2 Thessalonians 3

Hanɨp gasɨ nɨŋmim, God nɨp sabe gɨmim

Pen añ mam bɨ, manö añɨ ap mɨdöp. Hanɨp God nɨp sabe göl gɨ mɨdaimim. Kalöp Bɨ Kub manö aij hag ñɨno nɨŋ udpe, nɨbi bɨ kale rɨmnap kalöp nɨŋöm Bɨ Kub manö aij u rö nöp nɨŋ udlö, nɨbi bɨ rɨmnap iru nöp kɨd kɨd gau manö aij u nɨŋöm, Bɨ Kub manö aij nɨpe ke nöp mɨdöp u a göm nɨŋ udla. Anɨb u, God nɨp hag nɨŋmim, Bɨ Kub manö aij u nɨbi bɨ ram mɨnöŋ aŋ aui mɨdpal kalɨp hag ñɨno, nöd kalöp aŋ au ga rö, anɨb unbö rö nöp gɨnɨm. Pen God nɨp sabe gɨmim nan ap nɨp hag nɨŋbe: God nɨpe gö bɨ naij nan si nan naij nöp gɨmɨdal gau, hanɨp nan ap göl rö lagnɨm. Nɨhön gɨnɨg: nɨbi bɨ rɨmnap Krais manö aij u nɨŋ udagpal.

Pen Bɨ Kub hagöp rö, pör nöp anɨb unbö rö nöp göp. Nɨpe kalöp gö kale manö nɨpe nɨŋ ud pɨdöŋ gɨmim nɨp cɨg pɨdöŋ gɨmim gɨ mɨdpe Seden kalöp ɫɨp göm naij gɨnɨm rö lagnab. Pen Bɨ Kub hanɨp gasɨ ñö gasɨ halö mɨdun nɨŋbun, manö kalöp hag ñɨno u, kale udmim anɨb unbö rö nöp göl gɨ mɨdeinabim. a  Bɨ Kub nɨp sabe gɨpun hagpun, nɨpe kalöp gasɨ aij ñö, God nɨbi bɨ mɨdmagö löp rö nɨŋmim, Krais ilön kub uda pen kƚö göm nan nɨhön gɨnɨg ga u arö gaga u nɨŋmim, anɨg unbö rö nöp gɨnabim.

Wög gɨmim nöp nan ñɨŋnabim

Añ mam bɨ. Bɨ Kub Jisas Krais manö yad nɨbi bɨ gau hag ñɨmim a ga rö kalöp hagabun. Mam rɨmnap wög gagöm yɨharɨŋ nöp gɨ ajöm, hagpun rö gagaiöl, kalɨp aip manö manö hagagmim. b  Kale ke nɨŋbim, hon kale aip mɨdun gɨmɨdun adö u geinabim, Bɨ Kub nɨp aij gɨnab. Hon yɨharɨŋ mɨdagmɨdun. c  Nɨbi bɨ rɨmnap nan magö kale yɨharɨŋ ñɨŋagun a gun, sɨdö aŋ sɨbön yaŋ kƚö ilön gun nöp nan ñɨŋmɨdun. d  God wög gɨpun rö, kalöp hag nɨŋun nan haƚöwaƚö udun ñɨŋbnop u pen kalöp nagɨ aij adö u yamno nɨŋmim anɨg unbö rö nöp gɨmim a gun, ke kƚö ilön gun nan ñɨŋmɨdun. e  10 Pen kale aip mɨdun hagmɨdun, “Nɨbi bɨ wög gagöl nan ñɨŋagöl,” a gɨmɨdun u nɨŋbim.

11 Manö ap nɨŋbun u, nɨbi bɨ kale rɨmnap wög gagöm, yɨharɨŋ nöp mɨdöm, gau gau ajöm, manö pi pɨg hagöm, nɨbi bɨ gau anɨg gɨpal anɨg gɨpal a gɨpal. f  12 Bɨ Kub Jisas Krais nɨp wög gɨpun rö, nɨbi bɨ anɨb gau kalɨp manö kƚö gun hagabun, agamɨj mɨd aij gɨmim, wög ke gɨmim nan ñɨŋmim. g 

13 Pen añ mam bɨ. Kale nagɨ aij adö u nöp gɨ dammim, iru maru gainɨm, nan aij nɨhön u nöp nɨŋmim göl gɨ mɨdaimim. h 

14 Manö köp kalɨ kƚiñ rɨkun hagabun i, nɨbi bɨ rɨmnap nɨŋagaiöl, nɨbi bɨ an an anɨg gɨpal u nɨŋ aij gɨmim, kalɨp manö manö hagagmim; yɨharɨŋ mɨdpe kalɨp nable gɨnɨm. 15 Pen kalɨp kauaƚ mauaƚ rö nɨŋagmim; mam hon a gɨmim hag ñɨ aij gɨmim. i 

Pol, “Kale mɨdpim?” a göp

16 Bɨ Kub hanɨp gö gasɨ iru nɨŋagun u, nɨpe ke kalöp magöŋhalö aip mɨdö, kale pör nöp nan nɨhön nɨhön gɨnabim u, mɨd aij gɨmim gasɨ iru nɨŋagnabim.

17 Yad Pol. Manö naböŋ i ñɨmagö yad ke kalɨ kƚiñ rɨkem, “Kale mɨdpim?” a gabin. Ñɨmagö yad ke manö kalɨ kƚiñ rɨkpin u, pör anɨb i rö nöp kalɨ kƚiñ rɨkpin u me, nɨŋnabim. 18 Bɨ Kub hon Jisas Krais kalöp magöŋhalö mög nɨŋöm, ud aij göl gɨ mɨdainɨm.

Copyright information for `KPW