Revelation of John 2

Krais nɨbi bɨ nɨpe Epesas mɨdmɨdal manö hag ñeb

“Pen daun kub Epesas Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön:

  • ‘Bɨ gapɨ unbö mudun jɨŋ ñɨmagö yɨjɨg böŋ lau nɨpe adö u udöl gɨ, ƚam gol udöm gɨla unbö mudun jɨŋ aŋ au ajöp u, Epesas nɨbi bɨ abad mɨdpan gau kalɨp manö anɨbi hag yuöp. a 
  • Nɨpe hagöp,
  • “Kal wög kƚö gɨmim gɨ dammim bɨsƚam mɨdmim, jɨ nɨŋagpim u, nɨŋbin. Nɨbi bɨ gɨ naij gɨpal gau kalɨp nɨŋbe, kalöp aij gagöp. Bɨ Jisas manö ud arep mɨdpun, a göm, manö piral hagpal gau kalɨp nɨŋ aij gɨmim, asɨ masɨ gɨpim. b 
Yɨp nɨŋ udmim manö yad hagpe kalöp marö ñɨlö, jɨ nɨŋagmim, yad aip cɨg göl gɨ nöp mɨdpim u, yɨp aij göp.
  • “Pen yad manö ap mɨdöp. Yad aip nöd cɨg gɨmim mɨdmagö yabɨƚ lɨ mɨdaibe nagɨ adö u dam yubim gai?
Nöd yɨp mɨdmagö lɨ mɨdmim gɨ aij gɨpe nagɨ aij anɨbu, nɨhön gɨnɨg arö gɨpun a gɨmim kuöyaŋ udmim, nöd mɨd aij gɨmɨdim rö mɨdaimim. Wasö u, yad apem ƚam kale u pɨƚɨ gɨ udnabin. c 
  • “Pen adö ap gɨpim u, yɨp aij göp. Nɨbi bɨ kale bɨ Nikolas manö piral nɨpe u udöm, nagɨ naij adö u gɨlö yɨp aij gagöp rö, kalöp u rö nöp aij gagöp.
  • “Kale nɨbi bɨ gasɨ rɨmɨd mɨdainɨm gau, God Ana nɨpe Krais nɨbi bɨ nɨpe mɨdpal ram mɨnöŋ ke ke gau kalɨp manö hagöp u nɨŋ aij gɨmim.
  • Nɨbi bɨ marö auö, gasɨ iru nɨŋagöm, yɨp cɨg göl gɨ nöp mɨdeinaböl gau, ñɨn hain aunab u kalɨp hagnö, mab magö ur pör mɨdep God wög naböŋ aij nɨpe adö laŋ ranab u udöm ñɨŋnaböl,” a göp,’ a gɨmön. d 

Krais nɨbi bɨ nɨpe Smöna mɨdmɨdal manö hag ñeb

“Pen daun kub Smöna Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön:

  • ‘Bɨ nɨpe gö, nan gau magöŋhalö iƚ göm mɨdöp u; Bɨ nɨpe gö, nan gau magöŋhalö ur gɨnɨg gɨnab u; Bɨ umöm kauyaŋ uraka u, Smöna nɨbi bɨ abad mɨdpan gau kalɨp manö anɨbi hag yuöp.
  • Nɨpe hagöp,
  • “Yad nɨŋbin, nɨbi bɨ rɨmnap, hon God nɨbi bɨ yɨjɨg göl mɨdpun a gɨpal u pen Seden sabe gep ram nɨpe mɨdöm, kalöp manö udöl gɨ mɨdpal. Marö kalöp nɨhön nɨhön mɨdöp gau, yad u rö nöp nɨŋbin. Kale nɨbi bɨ mög gep rö mɨdpim u pen yad nɨŋbin God amgö ilö adö nɨpe u kale nɨbi bɨ gep yabɨƚ mɨdpim. e 
10 Kalöp marö gɨnɨg gab u, gasɨ kub nɨŋagmim. Nɨŋim! Söl mɨdöp, Krais nɨp cɨg aij gɨpal aka ap lug paknaböl, a göm, Seden gö, kalöp rɨmnap ud nagɨ lɨnaböl. Kalöp ñɨn unbö sɨduŋ laŋ u rö gɨ naij göl gɨ mɨdeinaböl. Pen kalöp nɨhön nɨhön göm, böŋ nöp al pak lɨnɨg geinaböl u, gasɨ kub anɨbu nɨŋagmim. Yɨp cɨg göl gɨ nöp mɨdpe al pak leinaböl u, kalöp usajɨl bad pör kamɨŋ mɨdep u ñɨnabin. f  11 
  • Kale nɨbi bɨ gasɨ rɨmɨd mɨdainɨm gau, God Ana nɨpe Krais nɨbi bɨ nɨpe mɨdpal ram mɨnöŋ ke ke gau kalɨp manö hagöp u nɨŋ aij gɨmim.
  • Seden kalöp neb neb gɨnab u pen nɨbi bɨ yɨp cɨg göl gɨ nöp mɨdeinaböl gau, ilön kub udöm umla rö u kuöyaŋ umagnaböl,” a göp,’ a gɨmön. g 

Krais nɨbi bɨ nɨpe Pegamam mɨdmɨdal manö hag ñeb

12 “Pen daun kub Pegamam Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön:

