1 Timothy 3

3:1-7 Iesu Tumondari+ Embo Da Giti Jighari Eminguse Iraeteri.

Geka emo geka bekári. Mave ekaresia+ da giti jighari
3:11 Timothy 3:1-13 eminda, kotugo Titus 1:5-9 aminda, Paul Greek embo da geka isambu etodaba naká:episkopos (1Ti 3:1-7, Tit 1:7-9),diakonos (1Ti 3:8-12),presbyterion (Tit 1:5-6) gefuse, nenda saramana a nenda irari da geka se disugusira. Evetu genembo mendeni erekotera amo, geka etodaba naká ainda tuka mo, jo nunda nunda beká iraeri. Inono namonde sifo enibajari sedo, sifo enigiti jighari seraera. O mendeni,episkopos ekaresia ‘church’ etoto o etodaba naká kaifa ariá seraera. Kotugopresbyterion nengaediakonos ekaresia dabako jokádaepiskopos da duruda saramana ariá seraera.
ari dae uju arira amo, evevari. Amo saramana bouvu a evevagori.
Ekaresia da giti jighari resena emo, nu ari eko eni jo ari sirorae arira, a evetu dabako fitido irarira. Nunda fisi da uju ava bureguse dubo kotise, durumugedo irarira. Esa embo foa gheraera ava, nati joká dedo bu tavo arira. Nu dengoro indarikena inono arira. Nu jo uvu fakara teria mindari jiro birurughae arira. Nu jo tataya kato ae arira; durumuguse irarira. Nu monidae jo dighighi ae arira. Nunda evetu a mandi sasingu evevada kaifa tavo ururari, ne numoá kakara use nunda geka ningarera. Ainda beká mo: genembo mave nunda evetu a nunda mandi sasingu jo kaifa e gogoghombuse, emboro eveva ijugae arira amo, nu nange God da ekaresia+ kaifa ari? Genembo sife nembo dubo jovereghedo, God da mandi usira ava, saramana resena emo, jo nune bari da kaugo iraeri. Erama nu gogore urureuri, God nu imboe edo ighagha eure dae sise resena. Eregosesa: Satan nu amingetiri, God nu ighagha usira. Geka eni mo: genembo giti jighare dae sedo gategarera amo, genembo eveva eni, ava gategarera. Genembo resena amo, evetu genembo God da natofo jo ae irera aimi tumonderaera, ava gategarera. Ainda tuka mo: genembo avavaga jo totoi Satan da vaghoda teredo gofae arira.

3:8-13 Iesu Tumondari+ Embo Da Babojegari, Ne Kau Eminguse Iraeteri.

Ekaresia+ da babojegari, ne kau daba aminga ava use iraeteri. Ne veka eveva avanembo use, geka gungubo jo sae arera. Ne vaini (wine) teria jo mindoro jiro birurughae arira. Ne dighighi jo ae arera. Ne dubo joká simbugedo a dubo isambu futuse, God nunda kotari mendeni giti jungedo amboda afigusira, ava tumonduse irarera. 10 Nenda irari ava giti ijuje gogoghombedo, amboda saoro saramana amo nene barera. 11 Kau daba aminga ava, nenda evevetu barago, veka eveva vanembo use irarera. Ne jo unongu sae arera. Ne fisi da uju ava bureguse irarera. A nenda kokomana jo derae arera. 12 Genembo ogabada arira amo, nu evetu dabako fitido irarira. Nunda evetu a mandi sasingu kaifa e gogoghombururari, nunda geka ningarera. 13 Gegenembo mave ogabada da saramana egogoghombarera amo, nenda bino teria ari, ne fakina edo, Iesu Keriso tumonderaera ava, osa sarera.

3:14-16 Namondeda Tumondari Da Susu Mo, Iesu Numori.

14 Na ya nimo gaetena ava kotise irena. Avata ijuga evia eregefena, ainda beká mo: 15 rejo eniimi na buregari fetarena amo, ekaresia+ nange iraetira aindae ni jo manamana ae aresa. Namonde, God jebuga irira, ainda natofo jokáda nange iraetera ava, reta evia tegutuse kasama aresa. God da natofo resena emo, nunda ekaresiadae resena. Kau tutumbiimi kambo da bouvu fumburaira aminga ava, ekaresiaimi God da geka beká ava bu jighirise kaifa eraera. 16 A namondeda tumondari da susu, God giti jungetiri ireira amo, teriari. Amo jo ighagha use bunari da kaugo iraeri. Amo Keriso numori.

Nu genembo da tamo budo, enda eminda sirorusira.
Etiri, nunda geka beká a nunda ari dambu beká, ava God da Asisiimi ijugetiri kasama useri.
Nu endada iriri, aneya ne gosuseri.
A nunda bino ivegedo iri, osa setero enda da oro oro isasambui nininguseri.
Enda eminda, evetu genembo digarigo numoá tumonduseri,
a God setiri nu sekago utuda vitíra, nunda duro budo, aminda anumbusira.
Copyright information for `KPR