Luke 3

Jon Bɨ Ñɨg Pak Ñeb manö hag ña

(Mad 3:1-12; Mak 1:2-8; Jon 1:19-28)

Rom gapman bɨ kub yabɨƚ Sisa Daibirias ram mɨnöŋ gau gau abad mɨdmɨdöp, mɨ in la unbö ajɨp böŋ daŋ. Pen nɨpe mɨlö gau mɨdöm, bɨ abad mɨdep aŋ yagol nɨpe rɨmnap hag lö, am ram mɨnöŋ rɨmnap abad mɨdmɨdal. Bɨ nɨpe Podias Pailod ram mɨnöŋ Judia nɨbi bɨ gau kalɨp abad mɨdmɨdöp. Bɨ nɨpe Herod ram mɨnöŋ Galili nɨbi bɨ gau kalɨp abad mɨdmɨdöp. Herod nɨmam nɨpe Pilip ram mɨnöŋ Iduria nɨbi bɨ gau abe, ram mɨnöŋ Drakonaidis nɨbi bɨ gau abe kalɨp abad mɨdmɨdöp. Bɨ nɨpe Laisenias ram mɨnöŋ Abilini nɨbi bɨ gau kalɨp abad mɨdmɨdöp. Pen magö anɨbu, bɨ ne Anas aip, Kaiapas aip, God nɨp nan sabe gep bɨ kub yabɨƚ mɨhau Jerusalem mɨdailö.

Pen ñɨn aŋ anɨbu, Sekaraia ñɨ nɨpe Jon, nɨbi bɨ iru mɨdagmɨdal, ram mɨnöŋ kabö nöp mɨdmɨdöp aŋ gau han mɨdmɨdöp. Aŋ gau han mɨdö nɨŋöl gɨ, God nɨpe Jon nɨp gasɨ ñö,
ram mɨnöŋ ñɨg Jodan goƚ gau gau ajmɨdöp nɨŋöm nɨbi bɨ gau aulö, kalɨp manö hag ñɨmɨdöp, “Nan si nan naij gɨpim gau, nɨhön gɨnɨg anɨg gɨpun a gɨmim arö gɨmim yɨp aube yad kalöp ñɨg pak ñɨnö, God nan si nan naij gɨpim gau nɨŋöm arö gɨnab,” a gɨmɨdöp. a  Jon kalɨp manö hag ñɨmɨdöp anɨbu, bɨ God manö hagep Aisaia hadame nöp gɨnab a göm, kalɨ kƚiñ rɨka rö nöp ga. Aisaia manö anɨbu kalɨ kƚiñ rɨköm haga,

“Bɨ ap, ram mɨnöŋ nɨbi bɨ iru mɨdagpal, ram mɨnöŋ kabö nöp mɨdöp
aŋ au am mɨdöm, wɨñ alöm hagnab,
‘Bɨ Kub u auab a gɨmim,
nɨp abad mɨdaimim!
Anɨb u, adan sɨr gɨlaŋ gɨyaŋ gɨnɨm gau,
dum goƚ pɨƚu gɨnɨm gau, bɨnɨg ral aij gɨ mɨdaimim.
Anɨb u, mɨnöŋ ban göp gau bɨnɨg ral aij gɨmim,
dum gau bɨnɨg ral aij gɨmim,
adan dudu badu gɨnɨm gau, kabö göl gɨmim,
kabö gau ud yu aij gɨmim mɨdaimim.
Anɨg göl me, nɨbi bɨ gau magöŋhalö nɨŋnaböl,
God nɨpe aigöl göm kalɨp ud kamɨŋ yunab,’ a gɨnab,” a ga. b 
Jon nɨpe Aisaia manö kalɨ kƚiñ rɨka anɨbu rö hag ñö nɨŋöl gɨ, nɨbi bɨ iru nöp nɨpe mɨdeia au apöm hagla, “Hanɨp ñɨg pak ñɨmön,” a gɨla. Jon kalɨp sɨƚɨk hag göm haga, “Kale haiŋo ñɨ pai gai i! Gasɨ nɨhön nɨŋmim pɨñɨŋ gɨ aubimŋ ‘Ñɨg pakno, God nɨbi bɨ rɨmnap kalɨp hag gɨnab ñɨn u, hanɨp hag gagnab,’ a gɨmim, pɨñɨŋ gɨ aubim ar? c  Kale ñɨg paknɨg gɨnabim u, nan si nan naij gɨpim gau nɨhön gɨnɨg anɨg gɨpun, a gɨmim, arö gɨmim, mɨd aij gɨmim. Anɨg gɨpe me, nɨbi bɨ nɨŋnaböl, kale nan si nan naij gɨmɨdim gau arö gɨpim. Pen kale gasɨ ap nɨŋmim, ‘Hon bac iƚaŋ Ebraham ñɨ pai nɨpe mɨdpun,’ a gɨmim, gasɨ u nɨŋagmim. Hon Ebraham ñɨ pai nɨpe a gɨpim u nan yɨharɨŋ! God kabö gai i udöm, Ebraham ñɨ pai nɨpe gau gɨ lɨnɨg göm, gɨ lɨböp! d  Nɨŋ aij gɨmim! God mab u iƚ halö rɨb junɨg, ru u mab iƚ yaŋ kɨd gɨ mɨdöp. Mab au, magö ñɨŋeb aij rɨmnap pɨlagnab u, rɨb gɨ dö gɨ ud mab inab yaŋ yunab,” a ga. e 

