a2.7:Gen 2.9; Rev 22.2; Ezek 28.13, 31.8
b2.8:Is 44.6, 48.12; Rev 1.17, 22.13
c2.11:Rev 20.14, 21.8
d2.14:Num 22.5, 7, 31.16; Deut 23.4; Num 25.1-3; Jud 11
e2.17:Ex 16.14-15, 16.33-34; Jn 6.48-50; Is 62.2, 65.15
f2.20:1 Kgs 16.31; 2 Kgs 9.22, 30
g2.23:Ps 7.9; Jer 17.10; Ps 62.12
h2.26-27:Ps 2.8-9

Revelation of John 2

Nnelekai ang gi nohongo dabu i Ephesus

“Hihia gi tangada di langi o di nohongo dabu i Ephesus,

Aanei la go nnelekai mai tangada dela e daahi nia heduu e hidu i dono lima gau donu, gei e heehee i mehanga nia lohongo malama goolo e hidu.
Au e iloo eau au mee ala ne hai. Au e iloo bolo goe gu ngalua damana mo di hagakono di manawa. Au e iloo bolo goe hagalee donu gi digau huaidu, gei goe gu halahala digau ala e hai bolo ginaadou nia daangada agoago hagau, ge hagalee nia daangada agoago hagau donu, gei goe gu gida bolo digaula digau hai kai tilikai. Goe gu manawa hagakono, gu hagaduadua goe i dogu ingoo, gei goe digi dugua au hegau humalia. Malaa, deenei dagu mee e hai baahi adu gi di goe: Goe gu hagalee aloho i di au dolomeenei, be doo aloho matagidagi. Haga maanadu ina di hai o doo hana gee i di au! Huli gi daha mo oo hala, heia go dau hai matagidagi. Maa goe ga hagalee huli gi daha mo oo hala, gei au ga hanimoi, ga daa gi daha dau lohongo malama gi daha mo dono lohongo. Malaa, deenei di mee e humalia i doo baahi: Goe e de hiihai gi nia mee digau o Nikolaita ala e hai, e de hiihai gadoo be au.

“Maa goe oo dalinga i golo, hagalongo gi nnelekai di Hagataalunga ang gi nia nohongo dabu!

Digau ala ma ga kae di aali, gei au ga wanga gi digaula di tonu o di gai nia hua laagau o di laagau haga mouli, dela e tomo i lodo di hadagee a God. a 

Nnelekai ang gi nohongo dabu i Smyrna

“Hihia gi tangada di langi o di nohongo dabu i Smyrna,

Aanei la go nnelekai mai tangada dela go Taamada mo di Haga odi, dela ne made, gei gu mouli aga labelaa. b 
Au e iloo oo haingadaa, au e iloo bolo goe e hagaloale, gei deeai, goe e maluagina! Au e iloo nia mee huaidu ne helekai hai baahi adu gi di goe mai digau bolo ginaadou digau o Jew, ge digaula hagalee digau o Jew, digaula nia daangada ni Satan! 10 Hudee madagu i dahi mee ga hagaduadua goe. Hagalongo! Satan la ga kili hunu gau i goodou gi lodo di hale galabudi, e hagamada godou hagadonu, gei godou hagaduadua le e hai i lodo nia laangi e madangaholu. Manawa dahi mai gi di au, maeaha maa goe ga made, gei au ga gowadu di mouli, di hui o doo aali.

11 “Maa goe oo dalinga i golo, hagalongo gi nnelekai di Hagataalunga ang gi nia nohongo dabu!

