a26.2:Ex 12.1-27
b26.7:Lk 7.37-38
c26.11:Deut 15.11
d26.15:Zech 11.12
e26.23:Ps 41.9
f26.28:Ex 24.8; Jer 31.31-34
g26.31:Zech 13.7
h26.32:Mt 28.16
i26.55:Lk 19.47, 21.37
j26.61:Jn 2.19
k26.64:Dan 7.13
l26.65-66:Lev 24.16
m26.67:Is 50.6

Matthew 26

Di haga nohonoho di hai belee daaligi a Jesus

(Mark 14.1,2; Luke 22.1,2; John 11.45-53)

Jesus ne lawa ana agoago i nia mee aanei huogodoo, gei mee ga helekai gi ana dama agoago, “Goodou gu iloo bolo i muli nia laangi e lua Tagamiami Pasoobaa ga hai. Gei Tama Tangada ga wanga bolo gi daudau ina gi di loobuu.” a  Di madagoaa deelaa, gei nia dagi hai mee dabu mo nia dagi mmaadua ne dagabuli gi di hale o Caiaphas, di tagi aamua hai mee dabu, ga hagataele belee kumi a Jesus hagammuni, e daaligi gi made. Digaula ga helekai, “Gidaadou hagalee hai di mee deenei i nia laangi Hagamiami Pasoobaa, gi dee wwaa hai baahi ginai nia daangada.”

Jesus e hagatulu i Bethany

(Mark 14.3-9; John 12.1-8)

Jesus nogo i di hale o Simon, taane nogo magi genegene, e noho i Bethany. Jesus nogo miami i teebele, gei di ahina ga hanimoi mo dana loaabi-“alabaster” e honu lolo kala gei e hui ngadaa, ga llingi gi hongo di libogo o maa. b  Ana dama agoago ga gidee di mee deenei, gu hagawelewele, ga heeu, “Ma e hagauwwou bele i-maha? Di lolo deenei ne bolo ne hui gi daha la gu gida teenedi damana, gu hagamaamaa digau hagaloale!” 10 Jesus gu iloo ia nia helekai digaula, ga helekai, “Goodou e haga deaadee di ahina deenei eiaha? Ma di mee humalia huoloo deenei ne hai go mee mai gi di au. 11 Digau hagaloale ga i godou baahi i nia madagoaa huogodoo, gei au ga hagalee madalia goodou gi muli. c  12 Di hai o di ahina deenei ne llingi dana lolo kala gi dogu huaidina, ne hagatogomaalia au gi dogu danu. 13 Au e hagi adu bolo nia madagoaa huogodoo o di Longo Humalia e dau ai i henuailala, di mee di ahina deenei ne hai, e dele labelaa, e hai di haga langahia o di ahina deenei.

Judas e baba di hagi aga Jesus

(Mark 14.10,11; Luke 22.3-6)

14 Tangada e dahi i nia dama agoago dilongoholu maa lua, dono ingoo go Judas Iscariot, ga hana gi nia dagi hai mee dabu, 15 ga heeu, “Maa au ga hagi adu Jesus, gei goodou ga gaamai di godou aha?” Digaula ga wanga nia bahihadu silber e motolu. d  16 I muli di madagoaa deelaa, gei Judas ga halahala dana madagoaa humalia e hagi anga a Jesus gi digaula.

Jesus mo ana dama agoago e miami Tagamiami Pasoobaa

(Mark 14.12-21; Luke 22.7-13,21-23; John 13.21-30)