  • ‘Bɨ ru mɨlö kɨd nɨpe goƚ goƚ kɨd mɨdöp u, Pegamam nɨbi bɨ abad mɨdpan gau kalɨp manö anɨbi hag yuöp.
13 
  • Nɨpe hagöp,
  • “Yad nɨŋbin, kale bɨsƚam yabɨƚ mɨdpim. Nɨbi bɨ ram mɨnöŋ kale mɨdpim aŋ au, Seden kiŋ rö abad mɨdöp. Pen kale manö yad nɨŋ ud aij gɨmim, yɨp cɨg aij göl gɨ mɨdpim. Ram mɨnöŋ Seden abad mɨdöp anɨbu, namam Adipas manö aij yad u nɨbi bɨ gau kalɨp hag ñɨ mɨdö, nɨp al pak lɨla u pen yɨp arö gagpe.
14 
  • Pen manö rɨmnap mɨdöp. Nɨbi bɨ kale rɨmnap, Belam manö hag ñɨmɨdöp rö hag ñɨbal. Bɨ Belam anɨbu, Belak nɨp rɨmɨd ukö me, Belak nɨpe am Isrel nɨbi bɨ gau kalɨp ɫɨp gɨ ud arö, kale yɨp arö göm, nan ñɨŋeb nan yɨharɨŋ god piral gau nɨp pak sabe gɨ ñeila u ñɨŋla. Belak Isrel nɨbi bɨ kalɨp hagö, kale nɨbi si bɨ si gɨla. h 
15 Isrel nɨbi bɨ hadame gau gɨla rö, kale rɨmnap bɨ Nikolas manö piral nɨpe u udmim, nagɨ naij adö nɨpe u hain gɨmim gɨpe aröp. 16 Anɨb u, nan si nan naij gɨpim u, nɨhön gɨnɨg anɨg gɨpun a gɨmim, arö gɨmim. Pen anɨg gagnabim u, yad söl yɨŋɨd apem, ru mɨlö kɨd meg mɨgan yad yaŋ nɨbö amjaköp u udem, nɨbi bɨ anɨg gɨpal gau aip pen pen gɨnabin. i  17 
  • Kale nɨbi bɨ gasɨ rɨmɨd mɨdainɨm gau, God Ana nɨpe Krais nɨbi bɨ nɨpe mɨdpal ram mɨnöŋ ke ke gau kalɨp manö hagöp u nɨŋ aij gɨmim.
  • Seden kalöp neb neb gɨnab u pen nɨbi bɨ yɨp cɨg göl gɨ nöp mɨdeinaböl gau, yad nan ñɨŋeb mana pi gɨla u rɨmnap ñɨnö ñɨŋnaböl. Pen kalɨp kabö rud ke ke ñɨnabin. Kabö ñɨnabin adö anɨb gau, hib gɨsön nɨbö u rɨk ke ke añɨ añɨ ñeinabin, nɨbi bɨ udnaböl gau nöp nɨŋnaböl,” a göp,’ a gɨmön. j 

Krais nɨbi bɨ nɨpe Daiadaira mɨdmɨdal manö hag ñeb

18 “Pen daun kub Daiadaira Krais nɨbi bɨ nɨpe mɨdpal gau, ejol kalɨp abad mɨdöp u nɨp manö kalɨ kƚiñ rɨkmön hagmön:

  • ‘God Ñɨ nɨpe, amgö mab mɨɫaŋ rö mɨdö nɨŋöl gɨ, ma kɨd nɨpe u, kapa bras a gɨpal u laulö in kɨƚɨd udöp rö mɨdöp u, Daiadaira nɨbi bɨ abad mɨdpan gau kalɨp manö anɨbi hag yuöp. k 
19 
  • Nɨpe hagöp,
  • “Kale gɨpim nagɨ adö u, yad nɨŋbin. Yɨp abe, nɨbi bɨ gau kalɨp abe mɨdmagö lɨmim, kƚö gɨmim yɨp wög göl gɨ nöp mɨdpim u, yad nɨŋbin. Añ mam gau pen pen ud aij gɨmim, gɨ ñɨmim, marö auö bɨsƚam mɨdmim gasɨ iru nɨŋagpim u, yad nɨŋbin. Gɨpim anɨbu, nöd pro pro gɨmɨdim u pen mɨñi rapɨn gɨpim u, yad nɨŋbin.
20 
  • Pen manö ap mɨdöp. Nɨbi Jesebel u hag yuagpim. Manö piral hagöm, yad nɨbi God manö hagep mɨdpin a göp. Nɨbi bɨ yɨp nɨŋ udpal gau kalɨp manö piral hag ñöm, ɫɨp gɨ ud arö, kale yɨp arö göm, nɨbi si bɨ si gɨpal. Nɨpe kalɨp hagö, nan ñɨŋeb nan yɨharɨŋ god piral gau nɨp pak sabe gɨ ñɨmɨdal u ñɨŋbal. l 
21 Nɨpe nagɨ naij adö anɨbu arö göm mɨd aij gɨnɨm aka gem, nɨŋ mɨd wasö nɨŋem arö gɨpin. 22 Anɨg göp rö yad nɨp abañ adö au yunö, nɨp mɨña kub gö, ilön kub yabɨƚ udnab. Nɨbi bɨ nɨpe aip nɨbi si bɨ si gɨpal anɨb gau, nan si nan naij gɨpun u nɨhön gɨnɨg anɨg gɨpun a göm arö gagnaböl u, kalɨp u rö nöp gