a21.5:Zech 9.9
b21.9:Ps 118.25, 26
c21.13:Is 56.7; Jer 7.11
d21.16:Ps 8.2
e21.21:Mt 17.20; 1 Cor 13.2
f21.32:Lk 3.12, 7.29-30
g21.33:Is 5.1-2
h21.42:Ps 118.22-23

Matthew 21

Jesus e ulu i Jerusalem i dono aali

(Mark 11.1-11; Luke 19.28-40; John 12.12-19)

Di madagoaa Jesus mo ana dama agoago ne hoohoo adu gi Jerusalem, digaula ga dau i Bethphage i di Gonduu Olib. Jesus ga hagau ana dama agoago dogolua gi hula i mua, ga helekai gi meemaa, “Hula gi lodo tama waahale dela i gulu mua. Goolua ga gidee di manu-‘donkey’ e lawalawa mo dana damaa-‘donkey’ i dono baahi. Wwede ina, laha mai gi di au. Maa tangada ga heeu adu, goolua helekai gi mee boloo, Tagi e hiihai e hai hegau ai, gei mee ga limalima ga dumaalia adu nia maa.” Nia mee aanei ne hai bolo gi kila ai nia helekai soukohp ala ne hai boloo,

Haga iloo ang gi di waahale Zion boloo: Mmada: di godou king e hanadu gi goodou! Mee e manawa hila gi lala ge e hanimoi i hongo di ‘donkey’-ahina, mo tamaa-‘donkey’. a 
Nia dama agoago dogolua ga hula ga hai gi hai be nia helekai Jesus ne hai ang gi ginaua. Meemaa ga laha mai di ‘donkey’ mo dana dama, ga wanga nau gahu gi hongo nia maa, gei Jesus ga gaga gi hongo tama-‘donkey’. Digau dogologowaahee gu holo nadau gahu laa hongo di ala. Hunu gau ne hele mai nadau manga laagau ga holo labelaa laa hongo di ala. Digau dogologo ala e taaele i mua o Jesus mo digau ala e lloomoi i muli e dadaahili hagaamu, boloo,

“Hagaamuina Tama a David! God gi hagahumalia ina a mee dela e hanimoi i di ingoo o Dimaadua. Hagaamuina God!” b 
10 Di madagoaa Jesus ne ulu gi Jerusalem, digau o di waahale hagatau ga hagalongoaa, ga heheeu, “Taane koai deenei?” 11 Digau dogologowaahee ga helekai, “Soukohp Jesus deenei, mai Nazareth i Galilee.”

Jesus e ulu gi lodo di Hale Daumaha

(Mark 11.15-19; Luke 19.45-48; John 2.13-22)

12 Jesus ne ulu gi lodo di Hale Daumaha, ga hagabagi nia daangada huogodoo huihui mee, mono daangada e huihui gi daha nadau goloo. Mee ga hulihuli gi lala nia deebele digau waahei bahihadu mo nia lohongo digau huihui mwuroi. 13 Mee ga helekai gi digaula boloo, “Ma gu hihi i lodo di Beebaa Dabu boloo: Dogu Hale Daumaha e haga ingoo bolo di hale hai dalodalo, gei goodou gu hai di maa be di hale ni digau gaiaa!” c  14 Digau deegida mono gau mmade nadau dudaginga ga lloomoi gi Jesus i lodo di Hale Daumaha, gei mee ga hagahili nia magi digaula. 15 Nia dagi hai mee dabu mono gau hagadondonu haganoho gu hagawelewele i di nadau gidee ana hegau humalia ne hai, mo di nadau gidee nia damagiigi ala e wwolowwolo i lodo di Hale Daumaha boloo, “Hagaamuina Tama a David!” 16 Digaula ga heeu gi Jesus, “Goe e longono nia mee digaula ala e helekai ai?”