17 Di laangi matagidagi Tagamiami di Palaawaa Digi Hagatanga, gei nia dama agoago a Jesus ga lloomoi gi mee, ga heeu, “Dehee dau gowaa e hiihai bolo gimaadou gi hagatogomaalia ina e hai Tagamiami Pasoobaa?” 18 Gei mee ga helekai, “Hula gi taane i lodo di waahale damana, helekai gi mee boloo: Di madau Dangada Agoago e helekai boloo: Dogu madagoaa gu dau mai. Au mo agu dama agoago e hai di madau Hagamiami Pasoobaa i doo hale.” 19 Nia dama agoago a maa ga hai gi hai be nia helekai a Jesus ne hai ang gi ginaadou, ga hagatogomaalia Tagamiami Pasoobaa. 20 Hiahi ia di mee, Jesus mo ana dama agoago dilongoholu maa lua ga noho gi lala belee miami. 21 Di madagoaa digaula nogo miami, gei Jesus ga helekai, “Au e hagi adu bolo tangada e dahi i goodou ga wanga au e hagahuaidu.” 22 Ana dama agoago gu manawa gee huoloo gi telekai deenei, ga daamada ga hagadau dagidahi ga heheeu gi mee, “Meenei, ma ko au?” 23 Jesus ga helekai, “Tangada dela ga hagatiu dana palaawaa gi lodo di ibu dalia au, go mee dela ga wanga au. e  24 Tama Tangada ga made gi hai be nia helekai di Beebaa Dabu, gei e huaidu ang gi tangada dela e wanga Tama Tangada. E humalia tangada deenei hagalee ne haanau!” 25 Judas go tangada dela ga wanga a mee gi lodo nia lima o ono hagadaumee, ga helekai, “Meenei, dagu Dangada Agoago, ma hagalee ko au?”

Jesus ga helekai, “Goe dela ne helekai bolo ma kooe.”

Tagamiami o Tagi

(Mark 14.22-26; Luke 22.14-20; 1 Corinthians 11.23-25)

26 I di nadau miami, Jesus ga dahi aga dana palaawaa, ga hagadabu, ga ginigini, ga wanga gi ana dama agoago, ga helekai, “Kae ina, geina, deenei go dogu huaidina.” 27 Gei mee ga dahi aga dana ibu waini, ga danggee gi God, ga wanga gi digaula, ga helekai, “Goodou huogodoo, inumia. 28 Deenei go ogu dodo o di hagababa a God. Ogu dodo ne haga hali ang gi digau dogologo belee wwede ai nia huaidu. f  29 Au e hagi adu gi goodou bolo au hagalee e inu labelaa di waini deenei, ga dae loo gi di laangi dela e inu gidaadou ngaadahi di waini hoou i Tenua o dogu Damana.” 30 Digaula ga daahili dahi daahili, nomuli ga hula gi di Gonduu Olib.

Jesus e hagi aga i mua di haga de iloo a Peter

(Mark 14.27-31; Luke 22.31-34; John 13.36-38)

31 Jesus ne helekai gi digaula, “Boo nei, goodou huogodoo ga llele, ga diiagi au, idimaa, di Beebaa Dabu e helekai boloo: God ga daaligi tangada hagaloohi siibi, gei nia siibi la ga llele dagidahi. g  32 Gei i muli dogu mouli aga, au ga hana i godou mua gi Galilee.” h  33 Peter ga helekai gi Jesus, “Meenei, maeaha maa digaula huogodoo ga llele, ga diiagi goe, gei au hagalee loo e diiagi goe!” 34 Jesus ga helekai gi mee, “Au e hagi adu bolo boo nei, i mua teduu ga wolo, goe ga helekai haga de iloo au haga dolu.” 35 Peter ga helekai gi mee, “Maeaha maa au ga made madalia goe, gei au hagalee loo e haga de iloo goe!”

Nia dama agoago huogodoo ala i golo ga helekai labelaa beenei.

Jesus e dalodalo i Gethsemane

(Mark 14.32-42; Luke 22.39-46)

