a22.13:Mt 8.12, 25.30; Lk 13.28
b22.23:Acts 23.8
c22.24:Deut 25.5
d22.32:Ex 3.6
e22.35-40:Lk 10.25-28
f22.37:Deut 6.5
g22.39:Lev 19.18
h22.44:Ps 110.1

Matthew 22

Di ala kai o tagamiami haga hai lodo

(Luke 14.15-24)

Jesus ne helekai labelaa gi nia daangada i nia ala kai boloo, “Tenua o God di Langi e hai beenei: Dahi king ne hagatogomaalia dana hagamiami haga hai lodo e hai di lodo dana dama daane. Gei mee ga hagau ana gau hai hegau gi gahia mai nia daangada gi lloomoi gi dana hagamiami, gei nia daangada hagalee hiihai e lloomoi. Gei mee ga hagau ana huai gau hai hegau gi hula, haga iloo gi digau ala ne gahi boloo: Dagu hagamiami la gu togomaalia, agu kau daane mono manu moomono la gu daaligi, nia mee huogodoo la gu togomaalia. Goodou lloomoi gi tagamiami! Digau ala ne haga gahi digi haga dahidamee ina di gahigahi a maa, e hai hua go nadau mee ala ne belee hai: tangada e dahi gu hana gi dana gowaa dogi mee, e dahi gi dana hale goloo. Hunu gau ne kumi digau hai hegau, ga haga mamaawa ga daaligi gi mmade. Di king gu hagawelewele huoloo, ga hagau ana gau dauwa gi daaligidia digau daaligi dangada aalaa, duungia nadau waahale gi odi. Gei mee ne gahi mai ana gau hai hegau ga helekai gi digaula boloo: Dagu hagamiami haga hai lodo la gu togomaalia, malaa, agu daangada ala ne gahi mai e hagalee tau ang gi tagamiami deelaa. Goodou hula gi hongo nia ala llauehe, laha mai digau huogodoo ala ma ga gidee goodou. 10 Gei digau hai hegau ga hula gi hongo nia ala, ga haga dagabuli mai digau huogodoo ala ne gidee ginaadou, digau humalia mono gau huaidu, gei di gowaa dela e hai tagamiami la gu dogologo daangada. 11 Di king ne hana bolo gi gidee ia digau ala ne lloomoi, ga gidee ia taane dela hagalee e ulu nia gahu hagamiami haga hai lodo. 12 Di king ga heeu gi mee: Dogu ihoo, goe ne ulu mai gi lodo behee, be goe oo gahu haga hai lodo ai? Taane deelaa digi helekai. 13 Di king ga helekai gi ana gau hai hegau boloo: Nnoodia nia lima o maa mo nia wae o maa, hudua a mee gi malaelae, gi di gowaa bouli dela ga dangidangi iei mee mo di gadigadi ono niha.” a  14 Di hagaodi dana ala kai, Jesus ga helekai boloo, “Dogologo ne haga gahi, gei digau hua dulii ala ne hili aga.”

Di heeu di hai o di hui dagitedi

(Mark 12.13-17; Luke 20.20-26)

15 Nia Pharisee ga dagabuli gi di gowaa e dahi, e hagamaanadu nadau heeu gi Jesus belee hai a mee gi hala. 16 Digaula ga hagau gi Jesus hunu nadau dama agoago mono gau hagamaamaa Herod, belee heeu gi mee, “Meenei tangada agoago, gimaadou gu iloo bolo goe e helekai i di tonu, e agoago i di tonu o di manawa o God ang gi nia daangada. Goe e de hei e-goe nia maanadu nia daangada, idimaa, goe hagalee dugu geegee nia daangada. 17 Helekai malaa gi di heeu deenei: Ma di mee e donu ang gi tadau haganoho bolo gidaadou gi huia tadau dagitedi gi di king o Rome be deeai?” 18 Jesus gu iloo ia hua nia maanadu huaidu digaula, ga helekai, “Goodou digau hai hegau ngudu golomada. Maeaha dela goodou e hagamada au? 19 Hagia mai di bahihadu dela e hui dagitedi.”

Gei digaula ga gaamai gi mee di bahihadu silber.
20 Gei mee ga heeu gi digaula boloo, “Ma di ada ni ooi gei di ingoo ni ooi aanei? 21 Digaula ga helekai, “Ni di king o Rome.”

Gei Jesus ga helekai gi digaula, “Malaa, huia ang gi di king o Rome nia mee a di king, gei huia ang gi God nia mee a God.”
22 Digaula ne longono hua nnelekai aanei, gu homouli huoloo, ga diiagi a mee i golo, ga hula.

Di heeu o di mouli aga

(Mark 12.18-27; Luke 20.27-40)

23 Di laangi hua deelaa, hunu Sadduccee ala e agoago bolo nia daangada la hagalee mouli aga, ga lloomoi gi Jesus, b  24 ga helekai gi mee, “Tangada Agoago, Moses gu hai bolo maa taane la gu made gei ana dama ai, tuaahina daane o maa gi lodo gi di lodo o maa, gi gila mai ai nia dama ni taane dela ne made. c  25 Malaa, tagahaanau daane dogohidu nogo noho i ginei. Tangada madua gu lodo ang gi di ahina, gei gu made digi hai di nau dama, gei mee ga diiagi di ahina deelaa gi dono duaahina. 26 Togolua daane ne hai labelaa beenei, mo togodolu, ga dae gi togohidu daane. 27 Di hagaodi gi muli, gei di ahina gu made hogi. 28 Malaa, di laangi dela ga hagamouli aga digau mmade, di ahina la ga hai di lodo donu ni ooi i digaula? Idimaa, digaula huogodoo la gu lodo gi mee!” 29 Jesus ga helekai, “Goodou e hai gee huoloo, idimaa, goodou e de iloo nia helekai di Beebaa Dabu, mo nia mogobuna o God. 30 Di madagoaa digau mmade ga mouli aga, digaula ga hai be digau di langi i nua ala hagalee hai nadau lodo. 31 Ang gi di hai o di mouli aga o digau mmade, goodou digi daulia be God ne helekai bolo aha adu gi goodou:

32 Au go di God o Abraham, di God o Isaac, di God o Jacob. Mee di God ni digau ala e mouli, hagalee ni digau ala gu mmade.” d 
33 Digau dogologo ala ne longono ginaadou dana agoago, gu homouli huoloo.

Taganoho koia e aamua

(Mark 12.28-34; Luke 10.25-28)

34 Nia Pharisee ne longono ginaadou bolo Jesus gu hai nia Sadduccee gi deemee di hai labelaa nadau heeu, gei digaula ga dagabuli mai. 35 Tangada e dahi i digaula, tangada hagadondonu haganoho, ga helekai belee haga ihala a Jesus, e  36 “Meenei, tangada agoago, dehee taganoho koia e hagalabagau i lodo nia haganoho?” 37 Jesus ga helekai, “Aloho i Dimaadua, go doo God, aga i lodo doo manawa hagatau, mo doo hagataalunga hagatau, mo au hagamaanadu hagatau. f  38 Deenei taganoho kaedahi e aamua, gei e hagalabagau. 39 Gei di lua haganoho e hai be di maa: Aloho i tangada i doo baahi, be doo aloho i di goe. g  40 Nia haganoho e lua aanei, aalaa go di hagamau o Nnaganoho Moses mo nia Agoago o nia soukohp.”

Di heeu di hai o di Mesaia

(Mark 12.35-37; Luke 20.41-44)

41 Nia Pharisee ga dagabuli mai gi di gowaa e dahi, gei Jesus ga heeu gi digaula, 42 “Goodou e hagamaanadu bolo aha di hai o di Mesaia? Mee tangada mai di hagadili a ai?”

Digaula ga helekai, “Di hagadili a David.”
43 Jesus ga heeu gi digaula, “Malaa, di Hagataalunga o God la ne aha, dela ne hai a David gi helekai bolo “dogu Dagi” Deenei telekai David ne hai:

44 Dimaadua gu helekai gi dogu Dagi: Noho i dogu baahi gau donu, ga dae loo gi dogu madagoaa ma ga dugu oo hagadaumee gi lala oo babaawae. h 
45 Maa David ne gahi di Mesaia bolo “dogu Dagi”, malaa di Mesaia la ne hai behee, dela ga hai di hagadili ni David?” 46 Tangada e mee di helekai gi nia heeu a Jesus ai. Daamada i di laangi deelaa, tangada ne heeu dana mee gi mee ai.

Copyright information for `KPG