Matthew 23

Lo manö hag ñeb bɨ gau abe, bɨ Perisi gau abe gɨpal rö gagmim, a ga

(Mak 12:38-39; Luk 11:43,46; 20:45-46)

Hainö ñɨn ap, Jisas bɨ nɨpe gau abe, nɨbi bɨ rɨmnap abe, kalɨp manö hagöm haga, “Lo manö hag ñeb bɨ gau abe, bɨ Perisi gau abe, Mosɨs ka nɨpe u udöm, God lo manö Mosɨs hadame nöp kalɨ kƚiñ rɨka rö hag ñɨbal. Anɨb u, bɨ anɨb gau kale God lo manö nɨhön hagöl u nɨŋ udmim hain gɨmim; pen nagɨ kale göl adö u nɨŋmim, hain gagmim. God lo manö hag ñɨbal u pen kale ke manö anɨbu hain gagpal. a  Nan gau gɨmim, nan gau gagmim a gɨpal u, manö iru yabɨƚ nöp hagpal. Kale hagpal anɨbu, wadɨ marö kub yabɨƚ u rö, nɨbi bɨ gau kalɨp gam ñɨbal u, pen kalɨp mög nɨŋöm, rɨmnap ud asɨk gagpal. Nɨbi bɨ gau hanɨp nöp nɨŋlaŋ, a göm, God Manö kalɨ kƚiñ rɨkla manö rɨmnap ud nable cög adö laŋ abe, ñɨmagö gau abe lɨ rɨbɨköm ajpal. Hon God bɨ nɨpe me gau, a gɨlaŋ, a göm, waƚɨj mɨlö kub nagɨ adɨŋ halö aij gau rol gɨpal. b  Kale nan kub ñɨŋeb aŋ u amöm aka Juda magum gep ram gau amöm, bɨ kub mab po asɨkpal adö u nöp asɨkpal. Gasɨ kale nɨŋbal u, nɨbi bɨ iru mɨdpal aŋ gau arno, ‘Manö hag ñeb bɨ kub auabön e!’ gɨlö, hanɨp aij gɨnab, a göm, nɨŋbal.

“Pen kale mam iƚ añɨ mɨdpim rö, kalöp, ‘Hag ñeb bɨ kub yad,’ a göm hagagöl. Hag Ñeb Bɨ Kub kale añɨ ap nöp mɨdöp. Mɨnöŋ naböŋ iƚ i bɨ ap, ‘Bapi bɨ kub yad,’ a gɨmim hagagmim. Nap kale añɨ ap nöp mɨdöp ram mɨnöŋ kumi kabö adö laŋ au. 10 Kale u rö nöp, ‘Bɨ nabɨc bɨ kub yad,’ a göm hagagöl. Bɨ nabɨc bɨ kub kale añɨ ap nöp, Mesaia u nöp mɨdöp. 11 Kale aŋ au, nɨbi bɨ an nɨpe nɨbi bɨ kub rö mɨdainɨm, nɨpe nɨbi bɨ wög gɨ ñeb rö mɨdnab. c  12 Nɨbi bɨ hib kale ke haglö adö arnab gau, hib kale lugnab; pen nɨbi bɨ hib kale ke haglö adö aragnab gau, hainö hib kub yabɨƚ mɨdeinab. d 

Lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ

(Mak 12:40; Luk 11:39-42,44,52; 20:47)

13 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Kale ke God nɨbi bɨ udöm kumi kabö adö laŋ au abad mɨdeinab mɨgan u aragmim, nɨbi bɨ arnɨg gɨpal gau kalɨp adan rɨkpim.

14 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Kale nɨbi paƚpaƚ ram halö si udpim. Anɨbu pen, nɨbi bɨ hanɨp nɨŋöl, a gɨmim, God nɨp manö mɨlö kub piral gau nöp hagpim. Gɨpim anɨbu me, ilön kub yabɨƚ udnabim.

15 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Nɨbi bɨ gau manö hanɨp u nɨŋöm hain gɨlaŋ, a gɨmim, ram mɨnöŋ mɨlö gau uƚhai nɨŋ ajmim, rɨmnap nɨŋmim hag ñɨbe, kale ke Seden bɨ nɨpe mɨdpim rö wasö, kale Seden nɨbi bɨ nɨpe yɨjɨg göl yabɨƚ lɨnaböl.

