a9.10-11:Lk 15.1-2
b9.13:Mt 12.7; Hos 6.6
c9.34:Mt 10.25, 12.24; Mk 3.22; Lk 11.15
d9.35:Mt 4.23; Mk 1.39; Lk 4.44
e9.36:Num 27.17; 1 Kgs 22.17; 2 Chr 18.16; Ezek 34.5; Mk 6.34
f9.37-38:Lk 10.2

Matthew 9

Jesus e hagahili taane made dono huaidina

(Mark 2.1-12; Luke 5.17-26)

Jesus ne gaga gi hongo di boodi, ga hana gi baahi i golo di tai gi dono guongo donu. Gei nia daangada ga laha mai di nadau dangada made dono huaidina e moe i hongo dono hada. Jesus e iloo ia hua nia hagadonu digau aanei, ga helekai gi tangada magi, “Dagu dama daane, hagadagadagagee, oo huaidu la gu maahede.” Hunu gau hagadondonu haganoho ga helehelekai i nadau mehanga, “Taane deenei le e haga balumee a God.” Jesus gu iloo ia hua nia hagamaanadu digaula, ga helekai, “Goodou e aha ala e maanadu huaidu? Dehee di mee e haingoohia, e helekai boloo: Oo huaidu la gu maahede, be e helekai boloo: Duu i-nua, haaele? Au ga haga modongoohia adu gi goodou bolo Tama Tangada iai ono mogobuna e wwede nia huaidu i henuailala.”

Gei mee ga helekai gi taane made dono huaidina, “Duu i-nua, dahi aga ina doo moenge, hana gi doo hale.”
Taane made deelaa ga duu i-nua, ga hana gi dono hale. Digau dogologo gu gidee di mee deenei, gu mmaadagu huoloo, gu hagaamu a God i ana helekai mogobuna ang gi nia daangada.

Jesus e gahi Matthew

(Mark 2.13-17; Luke 5.27-32)

Jesus ga hagatanga i di gowaa deelaa, ga gidee ia tangada hagabudu dagitedi, go Matthew, e noho i lodo dono oobidi. Jesus ga helekai, “Daudali mai au.”

Matthew ga duu i-nua, ga daudali Jesus.
10 Di madagoaa Jesus nogo noho e miami i di hale o Matthew, gei digau hagabudu dagitedi dogologo, mo digau huaidu ga noho adu dalia a Jesus mo ana dama agoago i teebele deelaa. a  11 Hunu Pharisee ga gidee di mee deenei, ga heheeu ang gi nia dama agoago a maa, “Di godou dangada agoago e aha dela e miami dalia digau hagabudu dagitedi mo digau huaidu?” 12 Jesus ga longono ia digaula, ga helekai, “Ma hagalee go digau maaloo e heetugi gi togidaa, go digau hua ala e magi. 13 Goodou halahala ina tadinga o nia helekai di Beebaa Dabu ala e helekai boloo: Au hagalee hiihai gi nia tigidaumaha ala ne hai gi nia manu, gei go tumaalia hua. Au hagalee ne hanimoi belee gahigahi digau humalia, go digau ala e huaidu.” b 

Di heeu o di hagaonge

(Mark 2.18-22; Luke 5.33-39)

14 Nia dama agoago a John Babdais ga lloomoi gi Jesus, ga heeu, “Ma e aha gimaadou mono Pharisee e hagaonge, gei au dama agoago hagalee loo e hagaonge?” 15 Jesus ga helekai, “Goodou bolo nia daangada ala ne gahi gi tagamiami haga hai lodo, la gi noho lodo huaidu i di madagoaa taane hai lodo e noho i nadau baahi? Deeai! Di laangi ga dau mai, gei taane hai lodo la ga lahi gi daha mo digaula, deelaa di madagoaa digaula ga noho laa hagaonge. 16 Tangada e pono dana gahu bobo gi di mee gahu hoou ai, idimaa, di mee gahu hoou la ga mmuni mai, ga haga damana di bongoo di gahu. 17 Gei tangada e haga hau ana waini hoou gi lodo di mee dugu waini bobo ai. Ma ga hai beenei, di mee dugu waini la ga mahaa, nia waini la ga malingi, gei di mee dugu waini la ga mooho. Tangada le e haga hau ana waini hoou gi lodo di mee dugu waini hoou, gei nia maa huogodoo la ga benebene humalia.”

