a18.2:Is 13.21, 21.9; Jer 50.39, 51.8; Rev 14.8
b18.3:Is 23.17; Jer 51.7
c18.4:Is 48.20; Jer 50.8, 51.6, 45
d18.5:Gen 18.20-21; Jer 51.9
e18.6:Ps 137.8; Jer 50.29
f18.7-8:Is 47.7-9
g18.9-10:Ezek 26.16-17
h18.11:Ezek 27.31, 36
i18.12-13:Ezek 27.12, 13, 22
j18.15:Ezek 27.31, 36
k18.17:Is 23.14; Ezek 27.26-30
l18.18:Ezek 27.32
m18.19:Ezek 27.30-34
n18.20:Deut 32.43; Jer 51.48
o18.21:Jer 51.63-64; Ezek 26.21
p18.22:Ezek 26.13; Is 24.8
q18.22-23:Jer 7.34, 25.10
r18.24:Jer 51.49

Revelation of John 18

Di mooho o Babylon

I muli nia mee aanei, gei au ga mmada gi tuai dangada di langi e haneia i di langi. Mee dono mogobuna damana, gei di madamada o maa gu haga maahina henuailala hagatau. Mee ga wolo gi nua, “Maa gu mooho! Babylon damanas gu mooho! Gei dolomeenei, nia balu god mo nia hagataalunga gulugulua, nia hagadilinga manu mamaangi gulugulua ge haga ginagina dangada, le e noho i lodo Babylon. a  Nia henua huogodoo gu inu nia waini a maa, go nia waini maaloo o ana haihai huaidu. Nia king o henuailala gu hai di hai be di manu i baahi o mee, gei digau huihui mee o henuailala gu maluagina mai dono hagagailaa maaloo.” b  Gei au ga longono tuai lee mai di langi, e helekai, “Agu daangada, lloomoi gi daha! Lloomoi gi daha mo mee! Goodou hudee dau, e hai nia huaidu a maa! Goodou hudee madalia nia hagaduadua o maa! c  Idimaa, nia hala o maa gu logowaahee gu tugi i di langi i nua, gei God e langahia nia hangaahai huaidu o maa. d  Heia gi mee be dana hai nogo hai adu gi goodou. Huia haga lua gi mee ana mee huogodoo ala ne hai adu gi goodou. Haga hau ina dana ibu gi nia dagaao maaloo nia holongo e lua gi hongo nia dagaao a mee nogo hai adu gi goodou. e  Wanga ina dono hagaduadua mo dono lodo huaidu, gadoo be di madamada mo di haga manawa lamalia dela ne bida wanga go mee gi deia. Idimaa, mee nogo bida helekai hua i deia boloo, Deenei au di ahina king e noho i ginei! Au hagalee di ahina gu made dogu lodo, au hagalee tale ang gi di lodo huaidu! f  Ma dela gu hai beenei, nia hagaduadua aanei ga tale gi mee i lodo di laangi e dahi: di magi pale, lodo huaidu, mo tau magamaga. Mee ga dudu gi di ahi, idimaa, Dimaadua go God dela e hagi aga a mee, go mee dela e mogobuna huoloo.”