16 “Nɨbi bɨ gau kalɨp God adan la u yam aij gɨpun, a gɨpim u, pen kale bɨ amgö we u me, kale ke nɨŋagpim! Anɨg gɨpim anɨbu, manö kub yabɨƚ mɨdöp. Nɨbi bɨ gau kalɨp manö pir almim hagpim, ‘Hon, “God sabe gep ram mɨdöp rö, nɨŋö hagabun,” a gɨnabun u, hainö arö gun, a gɨnabun u, arö gɨnabun. Pen gol udöm, nan God sabe gep ram raul yaŋ gɨla gau, hib anɨbu hagöl gɨ, “Nɨŋö hagabun,” a gɨnabun u, hagnabun rö nöp gɨnabun me; arö gagnabun,’ a gɨpim. e  17 Kale bɨ amgö we, bɨ hauƚ! Kale gasɨ nɨhön nɨŋbim: gol u nan yabɨƚ aka God sabe gep ram uɫ u nan yabɨƚŋ Nan yabɨƚ me, God sabe gep ram uɫ nɨpe u. Ram uɫ mɨdeinab u, nan ram raul mɨdöp abe uɫ mɨdeinab me.

18 Manö ap u rö nöp, nɨbi bɨ gau kalɨp manö pir almim hagpim, ‘Hon, “God kabö bɨd nɨpe mɨdöp rö nɨŋö hagabun,” a gɨnabun u, manö nɨŋö hagnabun u nan yɨharɨŋ; hainö gasɨ ap nɨŋun, arö gun, a gɨnabun u, arö gɨnabun. Pen, nan God kabö bɨd adö au God nɨp pak sabe gɨ ñɨbal gau, hib anɨbu hagöl gɨ, “Nɨŋö hagabun,” a gɨnabun u, hainö gasɨ ke ap nɨŋun ke gun rö lagnab; hagnabun rö nöp gɨnabun,’ a gɨpim. 19 Kale bɨ gasɨ rɨmɨd lagöp gau, nan nɨhön u nan kubŋ Nan God nɨp pak sabe gɨ ñɨbal nan u, aka kabö bɨd adö au sabe gɨ ñɨbal uŋ Nan yabɨƚ me, kabö bɨd u. Kabö bɨd adö au mɨdeinab u me, nan anɨbu nan God nɨp ñeb rö lɨnab. 20 Pen ‘Kabö bɨd mɨdöp rö, nɨŋö hagabun,’ a gɨnaböl u, bɨd adö anɨbu nan dap laumɨdal halö hagnaböl. 21 Pen ‘God sabe gep ram mɨdöp rö, nɨŋö hagabun,’ a gɨnaböl u, u God ram nɨpe nɨŋöm God hib nɨpe halö hagnaböl. 22 ‘Kumi kabö adö laŋ mɨdöp rö, nɨŋö hagabun,’ a gɨnaböl u, God sea kiŋ asɨk mɨdöp au nɨŋöm sea kiŋ anɨbu abe, God sea kiŋ anɨbu asɨk mɨdöp u abe mɨdöp rö, nɨŋö hagabun a gɨnaböl. f 

23 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Manö nɨbi bɨ rɨmnap kalɨp hagpim adö u kale ke gagpim. Kamöŋ asɨ, nan haƚöwaƚö wög adɨŋ ranöb u nɨŋbe, nan yabɨƚ rö lö, wö ralbe, am sɨduŋ laŋ arö, God nɨp añɨ ap ñun, a gɨmim, pör nan kale God nɨp ñɨbim. Nan pro pro anɨbu rö pör anɨg gɨpim, pen nɨhön gɨnɨg manö iƚ yabɨƚ u anɨg gagpimŋ Nɨbi bɨ gau kalɨp naij gɨnɨm nagɨ adö u gagmim; kabö rö gɨnɨm adö u gɨmim. Kalɨp mög nɨŋmim, ud aij gɨmim. Gɨnabun a gɨmim, gɨmim. g  24 Nɨbi bɨ gau kalöp adan yamun, a gɨpim, pen kale ke bɨ amgö we. Nan pro pro gau nɨŋbe, nan yabɨƚ rö löp, pen nan kub nan hib waiö mɨdöp gau nɨŋagpim.

25 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Pler kap kale gau rö, höŋ adö gau ñɨg lɨ yu aij gɨpim u, pen aŋ yaŋ nan si nan naij prɨ u ajmaŋ rauöm mɨdöp. Hon nan iru udun, a gɨmim, hañ romaŋ hon ke gɨ aij gun, a gɨpim. h  26 Kale Perisi bɨ gau gasɨ rɨmɨd lagöp. Pler kap kale aŋ yaŋ ñɨg lɨ yu aij gɨbep, höŋ adö gau u rö nöp mɨd aij gɨböp.