Digau ala ma ga kae di aali, la hagalee hagahuaidu go di lua made. c 

Nnelekai ang gi nohongo dabu i Pergamum

12 “Hihia gi tangada di langi o di nohongo dabu i Pergamum,

Aanei la go nnelekai mai tangada dela dana hulumanu baahi lua.
13 Au e iloo di gowaa e noho iei goe, go di gowaa dela e iai di lohongo o Satan. Goe e manawa dahi mai gi di au, gei goe digi dugua doo hagadonu au, i di madagoaa hogi ne daaligi ai gi made dagu dangada hagi aga manawa dahi go Antipas i di gowaa e noho ai a Satan. 14 Malaa, nia mee dulii aanei e hai baahi ei au adu gi di goe: Hunu gau i godou mehanga e daudali di agoago a Balaam ne aago Balak gi di hai e dagi digau Israel gi lodo di hala, dela ne hidi ai digaula ga gai nia meegai ala ne wanga gi nia balu god, mo di hai be di manu. d  15 E hai labelaa beenei, hunu daangada i godou mehanga e daudali nia agoago digau o Nikolaita. 16 Deenei laa, huli gi daha mo oo hala! Maa goe ga hagalee huli gi daha, hoohoo mai hua gei au ga hanimoi e heebagi gi digau beelaa, e heebagi gi tulumanu dauwa dela e duu mai i lodo dogu ngudu.

17 “Maa goe oo dalinga i golo, hagalongo gi nnelekai di Hagataalunga ang gi nia nohongo dabu!

Au ga wanga nia meegai-‘manna’ nogo dugu hagammuni, ang gi digau ala ga kae di aali. Au ga wanga labelaa nadau hadu kene dagidahi dela e hihi di ingoo hoou i ononua, dela e de iloo tangada, go tangada hua dela ga kumi di hadu, e iloo ia. e 

Nnelekai ang gi nohongo dabu i Thyatira

18 “Hihia gi tangada di langi o di nohongo dabu i Thyatira,

Aanei la go nnelekai mai Tama a God, ono golomada e maahina gadoo be di ahi, ono wae e maahina gadoo be di baalanga-“brass” ma ga hagadingidingia.
19 Au e iloo eau au mee ala e hai. Au e iloo doo aloho, doo manawa dahi, au hegau, mo doo manawa hagakono. Au e iloo eau au mee ala e hai dolomeenei, ala e mada logo i au mee ala nogo hai matagidagi. 20 Malaa, deenei dagu mee e hai baahi adu gi di goe: Go dau dugu ang gi di ahina go Jesebel, bolo ia di ahina kae hegau ni God. Di ahina deenei e aago agu dama hai hegau gi heia nia huaidu di hai be di manu, mo di gai nia meegai ala ne wanga gi nia balu god. f  21 Au gu dugu anga dono madagoaa e huli ai ono huaidu, gei di ahina deelaa e de hiihai di huli gi daha mo ono haihai be di manu. 22 Malaa, gei au ga hudu a mee gi hongo di moenge dela nogo hai ana huaidu, mo digau ala nogo hai be di manu gi di ahina deelaa, digaula ga wanga ginai di hagaduadua huaidu huoloo. Au ga hai di hai deenei, go di maa hua be digaula gu huli gi daha mo di huaidu ne hai gi di ahina deenei. 23 Au ga daaligi nia hoo o maa gi mmade, gei nomuli, gei nia nohongo dabu huogodoo ga iloo bolo ma ko au dela e iloo nia maanadu mo nia hiihai o nia daangada huogodoo. Au ga hui tangada nei mo tangada nei gi tau gi ana mee ala ne hai. g 

24 “Gei goodou ala i golo i Thyatira, la digi daudalia di agoago huaidu deenei. Goodou digi kabe nia agoago ala e haga ingoo go digau i golo, bolo “Nia mee hagammuni o Satan”. Au e helekai adu gi goodou, au hagalee gowadu godou mee daamaha e aamo. 25 Daahia gi mau nia mee ala i godou baahi, ga dae loo gi dogu hanimoi. 26 Au ga wanga gi digau ala ma ga kae di aali mo di hai agu mee ala e hiihai ginai ga dae loo gi di hagaodi, di mogobuna i di gili nnenua llauehe. h  27 Au ga wanga gi digaula di mogobuna dela e hai be di mogobuna dela ne kae ko au mai dogu Damana:

Mee ga dagi nia henua gi togodogo baalanga, e oho haga ligiligi nia henua, gadoo be nia boolo ala ne hai gi nia gelegele pigi.
28 Au ga wanga gi digaula di heduu o di luada.

29 “Maa goe oo dalinga i golo, hagalongo gi nnelekai di Hagataalunga ang gi nia nohongo dabu!

Copyright information for `KPG