f4.12:Mt 14.3; Mk 6.17; Lk 3.19-20
Matthew 4
Di hagamada o Jesus
1 Nomuli, gei di Hagataalunga ga lahi Jesus gi di anggowaa belee hagamada i baahi o Satan. a 2 I muli nia laangi madahaa ge madahaa boo, gei mee digi miami, gu hiigai. 3 Gei Satan ga hanimoi gi mee, ga helekai, “Maa goe di Tama ni God, helekai gi nia hadu aanei gi huli gi hai nia palaawaa.” 4 Jesus ga helekai, “Ma gu lawa di hihi i lodo di Beebaa Dabu boloo: Tangada la hagalee mouli hua i di palaawaa, e mouli hua i nia helekai huogodoo ala e lloomoi i baahi o God.” b 5 Satan ga lahi Jesus gi Jerusalem, go di Waahale Hagamadagu, ga dugu a mee gi di ulu di Hale Daumaha, 6 ga helekai gi mee, “Maa goe di Tama a God, hobo gi daha, gi hai be nnelekai di Beebaa Dabu e helekai boloo:
God ga helekai gi ana gau di langi i di goe, digaula ga daahi goe gi nua gi dee tugi oo wae i nia hadu.” c
7 Jesus ga helekai, “Ma gu lawa di hihi labelaa i lodo di Beebaa Dabu boloo: Gi hudee haga mada ina Dimaadua go doo God.” d 8 Satan ga lahi labelaa a mee gi tomo di gonduu duuduu i nua ga hagi ang gi mee nia henua huogodoo o henuailala mo nadau madamada, 9 ga helekai, “Au ga gowadu gi di goe nia mee huogodoo aanei, maa goe ga dogoduli gi lala, ga daumaha mai gi di au.” 10 Jesus ga helekai, “Tuu i daha mo au, Satan! Di Beebaa Dabu e helekai boloo: Daumaha ang gi Dimaadua go doo God, gei deelaa hua go mee gi hai hegau ginai goe!” e 11 Satan gu hana gi daha mo Jesus. Gei digau di langi ga lloomoi, ga hagamaamaa a mee.
Jesus e daamada ana hegau i Galilee
12 Di madagoaa Jesus ne longono ia bolo John la gu lahi gi lodo di hale galabudi, geia ga hana gi Galilee. f 13 Gei mee digi noho i Nazareth, ga hana, ga noho i Capernaum, tama waahale i tongotai di Tai o Galilee, i lodo tenua Zebulun mo Naphtali. g 14 Di mee deenei ne hai bolo gi kila ai nia helekai ala ne hai go soukohp Isaiah boloo:
15 “Tenua go Zebulun mo Naphtali, i taalinga di ala dela e hana gi di tai dela i baahi gi dai Jordan, Galilee go tenua ni digau tuadimee. h
16 Nia daangada ala nogo noho i lodo di bouli, ga gidee di maalama aamua. Di maalama ga haga maalama digau ala nogo noho i lodo tenua bouli o di made.” 17 Daamada i di madagoaa deelaa, gei Jesus ga agoago, “Huli gi daha mo godou huaidu, idimaa, Tenua o God di Langi la gu hoohoo mai!” i
Jesus e gahi nia daangada hai waga daha dogohaa
18 Jesus nogo haaele i tongotai di Tai o Galilee, ga gidee tagahaanau daane hai waga daha dogolua, go Simon e haga ingoo bolo Peter, mo Andrew, e wagadaha gi di gubenge i lodo di monowai. 19 Jesus ga helekai gi meemaa, “Lloomoi i ogu muli, gei au ga aago adu goolua di haangodo gi nia daangada.” 20 Di madagoaa deelaa, meemaa ga diiagi nau gubenge, ga hula i muli o Jesus. 21 Mee ga hanadu, ga gidee labelaa tagahaanau dogolua James mo John, nia dama daane ni Zebedee. Meemaa i hongo di boodi i baahi di nau damana Zebedee, e hagatogomaalia nadau gubenge. Jesus ga gahi meemaa. 22 Di madagoaa hua deelaa, meemaa ga diiagi di nau boodi, mo tamana, ga hula i muli o Jesus.
Jesus e aago, e agoago, gei e hagahili ana magi
23 Jesus ga hana gi lodo Galilee hagatau, e agoago i lodo nia synagogee digaula, e agoago di Longo Humalia Tenua o God, gei e hagahili ana hagadilinga magi e logo. j 24 Di longo o maa gu dele gi nia gowaa huogodoo i Syria, gei nia daangada ga laha mai gi Jesus nadau gau magi huogodoo i nia hagadilinga magi e logo: digau gu iai di hagataalunga huaidu, hai hoodube, mo digau mmade nadau huaidina, gei Jesus gu haga hili nia magi digaula huogodoo. 25 Nia daangada dogologowaahee nogo daudali a mee mai i Galilee, Decapolis
▼
▼
4.25:Decapolis: Di ingoo deenei dono hadinga i nnelekai Greek boloo, “nia waahale e madangaholu”
, Jerusalem, Judea, mo tenua i bahi i-dua di monowai Jordan.
Copyright information for
`KPG
