a28.16:Mt 26.32; Mk 14.28
b28.19:Acts 1.8

Matthew 28

Di mouli aga

(Mark 16.1-10; Luke 24.1-12; John 20.1-10)

I muli di Laangi Sabad, luada loo di laangi dabu, Mary mai Magdala, mo Mary dela i golo, ga hula belee mmada taalunga. Di madagoaa hua deelaa, gei tenua gu ngalungalua, tangada di langi o Tagi gu haneia i di langi, ga haga daga gi daha di hadu, ga noho i nonua. Mee e madamada huoloo gadoo be di ila, ono gahu e kene gadoo be ‘snow’. Digau madaloohi gu uli nadau gai huoloo, gu bolebole i nadau mmaadagu, gu hai be digau gu mmade. Tangada di langi ga helekai gi nia ahina aalaa, “Goolua hudee mmaadagu. Au e iloo bolo goolua e halahala a Jesus dela ne daudau i di loobuu. Mee gu hagalee i ginei, mee gu mouli aga be ana helekai. Lloomoi mmada gi di gowaa nogo moe iei mee. Hula hagalimalima, hagi anga ina gi ana dama agoago bolo mee gu mouli aga, gu hana gi Galilee i godou mua, deelaa di gowaa ga gidee goodou a mee! Gi langahia agu helekai ala ne hagi adu gi goolua!” Meemaa ga hagatanga haga llebullebu, gu mmaadagu gei gu tentene huoloo, ga llele ga haga iloo gi ana dama agoago. Di madagoaa deelaa, gei Jesus ga duu adu i mua meemaa ga helekai, “Di aumaalia gi madalia goolua.” Meemaa ga lloomoi gi mee, ga kumi adu nia wae o maa, ga daumaha ang gi mee. 10 Jesus ga helekai, “Goolua hudee mmaadagu, hula haga iloo ina gi ogu duaahina bolo gi hula gi Galilee, deelaa di gowaa ga gidee ginaadou au.”

Di haga iloo mai baahi digau madaloohi

11 Di madagoaa nia ahina aalaa ne hula ne haga iloo, hunu daangada i digau dauwa ala nogo madaloohi taalunga deelaa, ga hula gi di waahale, ga hagi ang gi nia dagi hai mee dabu nia mee huogodoo ala ne hai. 12 Nia dagi hai mee dabu ga heetugi gi nia dagi mmaadua ga haga noho di nadau mee dela e hai. Digaula ga wanga di nadau hulu hadu damana gi digau dauwa, 13 ga helekai, “Goodou helekai bolo ana dama agoago ne lloomoi boo, ga gaiaa tuaidina o maa, gei goodou nogo kii. 14 Maa di gobinaa ga longono ia, gei gimaadou ga haga modongoohia gi mee bolo goodou digi hala. Goodou hudee lliga i dahi mee.” 15 Digau hagaloohi ga kae nia bahihadu ga hai be nnelekai ala ne hagi anga gi digaula. Di longo deenei gu dele i baahi digau o Jew, ga dae mai loo gi dangi nei.

Jesus e haga gida gi ana dama agoago

(Mark 16.14-18; Luke 24.36-49; John 20.19-23; Acts 1.6-8)

16 Nia dama agoago dilongoholu maa dahi ne hula gi di gonduu i Galilee dela ne hagi anga go Jesus gi digaula bolo gi hula ginai. a  17 Di madagoaa hua dela ne gidee ginaadou a mee, digaula ga daumaha ang gi mee, gei hunu gau e manawa logo. 18 Jesus ga hanadu gi digaula, ga helekai, “Nia mogobuna huogodoo o di langi mo henuailala gu dugu mai gi di au. 19 Malaa, goodou hula gi nia daangada i nia henua huogodoo, heia digaula gi hai nia dama agoago ni aagu. Babdais ina digaula gi di ingoo o Tamana, Tama, mo di Hagataalunga Dabu. b  20 Agoago gi digaula gi daudalia nia mee huogodoo ala ne hagi adu gi goodou. Malaa, goodou gi iloo bolo au e madalia goodou i nia madagoaa huogodoo, ga dae loo gi di hagaodi o di madagoaa.”

Copyright information for `KPG