo di hale, digaula ga heeu gi mee, “Gimaadou e aha ala ne deemee di hagabagi di hagataalunga huaidu deelaa?” 29 Gei Jesus ga helekai, “Tagadilinga deenei le e hai hua gi talodalo, deai di mee labelaa i golo ai.”

Jesus e helekai labelaa i dono made

(Matthew 17.22,23; Luke 9.43b-45)

30 Jesus mo ana dama agoago ga hagatanga, ga hula laa lodo o Galilee. Jesus hagalee hiihai nia daangada gi iloo di gowaa dela ieia. 31 Idimaa, mee e aago ana dama agoago boloo, “Tama Tangada la ga wanga gi digau ala belee daaligi a mee gi made. Nia laangi e dolu nomuli, gei mee ga mouli aga.” 32 Malaa, digaula digi donu gi di agoago deenei, digaula hogi e mmaadagu di heeu gi mee.

Ma koai dela e kaedahi e aamua?

(Matthew 18.1-5; Luke 9.46-48)

33 Di nadau dau i Capernaum, ga ulu gi lodo di hale, gei Jesus ga heeu gi ana dama agoago, “Ma di aha dela nogo lagamaaloo ai goodou i tadau lloomoi i hongo di ala?” 34 Gei digaula digi leelee, idimaa, digaula nogo lagamaaloo i nadau mehanga be di ma koai dela koia e aamua. d  35 Jesus ga noho gi lala, ga gahi mai ana dama agoago dilongoholu maa lua, ga helekai, “Tangada i goodou e hiihai gi mugi mua, geia gi mugi muli loo gi hege gi digau huogodoo.” e  36 Gei mee ga gahi mai dana damagiigi, ga haga duu i nadau mua, ga bulubulu mai a mee gi ono lima, ga helekai, 37 “Be koai hua dela e benebene tamagiigi beenei i dogu ingoo, ia ne benebene hua au, gei tangada dela ne benebene au, ia ne benebene au mo mee dela ne hagau mai au.” f 

Tangada dela hagalee hai baahi mai gi gidaadou la di hoo ni gidaadou

(Luke 9.49,50)

38 John ga helekai gi mee, “Tangada Agoago, gimaadou gu mmada gi tangada e hagabagi ana hagataalunga huaidu i doo ingoo, gei gimaadou gu bule gi mee bolo gi hudee heia, idimaa, mee hagalee tangada i tadau hagabuulinga. 39 Jesus ga helekai, “Hudee buleina a mee, idimaa, ma deai tangada e hai ana mee haga goboina i dogu ingoo, ga nomuli ga helekai huaidu i di au ai. 40 Be koai hua dela hagalee hai baahi mai gi gidaadou, la di hoo ni gidaadou. g  41 Be koai hua dela ma ga gowadu dana ibu wai gi inumia go goodou, idimaa, goodou digau ni aagu, ia e hai loo gi kumi dono hui. h 

Di hagamada gi di huaidu

(Matthew 18.6-9; Luke 17.1,2)

42 Tangada dela ma ga hai dana mee gi tamagiigi beenei, ga hidi iei mee, ga hudu gi daha dono hagadonu, tangada deenei le e humalia e nnoo dono ua ginai di hadu mmili palaawaa damanaiee, e hudu gi lodo di moana. 43 Maa doo lima e hai goe gi bagege doo hagadonu, la duudia gi daha, ma koia e humalia ma ga ulu i di mouli mo doo lima e dahi, i doo hana mo oo lima e lua gi lodo di gowaa hagaduadua, di ahi e deemee di made. i  44 [Nia ila ala e gai digaula, e deemee di mmade, gei di ahi dela e dudu digaula, e deemee di made.] 45 Maa doo wae dela e hai goe gi bagege doo hagadonu, la duudia gi daha, idimaa, e koia e humalia ma ga ulu i di mouli mo doo wae e dahi, i doo hana mo oo wae e lua gi lodo di gowaa hagaduadua. 46 [Nia ila ala e gai digaula, e deemee di mmade, gei di ahi dela e dudu digaula, e deemee di made.] 47 Maa doo golomada e hai goe gi bagege doo hagadonu, kabe ina gi daha. Ma koia e humalia ma ga ulu i Tenua o God mo doo golomada e dahi, i di goe dela ga hudu gi lodo di gowaa hagaduadua mo oo golomada e lua. j  48 Nia ila ala e gai digaula, e deemee di mmade, gei di ahi dela e dudu digaula, e deemee di made. k  49 Nia daangada le e haga madammaa gi di ahi, gadoo be tigidaumaha dela e haga madammaa gi nia toolo. 50 Nia toolo la nia mee humalia, gei dolomaa nia toolo aalaa la ga ono mmala ai, dehee tadau hai e mee di hai nia maa gi mmala labelaa? l 

Godou mouli gi humalia be nia toolo, goodou gi hagadaubuni mo di noho i di aumaalia.

Copyright information for `KPG