a16.2:Ex 9.10
b16.4:Ex 7.17-21; Ps 78.44
c16.10:Ex 10.21
d16.12:Is 11.15
e16.15:Mt 24.43-44; Lk 12.39-40; Rev 3.3
f16.16:2 Kgs 23.29; Zech 12.11
g16.18:Rev 8.5, 11.13, 19
h16.19:Is 51.17
i16.20:Rev 6.14
j16.21:Ex 9.23; Rev 11.19

Revelation of John 16

Nia boolo o di hagawelewele o God

Nomuli, gei au ga longono di lee damana e helekai mai i di Hale Daumaha ang gi digau di langi dogohidu, “Hula, llingia gi daha nia boolo e hidu ala e honu i di hagawelewele o God gi hongo henuailala!”

Tangada di langi matagidagi ga hana ga dui dana boolo gi hongo henuailala. Gei nia magibala huaidu e mmaemmae huoloo la ga kila aga i baahi digau ala gu maaga gi di hagailongo o di manu huaidu, mo digau ala nogo daumaha gi di ada o di manu huaidu. a 

Togolua dangada di langi ga dui dana boolo gi hongo di moana. Gei nia wai gu hai be nia dodo o tangada made, gei nia manu mouli huogodoo i lodo di moana la gu mmade.

Togodolu dangada di langi ga dui dana boolo gi hongo nia monowai mo nia dama monowai, gei nia wai gu hai nia dodo. b  Gei au ga longono tangada di langi dela e dagi nia wai e helekai, “Meenei, Tangada Dabu, dela i golo, ge nogo i golo. Au hagi aga ala ne hai, le e hai donu! Idimaa, digaula la gu haga hali nia dodo o au daangada mo au soukohp, gei goe gu wanga nia dodo gi digaula bolo gi inumia. Digaula e kae nia mee ala e tau ang gi di hui o nadau mee hala ala ne hai.” Nomuli, gei au ga longono di lee e helekai mai i di gowaa dudu tigidaumaha, “Dimaadua go di God Aamua Huoloo! Dau hagi aga le e donu gei e hai donu!”

Togohaa dangada di langi ga dui dana boolo gi hongo di laa, gei di laa la gu dumaalia ginai gi duungia nia daangada gi di welengina maaloo dangihi. Digaula gu dudu go di welengina maaloo dangihi, gei digaula gu hagahuaidu di ingoo o God, dela nogo dagi nia hagaduadua aanei. Malaa, digaula digi huli gi daha mo nadau ihala, ge digi hagaamu di aamua o God.

10 Togolima dangada di langi ga dui dana boolo gi hongo di lohongo aamua o di manu hagamadagudagu dangada. Gei di bouli gu haga bouli tenua o di manu deelaa, gei nia daangada ga gadigadi nadau holole, idimaa, digaula gu mmae huoloo. c  11 Gei digaula gu hagahuaidu di God o di langi, idimaa, digaula gu mmae ge gu magibala. Malaa, digaula digi huli gi daha mo nadau haihai huaidu.

12 Togo ono dangada di langi ga dui dana boolo gi hongo di monowai damana go Euphrates. Di monowai gu maangoo, belee hagatogomaalia di ala i mua nia king ala ga lloomoi i bahi i-dua. d  13 Gei au ga mmada gi nia hagataalunga dogolia dogodolu e hai gadoo be nia kailuu. Digaula ne lloomoi i lodo di ngudu o di manu-“dragon”, di ngudu di manu hagamadagudagu dangada, mo di ngudu soukohp dilikai. 14 Digaula la go nia hagataalunga huaidu ala nogo hai nadau mogobuna. Nia hagataalunga dogodolu aanei, le e hula gi nia king henuailala huogodoo, e laha mai digaula gi di gowaa e dahi, ang gi tauwa dela ga hai i di Laangi damana o di God Aamua Huoloo.

15 “Goodou mmada! Au e hanimoi gadoo be tangada gaiaa! E maluagina go tangada dela e ala, gei e madamada humalia i ono gahu, gi dee heehee hua ia ono goloo ai, ga langaadia i mua nia daangada!” e 

16 Nia hagataalunga aalaa ga haga dagabuli nia king gi di gowaa e dahi, i di gowaa dela e haga ingoo i telekai Hebrew bolo “Armageddon”. f 

17 Togohidu dangada di langi ga dui dana boolo gi lodo di ahiaalangi, gei di lee damana ga hanimoi i di lohongo king i lodo di Hale Daumaha, e helekai boloo, “Ma gu haga lawa di hai!” 18 Nomuli hua, gei nia ila ga dabadaba, nia lee hamuihamumu, nia lee atili, mo di ngalungalua damanaiee o tenua ga hai. Deai di ngalungalua o tenua beenei ne hai ai, mai di laangi ne hai ai nia daangada, deenei hua la go di ngalungalua o tenua e kaedahi e huaidu huoloo! g  19 Di waahale aamua la gu mahaa dolu, gei nia waahale o nia henua huogodoo la gu mooho. God ne langahia ia di waahale aamua go Babylon, ga hai a mee gi inu nia waini o dana ibu, go nia waini o dono hagawelewele damana. h  20 Nia henua huogodoo gu hagalee, nia gonduu huogodoo nngala. i  21 Nia kolii llauehaa, taamaha di mee e dahi la nia pauna e lau, ga too ia i di langi gi hongo nia daangada. Gei digaula ga hagahuaidu a God i nadau hagaduadua go God gi nia kolii aanei, idimaa, ma di hagaduadua huaidu huoloo. j 

Copyright information for `KPG