a7.2:Mk 4.24
b7.12:Lk 6.31
c7.19:Mt 3.10; Lk 3.9
d7.20:Mt 12.33
e7.23:Ps 6.8
f7.28-29:Mk 1.22; Lk 4.32

Matthew 7

Di hagi aga digau ala i golo

(Luke 6.37,38,41,42)

“Goodou hudee hagi aga ina nia daangada gi dee hagi aga hua goodou go God. idimaa, God ga hagi aga goodou be di godou hagi aga nia daangada, gei mee ga hai hegau gi nnaganoho nogo hai hegau ai goodou gi nia daangada. a  Goe e aha dela e daumada di madageinga dela i lodo di golomada o doo duaahina, gei e de hei e-goe di bida laagau dela i lodo doo golomada? Dehee dau hai e helekai gi doo duaahina boloo: Dumaalia mai daawa ina di madageinga i lodo doo golomada, gei di maa di bida laagau dela i lodo doo golomada? Goe tangada hai hegau ngudu golomada! Daawa ina i mua di bida laagau dela i lodo doo golomada, gei goe ga gidee di daa gi daha di madageinga dela i lodo di golomada o doo duaahina. Hudee wanga ina nia mee dabu gi nia paana, digaula ga huli adu, ga gadigadi goodou. Goodou hudee kilia godou hadu hagalabagau gi mua nia biigi, digaula ga dagadagahi hua nia maa.

Tangi anga, halahala, dugidugi

(Luke 11.9-13)

“Tangi anga, gei goodou ga hai mee ginai. Halahala ina, gei goodou ga gidee. Dugidugi, gei di bontai la ga huge adu gi goodou. Idimaa, digau ala ga tangi anga, e hai mee ginai, digau ala e halahala, ga gidee, digau ala e dugidugi, gei di bontai ga huge anga. Ma iai tamana i godou lodo e wanga dana hadugalaa gi di tama dela e dangi anga dana palaawaa? 10 Be e wanga di wali gi mee dela e dangi adu dana iga? 11 Goodou nia daangada huaidu e iloo di wanga gi godou dama nia mee ala e humalia. Malaa, Tamana di langi ga wanga gi digau ala e tangi ang gi deia nia mee ala koia e humalia! 12 Goodou gi heia ang gi nia daangada godou mee ala e hiihai digaula gi heia adu gi goodou. Deenei tadinga Nnaganoho Moses mo nia Agoago o nia Soukohp. b 

Di bontai mada giigi

(Luke 13.24)

13 “Goodou gi ulu i di bontai mada giigi, idimaa, di bontai gi di gowaa hagaduadua le e mada laaniu, gei di ala dela e hula ai le e haingoohia, digau dogologo e taaele ai. 14 Gei di bontai dela e ulu gi di mouli le e mada giigi, gei di ala le e haingadaa, digau hua hogoohi e gidee di maa.

Di laagau mo ono hua

(Luke 6.43,44)

15 “Goodou gi haga ligaliga i nia soukohp dilikai ala e lloo adu gadoo be nia siibi, gei lodo digaula e hai be nia paana lodo geinga. 16 Goodou ga iloo digaula mai i nadau hegau ala e hai. Nia daangada e deemee di hadi di ‘grape’ be di hua-‘fig’ i di laagau duduia. 17 Di laagau tomo maaloo e hua humalia, di laagau tomo bagege e hua huaidu. 18 Di laagau tomo maaloo e deemee di hua huaidu, di laagau tomo bagege e deemee di hua humalia. 19 Di laagau dela hagalee hua humalia, le e hele gi lala, e hudu gi lodo di ahi. c  20 Malaa, goodou ga iloo nia soukohp dilikai mai i nadau hegau ala e hai. d 

Au e de iloo eau goodou

(Luke 13.25-27)

21 “Hagalee go digau huogodoo ala e gahigahi au boloo, Meenei dogu Dagi, e ulu i Tenua o God di Langi, ma go digau hua ala e hai di manawa o dogu Damana di langi. 22 Di madagoaa o di Laangi Hagi aga, gei nia daangada dogologo ga helekai mai boloo, Meenei di madau Dagi, Meenei di madau Dagi, gimaadou nogo agoago nia helekai a God, hagabagi nia hagataalunga huaidu, gu hai madau mogobuna e logo i doo ingoo! 23 Gei au ga helekai gi digaula boloo, Au e de iloo eau goodou. Tuu i-daha mo au, goodou digau huaidu! e 

Nia daangada hau hale dogolua

(Luke 6.47-49)

24 “Maa tangada gu longono agu helekai aanei, gei e daudali ai, mee e hai be taane kabemee dela ne hau dono hale i hongo tadugalaa. 25 Di ua ga doo, di monowai gu hontula gu mmidi, di madangi gu gono maaloo gi di hale deelaa, gei di hale digi hinga, idimaa ne hau i hongo tadugalaa. 26 Maa tangada e longono agu helekai aanei, geia hagalee daudali ai, mee e hai be taane dadaaulia ne hau dono hale i hongo di gelegele. 27 Di ua ga doo, di monowai gu hontula gu mmidi, di madangi gu gono maaloo gi di hale deenei, gei di hale gu hinga, gu mooho!”

Di mogobuna o Jesus

28 Di madagoaa Jesus ne haga lawa ana helekai i nia mee aanei, digau dogologo gu goboina huoloo i dana hai agoago. f  29 Mee nogo agoago i nia mogobuna, hagalee hai be digau hagadondonu haganoho.

Copyright information for `KPG