10 Jon manö anɨbu rö hagö, kale nɨp pen hag nɨŋöm hagla, “Hon nɨhön gun, a gɨmön, anɨg hagpan?” ö gɨla. Haglö, Jon kalɨp haga,

11 “Nɨbi bɨ sior mɨhöp mɨdainɨm u, ap nɨbi bɨ sior mɨdagainɨm gau kalɨp ñöl. Pen nɨbi bɨ nan magö mɨdainɨm u, nɨbi bɨ nan magö mɨdagainɨm gau kalɨp rɨmnap ñöl,” a ga.

12 Pen bɨ dakɨs udep gau, Jon hanɨp ñɨg pak ñaŋ a göm, apöm nɨp hag nɨŋöm hagla, “Manö hag ñeb bɨ, hon nɨhön gun?” ö gɨla. f 

13 Hageila, kalɨp haga, “Dakɨs u udnɨg gɨmim, gapman hagpal rö nöp udmim. Yɨharɨŋ rɨmnap udagmim,” a ga.

14 Pen ami bɨ rɨmnap Jon nɨp manö anɨbu rö nöp hag nɨŋöm hagla, “Hon nɨhön gun?” ö gɨla.

Hageila, kalɨp haga, “Kale manö piral hagmim nɨbi bɨ gau mani kalɨp si udagmim. Manö piral hagmim nɨbi bɨ gau manö kub hagagmim. Wög pe udnabim u ap halö udun, a gɨmim, gasɨ u nɨŋagmim,” a ga.

15 Pen anɨg göm mɨd damöm nɨbi bɨ gau gasɨ adö ap nɨŋöm hagla, “Bɨ anɨbi Krais pör abad mɨdpun u rö löp,” a gɨla. 16 Hageila, nɨpe manö anɨbu nɨŋöm kalɨp pen haga, “Wasö! Yad kalöp yɨharɨŋ ñɨg nöp pak ñabin, pen yɨp hain aunab bɨ u, nɨpe yad rö wasö; nɨpe bɨ kub yabɨƚ, yad bɨ pro. Yad nɨp nɨŋnö nable gɨnab. Ma rɨrup nɨpe u nagɨ ud hubɨknam rö lagöp,” a ga. Bɨ anɨbu nɨpe apöm, kalöp Ana Uɫ u nöp pak ñöm, mab mɨɫaŋ pak ñöm gɨnab. g  17 “Nɨpe wid magö po gö, rɨk dap pakpal rö u gɨnɨg gab. Wid magö ñɨŋeb gau ke löm, wid cög naböŋ naböŋ gau ke löm gɨnab. Anɨg göm, wid magö ñɨŋeb gau dam ram raul mɨgan nɨpe lɨnab; pen naböŋ naböŋ gau dam mab pör inmɨdöp u launab,” a ga.

Herod Jon nɨp nagɨ la

18 Jon, nɨbi bɨ gau kalɨp God manö aij u rɨmnap halö hag ñɨnö nɨŋ aij gɨlaŋ, a göm, kalɨp manö aij anɨbu rö pro hagagmɨdöp. 19 Pen gapman bɨ kub Herod, nan si nan naij gau gɨ damöm, hainö nɨmam Pilip nɨbin nɨpe Herodias nɨp ud gö, Jon u aij gagöp, a ga. h  20 Jon manö anɨg hagö, Herod nɨŋöm, naij ga adö ap halö göm, Jon nɨp dam nagɨ la.