Jesus ga helekai, “Uaa, au e longono. Goodou digi daulia i lodo di Beebaa Dabu dela e hai boloo:

Goe gu lawa di kae doo hagaamu mai i nia ngudu o nia damagiigi, mo mai i nia ngudu o nia dama haga uu.” d 
17 Jesus ga hagatanga i baahi digaula ga hana gi daha mo di waahale damana deelaa, ga hana gi Bethany, di gowaa e hagamolooloo iei mee i di boo deelaa.

Jesus e hagahalaua di laagau-‘fig’

(Mark 11.12-14,20-24)

18 Hagaluada loo dono daiaa, Jesus ga hana labelaa gi di waahale damana deelaa, gei mee gu hiigai. 19 Geia ga gidee ia di laagau-‘fig’ i taalinga di ala, ga hanadu ginai be di maa ono hua, gei digi gida dana mee, ma nia lau huogodoo. Gei mee ga helekai gi di laagau deelaa, “Goe hudee hua labelaa!” Di madagoaa hua deelaa, gei di laagau la gu mae. 20 Ana dama agoago ne gidee di mee deenei, gei gu goboina huoloo, ga heheeu, “Di laagau-‘fig’ la ne hai behee dela gu limalima dono mae!” 21 Jesus ga helekai gi digaula, “Au e hagi adu gi goodou di tonu bolo maa goodou ga hagadonu, hagalee manawa lua, goodou ga mee di hai be dagu mee dela ne hai gi di laagau deelaa. Gei hagalee deenei hua, goodou e mee di helekai gi di gonduu deenei boloo: Menege gi daha, hudua goe gi lodo tai, gei di maa e hai. e  22 Maa goodou ga hagadonu, gei goodou ga hai mee gi nia mee huogodoo ala e tangi ai i lodo talodalo.”

Di heeu nia donu o Jesus i ana mogobuna

(Mark 11.27-33; Luke 20.1-8)

23 Jesus ne hanimoi labelaa gi lodo di Hale Daumaha, ga agoago. Nia dagi hai mee dabu mo nia dagi mmaadua ga lloomoi gi mee, ga heeu, “Di tonu mai i hee dela e haihai au mee aanei? Di mogobuna ni aai ne gowadu gi di goe?” 24 Jesus ga helekai gi digaula, “Au dagu heeu e dahi. Maa goodou ga helekai gi dagu heeu, gei au ga hagi adu gi goodou di mogobuna dela e hai hegau iei au. 25 John Babdais ne gaamai i hee ono mogobuna e babdais ana daangada: mai baahi o God, be mai baahi o tangada?”

Digaula ga daamada ga lagalagamaaloo i nadau mehanga, ga hai boloo, “Maa gidaadou ga helekai boloo: Mai baahi o God, gei mee ga helekai boloo: Goodou la e-aha ala digi hagadonu ina a John?
26 Maa gidaadou ga helekai boloo, Mai baahi o tangada, gidaadou e mmaadagu i nia daangada gi dee hai hua nadau hai, idimaa, digaula e iloo bolo John la soukohp.” 27 Digaula ga helekai gi Jesus, “Gimaadou e de iloo.”

Jesus ga helekai gi digaula, “Malaa, au hagalee hagi adu di mogobuna ni aai dela e hai hegau iei au nia mee aanei.

Di ala kai o nia dama daane dogolua

28 Jesus ga helekai, “Goodou e hagamaanadu bolo aha? Tamana ana dama daane dogolua. Tamana ga helekai gi tama daane madua, Dagu dama, hana ngalua i lodo di hadagee waini dangi nei. 29 Tama daane ga helekai boloo, Au hagalee hiihai e hana. Gei nomuli mee ga huli dana maanadu, ga hana. 30 Nomuli, gei tamana ga hana gi tama dulii, ga helekai gi mee go telekai la hua. Tama dulii ga helekai boloo, Uaa meenei, au ga hana. Gei mee digi hana. 31 Malaa, koai i nia dama daane dogolua aanei dela ne haga gila di hiihai o di nau damana?”

