a6.4:Col 2.12

Romans 6

Made gi daha mo di huaidu, mouli i baahi o Christ

Malaa, gidaadou la ga hai bolo aha? Gidaadou gi noho hua i lodo tadau huaidu, gei tumaalia o God la ga damana mai? Deeai! Gidaadou ne mmade gi daha mo di huaidu, malaa gidaadou e noho huaigolo i lodo di huaidu behee? E donu goodou gu iloo di hai o tadau babdais, gidaadou gu buni ang gi Jesus Christ, gu buni labelaa ang gi dono made i tadau kae di babdais. Malaa, mai i tadau babdais, gei gidaadou gu buni ang gi dono made mo dono danu. Christ ne mouli aga mai i dono made i di madamada mo nia mahi o dono Damana, bolo gi noho gidaadou i lodo di mouli hoou. a  Idimaa gidaadou ala gu buni ang gi mee i dono made, gidaadou gu buni labelaa gi mee i dono mouli aga. Gidaadou gu modongoohia bolo tadau mouli namua la gu made dalia a Jesus Christ i dono made i di loobuu belee daaligi gi daha di mogobuna huaidu i tadau baahi, gei gidaadou ga hagalee hai nia hege ni di huaidu. Idimaa, di madagoaa tangada ma ga made, geia gu dagaloaha mai gi daha mo di mogobuna o di huaidu. Ma gidaadou ne madalia a Christ i dono made, gidaadou e hagadonu bolo gidaadou ga mouli labelaa dalia a mee. Gidaadou gu modongoohia bolo Christ gu mouli aga mai i di made, gei mee hagalee made labelaa. Mee hagalee noho i lala nia mogobuna o di made. 10 Idimaa mee ne made, di huaidu gu deai ono mogobuna i hongo mee ai, gei dolomeenei mee e mouli dono mouli buni ang gi God. 11 Malaa dela di godou hagamaanadu bolo goodou digau e mmade i baahi di mouli huaidu, gei e mouli i baahi di mouli o God mai i Jesus Christ. 12 Gei goodou hudee dugu anga di huaidu gi dagia godou huaidina, gi dee daudali nia hiihai huaidu o godou huaidina. 13 Goodou hudee wanga ina gi di huaidu godou huaidina e haga gila aga godou haihai huaidu. Goodou wanga ina goodou gi God, gi dina be nia daangada ala ne mouli aga i di made ang gi di mouli, gei wanga ina godou huaidina hagatau gi hai hegau gi di tonu o God. 14 Idimaa, di huaidu gi hudee dagi ina goodou, goodou hagalee e mouli i lala nnaganoho, goodou e mouli i lala tumaalia o God.

Nia hege ni di tonu

15 Gei gidaadou la ga hai bolo aha? Gidaadou ga hai nia huaidu, idimaa, gidaadou hagalee noho i lala nnaganoho, gei e noho i lala tumaalia o God? Deeai! 16 Goodou gu iloo bolo goodou ga hai hege gi dahi dangada, goodou gu hai nia hege ni tangada dagi deelaa. Goodou ma ga hai nia hege ni di huaidu, goodou ga hai digau e mmade. Gei goodou ga hai nia hege ni di tonu, goodou ga donu i baahi o God. 17 Gi danggee gi God, idimaa, i mua gei goodou nogo hai nia hege ni di huaidu, gei dolomeenei goodou gu hai digau e hagalongo i lodo godou manawa hagatau ang gi di tonu dela gu gidee goodou i lodo nia agoago ala ne kae go goodou. 18 Goodou gu maahede gi daha mo di huaidu, gu hai nia hege ni di tonu. 19 (Au e hai hegau gi nia bida helekai haingoohia, idimaa, goodou e paagege.) I mua, gei goodou nogo dugu goodou gi hai nia hege ni di huaidu, mo di haga gila aga di manawa huaidu. Gei dolomeenei goodou dugu anga goodou gi hai nia hege ni di tonu e haga dabuaahia. 20 I lodo di godou madagoaa nogo hai hege gi di huaidu, goodou nogo maahede gi daha mo di tonu. 21 Ma di humalia aha dela ne gila adu gi goodou i di godou haihai nia mee haga langaadia dangada dolomeenei? Di hagaodi gi muli o nia mee aanei, la go di made! 22 Gei dolomeenei, gei goodou gu maahede gi daha mo di huaidu, gu hai nia hege ni God, gei di mee dela e kae go goodou la di mouli dela e hagadabu ang gi God, mo di hagaodi gi muli la di mouli dee odi. 23 Idimaa, di hui o di huaidu la go di made, gei di wanga dehuia o God la go di mouli dee odi, dela i baahi o Jesus Christ, go tadau Dagi.

Copyright information for `KPG