36 Jesus ne hana mo ana dama agoago gi Gethsemane, mee ga helekai gi digaula, “Noho i ginei, au e hana, e dalodalo i golo.” 37 Mee ga lahi Peter mo nia dama daane dogolua Zebedee. Ono lodo gu huaidu huoloo gu dee baba. 38 Gei mee ga helekai gi digaula, “Ogu lodo gu daamaha huoloo, gu honu i di lodo huaidu. Au gu hai be tangada ga made. Goodou noho i ginei e haga aala dalia au.” 39 Gei mee ga hana gi daha mo digaula, ga dogo ia gi lala, ga dalodalo, “Dogu Damana, be di maa e mee, daawa gi daha mo au di ibu o di hagaduadua deenei, gei hagalee go dogu hiihai, go doo hiihai le e hai.” 40 Gei mee ga hana gi baahi ana dama agoago dogodolu, ga gidee ia digaula e kii, ga helekai gi Peter, “Ma e hai behee? Goodou e deemee di aala madalia au i di aawaa hua e-dahi? 41 Goodou aala, hai dalodalo, gi dee too goodou gi lodo nia hagamada. Di hagataalunga e hagalongo, gei tuaidina e bagege.” 42 Jesus ga hana haga lua ga dalodalo, “Tamana, di ibu o di hagaduadua deenei, la e deemee di daa gi daha, la dela hua e inu ko au, gei deeai, go doo hiihai la hua gi gila.” 43 Mee ga hanimoi labelaa, ga gidee ia ana dama agoago e kii. Digaula gu molemoe huoloo, gu deemee di aala. 44 Jesus ga hana labelaa e dalodalo i tolu holongo go talodalo la hua. 45 Mee ga hanimoi gi ana dama agoago, ga helekai, “Goodou e kii molooloo hua? Mmada! Gu dae mai di madagoaa Tama Tangada ga wanga gi lodo nia lima o digau huaidu! 46 Tuu i-nua, ga hula. Mmada, deenei taane dela ga wanga au!”

Di kumi o Jesus

(Mark 14.43-50; Luke 22.47-53; John 18.3-12)

47 Jesus nogo helehelekai huaigolo, gei Judas, tangada e dahi i nia dama agoago a maa gu dau mai mo digau dogologo dalia a mee. Digaula ne gaamai nadau hulumanu dauwa, mono mee haga mamaawa dangada. Digaula ne hagau mai go nia dagi hai mee dabu mo nia dagi mmaadua. 48 Judas ne helekai gi digaula boloo: Tangada dela ga hongi ko au, deelaa go mee. Kumidia! 49 Gei mee ga hanadu haga huudonu gi Jesus, ga helekai, “Meenei dogu dangada agoago. Di aumaalia gi madalia goe,” ga hongi adu a mee. 50 Jesus ga helekai, “Dogu ihoo hagaaloho, heia gi limalima dau mee belee hai.”

Nomuli, gei digaula ga lloomoi ga kumi Jesus, ga lawalawa.
51 Tangada e dahi i digau ala nogo madalia a Jesus ne dahi aga dana hulumanu dauwa, ga tuu talinga di hege o tagi aamua hai mee dabu. 52 Jesus ga helekai, “Dugua dau hulumanu dauwa gi dono lohongo. Digau huogodoo ala e dagidagi nadau hulumanu dauwa, le e mmade i tulumanu dauwa. 53 Goe e de iloo bolo au e mee di gahigahi dogu Damana gi hagamaamaa, gei mee ga hagau mai i baahi i nua nia buini dauwa e madangaholu maa lua gau di langi? 54 Malaa, dehee di hai ga mee di kila nia helekai o di Beebaa Dabu ala e helekai bolo deenei le e hai loo gi gila?” 55 Nomuli, gei Jesus ga helekai gi digau dogologo, “E hai behee? Au tangada daaligi dangada dela goodou e lloomoi e kumi au, ge gaamai godou hulumanu dauwa, mono mee haga mamaawa dangada? Nia laangi huogodoo au nogo noho i lodo di Hale Daumaha, e haihai agu agoago, gei goodou digi kumidia au. i  56 Malaa, nia mee aanei huogodoo ne hai loo bolo gi kila nia helekai ala ne hihi go nia soukohp gi lodo di Beebaa Dabu.”

Nomuli, gei nia dama agoago a maa ga diiagi a Jesus, ga llele gi daha.