Digaula ga helekai, “Go tama daane madua.”

Jesus ga helekai, “Au e hagi adu gi goodou di tonu bolo digau hagabudu dagitedi mono ahina e huihui nadau huaidina ga hula i godou mua, ga ulu i Tenua o God di Langi.
32 John Babdais gu hanadu gi goodou gu haga modongoohia adu di ala hagamouli, gei goodou digi hagadonu a mee, gei digau hagabudu dagitedi mono ahina huihui nadau huaidina gu hagadonu a mee. Gei goodou gu gidee gei digi huli godou maanadu, ga hagadonu a mee.” f 

Di ala kai o digau ngalua o di hadagee waini

(Mark 12.1-12; Luke 20.9-19)

33 Jesus ga helekai, “Hagalongo gi di ala kai labelaa: Tangada dana gowaa ga dogi dana hadagee waini, ga abaaba, ga geli di lohongo o di mee dagadagahi waini, ga hai dana angulaa hagaloohi, ga wanga dana hadagee gi digau ngalua gi benabena ina, ga hana. g  34 Di madagoaa e hadi ai nia hua o di hadagee ne dae mai, gei mee ga hagau ana daangada hai hegau gi digau ngalua bolo gi gaamai dono duhongo i dana hadagee. 35 Digau ngalua ga kumi digaula, tangada e dahi ne haga mamaawa, tangada e dahi ne daaligi gi made, tangada e dahi ne dilidili gi nia hadu. 36 Tangada dana hadagee ga hagau labelaa ana gau hai hegau gi dogologo. Digau ngalua ga hai hua go di nadau hai dela ne hai gi digau i mua. 37 Di hagaodi gi muli, taane deenei ne hagau hua dana dama donu gi digaula, ne hagamaanadu bolo digaula ga hagalabagau laa dana dama daane. 38 Di madagoaa digau ngalua ne mmada gi tama a maa, digaula ga helehelekai i nadau mehanga boloo, Deenei la go tama a tangada dana hadagee. Gidaadou ga daaligi a mee gi made, ga hai mee gi nia maluagina o maa! 39 Digaula ga kumi a mee, ga hudu gi daha mo di hadagee waini, ga daaligi a mee gi made.” 40 Jesus ga heeu, “Malaa, di madagoaa tangada dana hadagee waini ga dau mai, dehee dana hai ga hai gi digau ngalua?” 41 Digaula ga helekai, “Mee ga daaligi digau huaidu aalaa, ga wanga dana hadagee waini gi nnuai gau ngalua gi benabena ina, aalaa digau ga wanga gi deia dono duhongo mai i di hadagee i dono madagoaa donu e hadi ai.” 42 Jesus ga helekai, “Goodou digi daulia i lodo di Beebaa Dabu nia helekai aanei e hai boloo:

Di hadu dela ne hudu gi daha go digau hau hale bolo di balumee, la gu hai di hadu dela e kaedahi e hagalabagau. Di mee deenei la ne hai mai baahi Dimaadua, e haga goboina mai gi gidaadou!” h 
43 Jesus ga helekai, “Deelaa dagu mee e hagi adu gi goodou bolo Tenua o God la ga daa gi daha mo goodou, ga wanga gi nia daangada ala e haga kila aga nia hua e donu. 44 [Tangada dela ga doo gi hongo di hadu deenei, le e momooho dagidahi, gei di maa go di hadu la ne doo gi hongo tangada, le e nnogu hua gu made.”] 45 Nia dagi hai mee dabu mono Pharisee ne longono nia ala kai aanei ala e hai go Jesus, digaula gu iloo hua bolo mee e helekai i ginaadou. 46 Digaula ga halahala di nadau madagoaa humalia e kumi a mee, gei digaula e mmaadagu i digau dogologo ala e hai bolo Jesus la di soukohp.

Copyright information for `KPG