a2.6:Mic 5.2
b2.15:Hos 11.1
c2.18:Senesis 35:16-19; Jer 31.15
d2.23:Mk 1.24; Lk 2.39; Jn 1.45

Matthew 2

Digau kabemee ia i bahi i-dua

Jesus ne haanau i lodo di waahale Bethlehem i Judea, i di madagoaa di king Herod. Hunu daane halahala hagailongo mee gi nia heduu, ne dau i Jerusalem, ne lloo ia i bahi i-dua, ga heheeu, “Dehee di tama dela ne haanau belee hai di king digau o Jew? Gimaadou gu gidee di heduu o Maa dela ne gila aga i bahi i-dua, gimaadou ga lloo ia belee daumaha ang gi Mee.” Di madagoaa di king Herod ne longono di mee deenei, geia mo digau Jerusalem huogodoo gu lodo huaidu huoloo. Mee ga gahi mai nia dagi hai mee dabu mono gau haga dondonu haganoho huogodoo, ga heeu gi digaula, “Di Mesaia la bolo e haanau i hee?” Digaula ga helekai, “I lodo di waahale Bethlehem i Judea, gi hai be nnelekai gu lawa di hihi mai baahi soukohp:

Bethlehem, goe dela i lodo Judea. Hudee hai bolo goe e koia e dulii i nia waahale aamua i Judea, idimaa, Tagi dela e dagi agu daangada Israel, le e gila aga i doo baahi. a 
Herod ga haga dagabuli mai hagammuni digau ala ne lloo ia i bahi i-dua, ga heeu gi digaula di madagoaa ne gila aga di heduu deelaa, ga hagau digaula gi Bethlehem, ga boloagi gi digaula, “Goodou hula halahala ina hagahumalia di tama dulii deelaa. Goodou gu gidee, haga iloo ina mai, au e hanadu labelaa e daumaha gi Mee.” Muli hua di nadau hagalongo gi nnelekai aanei, digaula ga hula, ga mmada gi di heduu la hua dela ne mmada ginai ginaadou i bahi i-dua, e hana i nadau mua e dagi digaula, ga hana loo, ga haga huudonu ia i hongo di gowaa dela e noho ai tama dulii deelaa. 10 Digaula gu tentene huoloo i di gidee labelaa di heduu deelaa. 11 Digaula ga ulu adu gi lodo di hale, ga gidee tama dulii mo dono dinana go Mary, gei digaula ga dogoduli ga daumaha ang gi Mee, ga dahi aga nadau goloo hagalabagau aanei: nia goolo, nia “frankincense” mono ‘myrrh’, ga dugu adu gi Mee. 12 God gu helekai gi digaula i lodo di moe, bolo gi hudee hula labelaa gi Herod, gei digaula ga hula gi di nadau henua i tuai ala.

Di hula hagammuni gi Egypt

xxx
13 I muli digaula ne hula, tangada di langi o Tagi ne haga gida gi Joseph i lodo di midi, ga helekai, “Herod e halahala di tama deenaa belee daaligi gi made. Nnoinua, lahia di tama deenaa mo dono dinana, hula hagammuni gi Egypt, noho i golo ga dae loo gi di madagoaa au ga helekai bolo gi hagatanga.” 14 Joseph ga duu i-nua, ga lahi di tama mo dono dinana ga hagatanga i di boo deelaa, ga hula gi Egypt, 15 ga noho i golo, ga dae loo gi di made o Herod. Di mee deenei ne hai bolo gi kila ai nia helekai a God mai i baahi soukohp, boloo, “Au ne gahi dagu dama daane gi daha mo Egypt.” b 

Taaligi dama

16 Herod gu modongoohia bolo digaula gu halahalau ia, gu hagawelewele huoloo, ga hai bolo nia dama daane huogodoo i Bethlehem mono guongo ala i no daha la gi daaligidia gi mmade, nia dama daane huogodoo ala gu dagi lua nadau ngadau ga huli gi lala. Mee ne hai di mee deenei i dana iloo di madagoaa ne gila ai di heduu mai digau hagailongo mee gi nia heduu. 17 Di mee deenei ne hai gu gila be di haga modongoohia soukohp Jeremiah, dela ne hihi boloo:

18 Dahi lee e hanimoi i Ramah, di lee dangidangihia. Rachel e dangidangi i ana dama, gei gu deemee di manawa lamalia, i digaula gu odi di mmade. c 

Di lloomoi i Egypt

19 Muli di made o Herod, tangada di langi o Tagi ga hanimoi gi Joseph nogo kii, 20 ga helekai gi mee, “Nnoinua, lahia di tama mo dono dinana, hula gi Israel, idimaa, digau ala ne belee daaligi di tama deenaa, la gu mmade.” 21 Joseph ga duu i-nua, ga lahi Tama mo tinana o maa, ga hula gi muli gi Israel. 22 Gei Joseph ga longono ia bolo Archelaus gu hai di king o Judea i muli dono damana go Herod, geia gu lliga huoloo di hana gi golo. Dimaadua ga haga modongoohia gi mee i lodo di moe, gei mee ga hana gi Galilee, 23 ga noho i lodo tama waahale go Nazareth. Malaa, nia helekai soukohp la gu kila boloo, “Mee e haga ingoo bolo tangada o Nazareth.” d 

Copyright information for `KPG