Nia king o henuailala ala nogo dau gi ana haihai huaidu mo ana hiihai huaidu, la ga tangi waawwawe i di nadau gidee di huiahi o di lalaula dela e dudu a mee. g  10 Digaula e tuu mai mogowaa, idimaa, digaula e mmaadagu di dau ang gi nia hagaduadua o maa. Digaula ga helekai, “E hagamadagudagu dangada! E hagamadagudagu dangada! Go Babylon di waahale aamua ge maaloo! Doo hagaduadua la ne hai hua i lodo di aawaa e dahi!” 11 Digau huihui mee o henuailala le e tangi wawe labelaa mo di lodo huaidu i mee, idimaa, ma gu hagalee digau e hui nadau goloo ai. h  12 Hagalee digau e hui nia goloo digau aanei ai: nia goolo, silber, hadu hagalabagau, hadu lodo baehua, nia gahu ne hai gi nia gahu lenge madammaa, gahu gono mmee halatee, gahu “silk”, gahu gono mmee malama, nia hagadilinga laagau kida ngadaa, nia hagadilinga mee ne hai gi nia madaagoo manu, mono laagau hui ngadaa, baalanga mmee, baalanga “iron” hadu hamaaloo, i  13 mo nia mee haga kala meegai “cinnamon”, ‘spice’, nia mee haga kala ‘incense’, ‘myrrh’ mo nia “frankincense”, nia waini, mono lolo olib, palaawaa mo nia palaawaa-‘wheat’, kau mo nia siibi, hoodo mo nia kulumaa, nia hege mo nia mouli o nia daangada. 14 Digau huihui mee ga helekai gi mee, “Nia goloo huogodoo ala nogo hiihai ginai goe bolo e hai au mee gu hagalee, oo maluagina mo oo goloo madamada huogodoo gu hagalee, gei goe ga deemee di gidee labelaa nia maa!” 15 Digau huihui mee ne maluagina i nadau huihui mee i lodo di waahale deelaa ga tuu mogowaa i mee, idimaa, digaula e mmaadagu di dau gi nia hagaduadua o maa. Digaula ga tangitangi mo di lodo huaidu, j  16 ga helekai, “E hagamadagudagu dangada! E hagamadagudagu dangada! Di waahale aamua nogo uluulu nia gahu lenge madammaa, nia gahu gono mmee halatee gei e mmee malama, gei e laageia gi nia mee humu goolo, nia hadu hagalabagau mo nia hadu lodo baehua! 17 Gei i lodo hua di aawaa e dahi, di maluagina hagatau deenei gu hagalee i baahi o mee!”

Nia gaabinu wagabaalii huogodoo, nia basinsa, digau ngalua hongo waga, mo digau huogodoo ala nogo hai nadau mouli i hongo di moana gu tuu mogowaa i mee, k 
18 ga tangi i di nadau mmada gi di huiahi mai di ulaula dela e dudu a mee, ga helekai, “Di waahale be di waahale damana beenei ai!” l  19 Digaula ga kili nadau gelegele dogolia gi hongo nadau libogo, ga tangi mo di lodo huaidu, ga helekai, “E hagamadagudagu dangada! E hagamadagudagu dangada! Di waahale aamua deenei, la di waahale ne haga maluagina digau huogodoo ala nogo deledele nia wagabaalii! Gei i lodo hua di aawaa e dahi, gei mee gu hagalee ana mee huogodoo!” m 

20 Di langi la gi tentene gi di mooho o maa. Goodou go nia daangada a God, mo digau agoago hagau, mo nia soukohp, goodou la gi tentene. Idimaa, God gu hagahuaidu a mee e hui dana hai ne hai adu gi goodou! n 

21 Tangada di langi maaloo ga dahi aga dana hadu damana gadoo be di hadu olo palaawaa, ga hudu gi lodo di moana, ga helekai, “Deenei di hai e hudu gi daha di waahale aamua go Babylon, ga hagalee mmada labelaa ginai tangada. o  22 Nia daahili ala e hua gi di ‘harp’ mo nia lee dangada, digau ala e hai hegau gi nia “flute”, mo nia buu-‘trumpet’ ga dee longono! Digau ngalua o nia moomee huogodoo ga hagalee, di lee o di hadu olo palaawaa ga hagalee longono mai doo baahi! p  23 Di maahina o di malama ga hagalee. Nia lee o nia daane mo nia ahina hai lodo la ga hagalee longono mai i doo baahi. Au gau huihui mee la nogo kaedahi e maaloo nadau moomee i henuailala hagatau, gei goe gu halahalau digau henuailala gi au buubuu dilikai!” q 

24 Babylon la ne hagaduadua, idimaa, nia dodo o nia soukohp mo nia daangada a God la gu kida i lodo di waahale deelaa, go nia dodo o digau huogodoo ala ne daaligi gi mmade i henuailala. r 

Copyright information for `KPG