Tama ahina a tagi dauwa mo di ahina ne bili gi dono gahu.

(Mark 5.21-43; Luke 8.40-56)

18 Di madagoaa hua Jesus nogo helehelekai gi digaula i nia mee aanei, gei tangada aamua o Jew ga hanimoi gi mee, ga dogoduli, ga helekai, “Meenei, dagu dama ahina dela hua dogo made. Hanimoi, e dugu oo lima gi hongo o mee, gei mee ga mouli.” 19 Gei Jesus ga duu aga, ga hana dalia a mee mo ana dama agoago.

20 Di ahina nogo halihali ono dodo i nia ngadau e madangaholu maa lua ga hanimoi la tua o Jesus, ga bili gi taalinga di gahu o maa. 21 Mee ga daalo ang gi ono lodo boloo, “Go au gi bili gi di gahu o maa, gei au gu hili hua.” 22 Jesus ga huli gi muli, ga gidee ia di ahina, ga helekai, “Dagu dama ahina, goe hagadagadagagee. Go doo hagadonu deelaa ne hagahili doo magi.” Digi duai hua, gei di magi o maa gu hili.

23 Jesus ga hana gi lodo di hale tangada aamua. Dono gidee ia hua digau hai daahili mo digau dogologo ala e hagalongoaa i di gowaa deelaa, 24 geia ga helekai, “Goodou huogodoo ulu gi daha. Tama ahina le e kii, mee digi made!” Digau huogodoo gu gadagada haga balumee a mee. 25 I muli hua digaula ne ulu gi daha, Jesus ga ulu gi lodo di ruum tama ahina, ga dahi aga di lima o maa, gei tama ahina gu duu i-nua. 26 Malaa, di longo deenei la gu dele gi nia guongo huogodoo o tenua.

Jesus e hagahili nia daane deegida dogolua

27 Jesus ne hagatanga i di gowaa deelaa, ga hana, gei nia daane deegida dogolua ga daamada ga daudali a mee, ga wwolowwolo gi nua boloo, “Meenei, tama a David, hila mai gi gimaua.” 28 Jesus ga ulu adu gi lodo di hale, gei meemaa ga loo adu gi mee, gei mee ga heeu gi meemaa, “Goolua e hagadonu bolo au e mee di hagahili gulu magi?”

Meemaa ga helekai, “Uaa, meenei di mau Dagi.”
29 Jesus ga bili gi nia golomada o meemaa, ga helekai, “Gi heia adu gi goolua gi gila be di gulu hagadonu.” 30 Nia golomada o meemaa gu aala, gei Jesus ga helekai gi meemaa, “Hudee hagi anga ina di mee deenei gi tangada.” 31 Gei meemaa ga hula hua, ga hagadele di longo o Jesus gi nia guongo huogodoo o tenua deelaa.

Jesus e hagahili taane deemee di leelee

32 Di madagoaa meemaa ne hula, gei nia daangada ga laha mai gi Jesus taane deemee di leelee, idimaa, di hagataalunga huaidu gu i dono baahi. 33 Di madagoaa hua di hagataalunga huaidu ne hagabagi gi daha mo mee, gei mee ga leelee. Digau huogodoo gu goboina, ga helekai, “Di mee beenei ne gidee gidaadou i Israel ai!” 34 Gei nia Pharisee ga helekai, “Di tagi o nia hagataalunga huaidu dela ne wanga gi mee di mogobuna e hagabagi nia hagataalunga huaidu i baahi nia daangada.” c 

Jesus e mmada haga aloho gi nia daangada

35 Jesus ga hagadau i baahi nia guongo mono waahale huogodoo, ga agoago i lodo nia synagogee, e hagadele di Longo Humalia Tenua o God, gei e hagahili nia hagadilinga magi huogodoo. d  36 Dono gidee digau dogologowaahee, geia gu aloho huoloo i digaula, idimaa, digaula e de nnoomaalia, tangada e benebene digaula ai. Digaula gu hai be nia siibi, deai di nadau dangada benebene ginaadou ai. e  37 Deenei dana mee ne hagi ang gi ana dama agoago, “E donu bolo taugai e damanaiee, gei digau ngalua le e hogoohi. f  38 Goodou hai dangidangi ang gi tagi o taugai gi hagau ina mai ana gau ngalua e ngalua gi taugai.”

Copyright information for `KPG