Hebrews 8

8:1-13 Iesu Nu, Namondeda Fristi+ Iká Bekádari.

Na geka setena ainda tuka mo, eviri. Namondeda fristi+ iká bekáda amo, nu kau emingori. Nu utuda God Durode ainda avo anumba aminda, ungo gimandukena anumbirira. God da vasa kakara beká ainda jokáda, nune fristi+ iká bekáda, ainda saramana ava use irira. Giti, namondeda abuamane nene emboimi dobo dighido, aminda God tumonde bainghedo ghuseri. O vasa resena emo, God da vasa kakara beká utu aminda irira. Bajari nune tofo mandi etiri sirorusira.

Fristi+ da giti jighari isambu, ne joba a sino fuka da ororo God kena mutari dae sedo fristi+ useri. Ava sedo, namondeda fristi+ iká bekáda, numbarago joba a ororo mutaeti. Nu rea futusira, ainda geka oroko sari dae erena. Namondeda fristi+ iká bekáda Iesu, nune endada iraetira amo, nu jo fristi+ ae aeti. Ainda beká mo: endada, fristi+ mendeni irera. Irise, Agho Dari manai, joba rea mutari resira, ava muturaera. Ne fristi+ da saramana eraera amo, tefo dangio vanembori. Beká a susu mo, utuda irira. Moses dobo iti simbugari dae sedo simbugiri, God numokena sisira, “Dobo da susu utuda irira, ainda dangio doriri aminda ijugeteno gosusesi. Dobo kau aminga ava iti simbuge!” aminge sisira. Avata Iesu jo, fristi+ setena, amingo iraeri. Saramana nune utuda eraira amo, teriago bekári. Nene endada eraera amo, kitakori. Namonde nu tumondedo, ya God kena buvudo jebuge gogoghombarera. O Agho Dari manai tumondarera amo, jo jebugae arera. Aindae sedo, emboro+ Iesu nune afigusira amo, evevari. O fristi+ emboro+ endada afigusera amo, jo amingo iraeri.

Ya God Afakena buvari da emboro+ Iesu afigusira amo, evevari. Ainda beká mo: emboro+ giti ireira, aminda ya God kena buvaetera amo, nu jo emboro+ seka eni afigae aeti. Avata evetu genembo jo agho dari da emboro+ manai aminda ya God kena buvae etero gido, aindae God eminge sisira:

“Bajari resira, ‘Sifo buvari dae erira. Sifo aminda, na Judah ondi a Israel embo isambudae, emboro+ seka afigarena.
Na nembuamane unumbe ungoda budo, reighi Egypt ghedo furari dae use,
emboro+ foa namokena buvari ava afiguseni.
Emboro+ seka oroko nembo afigari resena emo, evevagori.
Emboro+ giti nembuamanedae afigusena amo, jo amingo iraeri.
Emboro+ foa namokena buvari giti afigusena ainda geka ava,
ne jo ningae irise, gogore edo dotutuseri. Aindae sedo, na ne kotae useni.
10 Avori, emboro+ seka Israel embo foa namokena buvoro dae sedo afigarena amo, kau emingori.
Nanda Geka a Agho Dari nenda jiroda fitono irarira, a nenda dubo jokáda gembono irarira.
Na nenda God arena. Ne nanda natofo arera.
11 Ne nenda kokomanakena o nenda nano namendikena, jo eminge sae arera,
“Bajari kasama aso dae resena!” jo aminge sae arera.
Ainda beká mo: sifo aminda, ne isasambu na kasama arera.
Kokotofu a sabua mo, ne isasambu na kasama arera.
12 Nenda ari sembae gido joka arena, a nenda ari ekoko ava kote doyarena,’”
Bajari aminge sisira.
13 God emboro+ sekadae sise, emboro+ manai amo dotiri, emboro+ gajari dae usira. A namonde kasama erera: emboro+ gajarira amo, gajari dadabarira.

Copyright information for `KPR