Jon Jisas nɨp ñɨg pak ña

(Mad 3:13-17; Mak 1:9-11)

21 Pen Herod Jon nɨp nagɨ laga magö u, nɨpe nɨbi bɨ gau kalɨp ñɨg pak ñɨmɨdöp. Jisas nɨp abe ñɨg pak ña. Jisas nɨp ñɨg pak ñö, nɨpe Nap God nɨp sabe gɨ mɨdö nɨŋöl gɨ, kumi kabö adö laŋ au ƚɨƚɨ gɨ gau gau arö, ajöŋ hiɨkö, Ana Uɫ u yaur dapo rö halu löm, Jisas nɨp u gɨ aua. Anɨg göl auö nɨŋöl gɨ, manö ap kumi kabö adö laŋ au nɨbö apöm haga, “Ne Ñɨ mɨdmagö yad yabɨƚ. Nöp nɨŋnö, yɨp aij yabɨƚ göp,” a ga. i 

Jisas nɨhi bɨ

(Mad 1:1-17)

23 Pen Jisas mɨ nɨpe unbö ñɨnjuöl añɨ ap ado gɨ da unbö sɨduŋ laŋ (30) arö nɨŋöl gɨ, nɨpe iƚ göm nɨbi bɨ gau kalɨp God Manö hag ña. Nɨbi bɨ gau Jisas nɨp, nap nɨpe u bɨ ne Josep, a gɨ gasɨ nɨŋla.

  • Josep nap nɨpe u Heli. j 
24 
  • Heli nap nɨpe u Madad.
  • Madad nap nɨpe u Lipai.
  • Lipai nap nɨpe u Melkai.
  • Melkai nap nɨpe u Janai.
  • Janai nap nɨpe u Josep.
  • 25 
  • Josep nap nɨpe u Madadaias.
  • Madadaias nap nɨpe u Emos.
  • Emos nap nɨpe u Neham.
  • Neham nap nɨpe u Esli.
  • Esli nap nɨpe u Nagai.
  • 26 
  • Nagai nap nɨpe u Mead.
  • Mead nap nɨpe u Madadaias.
  • Madadaias nap nɨpe u Semein.
  • Semein nap nɨpe u Josek.
  • Josek nap nɨpe u Joda.
  • 27 
  • Joda nap nɨpe u Joanan.
  • Joanan nap nɨpe u Resa.
  • Resa nap nɨpe u Serababel.
  • Serababel nap nɨpe u Sialdiel.
  • Sialdiel nap nɨpe u Nerai.
  • 28 
  • Nerai nap nɨpe u Melkai.
  • Melkai nap nɨpe u Adai.
  • Adai nap nɨpe u Kosam.
  • Kosam nap nɨpe u Elmadam.
  • Elmadam nap nɨpe u Er.
  • 29 
  • Er nap nɨpe u Josua.
  • Josua nap nɨpe u Eliesa.
  • Eliesa nap nɨpe u Jorim.
  • Jorim nap nɨpe u Madad.
  • Madad nap nɨpe u Lipai.
  • 30 
  • Lipai nap nɨpe u Simion.
  • Simion nap nɨpe u Juda.
  • Juda nap nɨpe u Josep.
  • Josep nap nɨpe u Jonam.
  • Jonam nap nɨpe u Eliakim.
  • 31 
  • Eliakim nap nɨpe u Melea.
  • Melea nap nɨpe u Mena.
  • Mena nap nɨpe u Madada.
  • Madada nap nɨpe u Nadam.
  • Nadam nap nɨpe u Depid.
  • 32 
  • Depid nap nɨpe u Jesi.
  • Jesi nap nɨpe u Obed.
  • Obed nap nɨpe u Boas.
  • Boas nap nɨpe u Salmon.
  • Salmon nap nɨpe u Nason. k 
  • 33 
  • Nason nap nɨpe u Aminadap.
  • Aminadap nap nɨpe u Admin.
  • Admin nap nɨpe u Arni.
  • Arni nap nɨpe u Hesron.
  • Hesron nap nɨpe u Peres.
  • Peres nap nɨpe u Juda.
  • 34 
  • Juda nap nɨpe u Jekop.
  • Jekop nap nɨpe u Aisak.
  • Aisak nap nɨpe u Ebraham.
  • Ebraham nap nɨpe u Dera.
  • Dera nap nɨpe u Nahor.
  • Nahor nap nɨpe u Seruk.
  • 35 
  • Seruk nap nɨpe u Rehu.
  • Rehu nap nɨpe u Pelek.
  • Pelek nap nɨpe u Eber.
  • Eber nap nɨpe u Sela.
  • 36 
  • Sela nap nɨpe u Kenam.
  • Kenam nap nɨpe u Apaksad.
  • Apaksad nap nɨpe u Sem.
  • Sem nap nɨpe u Noa.
  • Noa nap nɨpe u Lemek. l 
  • 37 
  • Lemek nap nɨpe u Medusela.
  • Medusela nap nɨpe u Inok.
  • Inok nap nɨpe u Jared.
  • Jared nap nɨpe u Malelael.
  • Malelael nap nɨpe u Kenan.
  • 38  Kenan nap nɨpe u Inos. Inos nap nɨpe u Sed. Sed nap nɨpe u Adam. Adam nap nɨpe u God. 3:38 Jen 4:25-26
    Copyright information for `KPW