a3.5:Acts 23.6, 26.5; Rom 11.1
b3.6:Acts 8.3, 22.4, 26.9-11
c3.17:1 Cor 4.16, 11.1

Philippians 3

Nia donu ala e donu

Ogu duaahina nei, di hagaodi gi muli agu helekai: goodou gi tentene i di godou hagadaubuni ang gi Tagi. Ma hagalee haingadaa mai gi di au go dagu tataanga agu mee ala ne hihi i mua, idimaa, ma e hai goodou gi mouli. Pula i digau ala e hai nia mee huaidu, ala e hai be nia paana. Digaula e maaloo dangihi gi di mee dela bolo e tuu di gili tuaidina. Ma go gidaadou ala ne kae di sirkumsais dela e donu, hagalee go digaula. Idimaa, gidaadou e daumaha ang gi God mai i dono Hagataalunga, gei gidaadou e tentene i lodo tadau mouli buni ang gi Jesus Christ. Gidaadou hagalee hagadagadagagee gi nia haihai gi di gili tuaidina. Gei au e mee di hagadagadagagee gi nia mee aalaa. Maa tangada e hagamamaanadu bolo ia e mee di mouli gi nia haihai gi di gili tuaidina, gei au dagu hadinga damana i golo, dela e hagadagadagagee iei au gi nia mee aalaa. Au ne sirkumsais gei au gu madua gu walu ogu laangi. Au tangada donu o Israel mai i dogu haanau, tangada mai i di madawaawa o Benjamin, gei au tangada donu o Hebrew. I dogu haga gila aga nia haganoho o digau o Jew, au di Pharisee. a  Gei au nogo hegeege huoloo nia haganoho aalaa, ga hidi iei au ga hagahuaidu nia nohongo dabu. Gei au hagalee hala i lodo dogu daudali nnaganoho gi donu. b  Nia hagadilinga mee beelaa huogodoo ala nogo haga dahidamee ko au, dolomeenei, gei au gu dugu bolo ma nia balumee, idimaa, go Christ. Hagalee bolo go nia hagadilinga mee hua ala beenei. Au haga balumee hua nia mee huogodoo bolo nia balumee, i di mee hua e-dahi dela koia e dahidamee, ge hagalabagau, dela go di iloo a Jesus Christ, go dogu Dagi. Nia mee huogodoo gu kili ko au gi daha, idimaa, go Christ. Au gu dugu nia mee aanei bolo ma nia balumee, bolo gi mee au di kae Christ, mo di buni gi mee i nia mee huogodoo. Au ogu donu ai, nia hagadilinga donu be nia donu o tangada dela e daudali nia haganoho. Malaa, dolomeenei, gei au gu hai mee gi nia donu ala ne gaamai i dogu hagadonu a Christ, ala nia donu e loomoi i baahi o God, ala e hagamau mai i di hagadonu. 10 Dagu mee dela e hiihai ginai, la ko au belee hai gi iloo eau Christ, ge gi longono mai gi ogu lodo nia mogobuna o dono mouli aga, mo di buni gi dono hagaduadua, gei au gi made gadoo be mee, 11 mo di hagadagadagagee bolo au e mouli aga mai di made.

Lele gi tagageinga

12 Au hagalee hai bolo au gu gila be gu dohu. Au e hagamahi gi kumi di kisakis deelaa, idimaa, Jesus Christ gu hai au di mee ni aana gi mee au di kae di kisakis deelaa. 13 E donu, ogu duaahina nei, au hagalee loo e maanadu bolo au gu kumi di kisakis deelaa. Ma di mee hua e-dahi dela e hai ko au, au e haga de langahia eau nia mee ala i ogu muli, e hai go agu mee ala e mee, gi mee au di dae gi nia mee ala i ogu mua. 14 Malaa, au e lele gi dae gi tagageinga, gi kumi di kisakis deelaa, dela go di gahigahi a God mai baahi o Jesus Christ ang gi di mouli dela i nua. 15 Malaa, gidaadou huogodoo ala gu mau i di hagataalunga, la gi hagamaanadu beenei. Maa iai digau i godou lodo e hagamaanadu hai gee mo di mee deenei, ga haga modongoohia la go God adu gi goodou. 16 Malaa, gidaadou gi hagamahi hua gi mua gi hai be tadau daudali nnaganoho mai i mua ga tugi loo gi dolomeenei.

17 Goodou huogodoo go ogu duaahina, goodou gi kawe i agu hangaahai. Gimaadou gu hai di ada mee humalia belee daudali go goodou. Goodou la gi mmada gi digau ala e daudali nia mee ala e donu. c  18 Nia mee aanei la gu lawa i dagu agoago haga logowaahee adu gi goodou mai i mua, gei dolomeenei, gei au e taanga labelaa nia maa mo ogu dangi. Digau dogologo gu dagi go nadau mouli gi hai ginaadou nia hagadaumee ni di made o Christ i hongo di loobuu. 19 Di hagaodi gi muli o nadau hangaahai la go nadau hagaduadua, idimaa, di god digaula la go nia mee ala e hiihai ginai nadau huaidina. Digaula e haga hagaamu nia mee ala belee langaadia ai ginaadou. Digaula e manawa hua gi nia mee o henuailala. 20 Gei gidaadou digau donu o di langi, gidaadou e talitali di hanimoi o tadau Dangada Hagamouli, go Tagi go Jesus Christ. 21 Mee e huli tadau huaidina ala e paagege ala e mee hua di mmade, gi hai nia huaidina ala e hai be dono huaidina madamada, gi nia mogobuna ala e mee di dagi ana mee huogodoo.

Copyright information for `KPG