27 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Wip kabö mɨgan gau rɨgöl göm, ajöŋ pɨƚ göm, ped rud mailö aij gö, nɨbi bɨ gau nɨŋlö, aij göp, pen mɨgan aŋ yaŋ wip le haƚɨŋ naij apöl gɨ mɨdöp; kale unbö rö nöp mɨdpim. i  28 Kale unbö rö nöp, höŋ adö hañ romaŋ nɨŋbun u, kale bɨ aij rö löp u, pen kalöp aŋ yaŋ, manö piral gau abe, nan si nan naij gau abe, prɨ u ajmaŋ rauöm mɨdöp. j 

God kalöp pen gɨ naij gɨnab, a ga

(Luk 11:47-51)

29 “Kale God lo manö hag ñeb bɨ gau abe, bɨ Perisi gau abe, kale manö pir alöm gɨ naij gep bɨ. God kalöp gɨ naij gɨnab. Bɨ God manö hagep hadame nöp allö rɨgöl gɨla uƚöm ka adö u rɨb adɨk gɨ aij göl gɨ hagpim, 30 ‘Apɨs bac bɨ gɨla rö u, hon God manö hagep bɨ gau kalɨp al pakagbnop,’ a gɨpim. 31 Pen hagpim anɨbu, bɨ God manö hagep gau kalɨp al pak lɨmɨdal iƚ u me, hon mɨdpun, a gɨmim, hagpim. k  32 Anɨb u, apɨs bac bɨ gɨ naij gɨla u rö, kale u rö nöp gɨnabun, a gɨmim u, u rö nöp gɨmim! 33 Kale haiŋo ñɨ pai gai i. Hainö God nɨbi bɨ manö kub hagöm, mab ke inab yaŋ yunab ñɨn u, kale aigö gɨmim pɨñɨŋ gɨ ke gau arnabimŋ Wasö yabɨƚ. Adan kale ap mɨdageinab. l 

34 “Anɨb u, yad kalöp hagabin, yad bɨ God manö hagep rɨmnap, bɨ gasɨ kɨd hiɨk nɨŋeb rɨmnap, bɨ manö hag ñeb rɨmnap yunö, kalöp aueinaböl, rɨmnap al pak lɨnabim, rɨmnap mab ba laŋ al pak lɨnabim, rɨmnap Juda magum gep ram raul mɨgan kale u paknabim, rɨmnap pɨñɨŋ gɨ arlö nɨŋöl gɨ, ram mɨnöŋ gau gau rɨdɨk gɨ yunabim. 35 Anɨb u me, God nɨbi bɨ kamɨŋ aij nɨpe gau, hadame nöp allö auöp i rö, manö marö u udnabim. Adam ñɨ nɨpe, gɨ aij nöp gɨmɨdöp bɨ u, Ebol nɨp nöd iƚ göm al pak löm, al dapöm, al dapöm, hainö Berekaia ñɨ nɨpe Sekaraia nɨp, God nɨp sabe gep ram au daŋ, kabö ud gɨla bɨd au daŋ mɨdö nɨŋöl gɨ, nɨp aŋ au al pak lɨla. m  36 Yad kalöp nɨŋö yabɨƚ hagabin: nan gɨpim anɨbu, manö anɨbu kalöp mɨñi mɨdpim gai i ado gɨ aunab.

Jisas Jerusalem nɨŋö, mög gö, mɨɫöŋ ga

(Luk 13:34-35)

37 “Jerusalem nɨbi bɨ, nɨbi bɨ mög gep rö yad gai i. Bɨ God manö hagep God kalɨp yua bɨ gau, ram mɨnöŋ kalöp u aulö, kabö jumim pör nöp al pak lɨbim. Yad kalöp kɨƚakɨƚ nɨme pi gau gɨpal rö, dam auan mo yad gau lɨnam a gɨ lɨbin u pen yɨp nɨŋmim arö gɨpim. 38 God nɨpe God sabe gep ram kale u arɨk ara; cög nöp mɨdöp. n  39 Uri yɨp nɨŋagnabim; hainö, ‘God bɨ hanɨp a göm yua bɨ i, aij yabɨƚ auab,’ a gɨmim, ñɨn anɨbu nöp, yad kauyaŋ nɨŋnabim,” a ga. o 

Copyright information for `KPW