a16.1:Mt 12.38; Lk 11.16
b16.4:Mt 12.39; Lk 11.29
c16.6:Lk 12.1
d16.9:Mt 14.17-21
e16.10:Mt 15.34-38
f16.14:Mt 14.1-2; Mk 6.14-15; Lk 9.7-8
g16.16:Jn 6.68-69
h16.19:Mt 18.18; Jn 20.23
i16.24:Mt 10.38; Lk 14.27
j16.25:Mt 10.39; Lk 17.33; Jn 12.25
k16.27:Mt 25.31; Ps 62.12; Rom 2.6

Matthew 16

Tangi anga i dahi mogobuna

(Mark 8.11-13; Luke 12.54-56)

Nia Pharisee mono Sadduccee ne lloomoi gi Jesus belee hai a mee gi hala. Ne helekai gi mee gi heia dana mogobuna gi gidee ginaadou bolo God le e madalia ia. a  Jesus ga helekai gi digaula, “Di madagoaa di laa ga ulu, gei goodou e hai boloo: Daiaa le e humalia, idimaa, di langi le e mmee. Gei luada loo goodou e hai boloo: Dangi nei la ga uaua, idimaa, di langi le e mmee gei e haga bouli. Malaa, goodou e mee di modongoohia di mmada gi di gili o di langi, gei e deemee di modongoohia nia haga modongoohia o nia laangi aanei! Digau dolomeenei la gu huaidu huoloo, gei gu hagalee manawa dahi! Goodou e tangi mai gi di au i di mogobuna? Deeai, dela hua go di mogobuna ne hai gi Jonah ga hai adu gi goodou.” b 

Gei mee gu diiagi digaula gu hana.

Nia ‘yeast’ o nia Pharisee mono Sadduccee

(Mark 8.14-21)

Nia dama agoago a Jesus gu dau adu gi di baahi i golo o di tai, ga langahia bolo ginaadou digi kae nadau palaawaa. Jesus ga helekai gi digaula, “Gi pula i goodou nia ‘yeast’ o nia Pharisee mono Sadduccee.” c  Digaula ga daamada ga helehelekai i nadau mehanga, “Mee e helekai beenei, idimaa, gidaadou digi gaamai tadau palaawaa.” Jesus gu iloo ia hua nia helekai digaula, ga helekai, “Goodou e aha ala e helehelekai bolo ma nia palaawaa ai? Godou hagadonu le e lligi! Goodou digi maalama? Goodou hagalee langahia nia palaawaa e lima ala ne ginigini ga duwwe gi nia daane e lima mana(5,000)? Nia gada e hia ala ne haa go goodou? d  10 Gei nia palaawaa e hidu ang gi nia daane e haa mana(4,000), nia gada e hia ne haa go goodou? e  11 Goodou e aha ala hagalee modongoohia bolo au hagalee e helehelekai adu gi goodou i nia palaawaa? Duulia goodou gi daha mo nia ‘yeast’ o nia Pharisee mo nia Sadduccee!” 12 Ana dama agoago la gu modongoohia bolo ma hagalee go nia ‘yeast’ ala i lodo di palaawaa e haga ligaliga iei ginaadou, ma go nia agoago o nia Pharisee mo nia Sadduccee.

Peter e haga modongoohia aga di hai o Jesus

(Mark 8.27-30; Luke 9.18-21)

13 Jesus ne hana gi di gowaa hoohoo gi di waahale Sisaria Pilipai, geia ga heeu gi ana dama agoago boloo, “Nia daangada le e helehelekai bolo Tama Tangada le koai?” 14 Digaula ga helekai, “Hunu daangada e hai bolo goe go John Babdais, Elijah, Jeremiah, be tei dangada i nia soukohp.” f  15 Gei mee ga heeu gi digaula, “Goodou e hai bolo au koai?” 16 Simon Peter ga helekai, “Goe go di Mesaia, go Tama di God Mouli!” g  17 Jesus ga helekai gi mee, “Gu humalia adu gi di goe, Simon, tama a John. Ma hagalee tangada dangada ne haga modongoohia adu gi di goe di tonu o di mee deenei, gei go dogu Damana dela i di langi. 18 Malaa, au e hagi adu gi di goe Peter: goe go di hadugalaa, gei au ga haga duu dogu nohongo dabu i hongo di hagamau o di hadugalaa deenei, gei di made e deemee di hagahuaidu di maa. 19 Au ga gowadu nia gii Tenua o God di Langi. Nia mee huogodoo ala ma ga tai kooe i henuailala, e tai labelaa i di langi. Au mee ala ga huge i henuailala, e huge labelaa i di langi.” h  20 Jesus ga helekai gi ana dama agoago bolo digaula gi hudee hagi anga ina bolo ia go di Mesaia.

Jesus e haga modongoohia aga dono hagaduadua mo dono made

(Mark 8.31—9.1; Luke 9.22-27)

21 Daamada i di madagoaa deenei, Jesus ga helekai hagammaa ang gi ana dama agoago, “Au e hai loo gi hana gi Jerusalem e kae dogu hagaduadua damanaiee mai baahi nia dagi mmaadua, mo nia dagi hai mee dabu, mo nia gau hagadondonu haganoho. Au ga daaligi ga made, gei i muli nia laangi e dolu gei au ga mouli aga. 22 Peter ga lahi Jesus gi mada ginaua, ga hai ono ngudu gi mee, “Meenei, dogu Dagi, God gi bule ina di mee deenei gi dee tale adu gi di goe!” 23 Jesus ga huli gi daha mo Peter ga helekai, “Satan, hana gi daha mo au! Goe haga deaadee au, idimaa, au maanadu la nia maanadu hua dangada, hagalee nia maanadu mai baahi o God.” 24 Jesus ga helekai gi ana dama agoago, “Maa dahi dangada bolo ia e daudali mai au, geia gi wanga dehuia dono huaidina, aamo ina dono loobuu, daudalia mai au.” i  25 Idimaa, tangada dela e hiihai bolo ia e benebene dono mouli, geia e deemee di gidee ia, gei tangada dela ga wanga dehuia dono mouli i di au, geia ga gidee ia. j  26 Dehee tahidamee o tangada maa ia ga hai mee gi nia goloo o henuailala huogodoo, geia e de gidee dono mouli? Hagalee hai beenei, di mee e wanga go tangada gi gila mai dono mouli ai. 27 Tama Tangada ga hoohoo dono hanimoi mo nia madamada o dono Damana, ana gau di langi e madalia. Geia ga hui tangada nei mo tangada nei i di hai o nadau hegau. k  28 Au e hagi adu gi goodou di tonu bolo hunu gau i ginei ga hagalee mmade, ga dae loo gi nadau gidee gi Tama Tangada dela ga hanimoi gadoo be dahi king.”

Copyright information for `KPG