Jesus i mua di gowaa hai gabunga aamua

(Mark 14.53-65; Luke 22.54,55,63-71; John 18.13,14,19-24)

57 Digau ne kumi Jesus, ga lahi a mee gi di hale Caiaphas, di tagi aamua hai mee dabu, di gowaa dela e dagabuli ai digau hagadondonu haganoho mo nia dagi mmaadua. 58 Peter ga daudali a Jesus, gei e mada tanga gi daha, ga ulu adu gi lodo di abaaba di hale tagi aamua hai mee dabu, ga noho i baahi nia daangada hagaloohi, bolo gi gidee ia di hagaodi gi muli o nia mee aanei huogodoo. 59 Nia dagi hai mee dabu mo digau hai gabunga aamua huogodoo gu hagamahi, e halahala di nadau haga modongoohia dilikai, belee hagahuaidu a Jesus gi daaligi a mee gi made. 60 Gei digaula digi gida di nadau hai, digau dogologo ne lloomoi gi mua digaula, ga helekai tilikai i Jesus. Muliagi, gei nia daane dogolua ga tuu aga, 61 ga helekai, “Taane deenei gu hai bolo ia e mee di oho gi lala di Hale Daumaha o God, gei muli nia laangi e dolu, geia ga haga duu aga labelaa.” j  62 Tagi aamua hai mee dabu ga duu i-nua, ga helekai gi Jesus, “Dau helekai gi di hagahuaidu deenei e hai adu gi di goe ai?” 63 Gei Jesus digi helekai. Tagi aamua hai mee dabu ga helekai labelaa gi mee, “I di ingoo o di God Mouli, au ga dugu adu gi di goe gi helekai hagamodu: Hagia mai gi gimaadou maa koe go di Mesaia, go Tama a God?” 64 Jesus ga helekai gi mee, “Deenaa gu helekai iei goe. Gei au e hagi adu gi goodou bolo dolomeenei ga hana gi muli, gei goodou ga gidee di Tama Tangada e noho i di baahi gau donu o di God Mogobuna, ge ga hanimoi i hongo nia gololangi!” k  65 Dana hagalongo gi di mee deenei, tagi aamua hai mee dabu gu haahaahi dono gahu, ga helekai, “Mee e helekai e hagahuaidu a God! Gidaadou hagalee hiihai gi tuai tangada haga modongoohia! Goodou dogolongono hua ana helekai hagahuaidu a God! l  66 Goodou e hagamaanadu bolo aha?”

Digaula ga helekai, “Mee gu ihala e hai loo gi made!”
67 Digaula ga buibui nadau haawale gi nia golomada o maa, ga dadaaligi a mee, gei digau ala ne paapaa a mee, m  68 ga helekai, “Mesaia, hagia mai be di maa koai dela ne paapaa goe!”

Peter e haga de iloo Jesus

(Mark 14.66-72; Luke 22.56-62; John 18.15-18,25-27)

69 Peter e noho i lodo di abaaba o di hale, gei tama ahina hai hegau o tagi aamua hai mee dabu ga hanimoi gi mee, ga haeleki, “Goe nogo madalia labelaa a Jesus o Nazareth!” 70 Gei mee ga haga de iloo ia i mua digau huogodoo aalaa boloo, “Au e de iloo eau di mee deenaa e helekai iei goe!” 71 Gei mee ga hana gi di ngudu di bontai di gowaa hai gabunga, gei tuai dama ahina ga gidee ia a mee, ga helekai gi nia daane ala i golo, “Taane deenei nogo madalia a Jesus o Nazareth!” 72 Peter ga haga de iloo ia ga helekai, “Au e helekai hagamodu bolo au e de iloo taane deenaa!” 73 Nomuli, nia daane nogo tuu i golo, ga lloomoi gi Peter, ga helekai, “Ma e donu hua bolo goe tangada i digaula, idimaa, oo hangaa leelee la ne hagi aga goe!” 74 Gei Peter ga helekai, “Au e hai dagu hagamodu bolo au ga hagi aga di tonu! God gi hagaduadua ina au maa au ga helekai hai gee! Au e de iloo taane deenaa!”

Di madagoaa hua deelaa, gei teduu ga wolo.
75 Peter gu langahia ia nia helekai a Jesus ne hagi ang gi deia boloo: I mua teduu ma ga wolo, gei goe ga haga de iloo au haga dolu. Gei mee ga hana gi daha mo dono dangi wawwawe aga i ono lodo.

Copyright information for `KPG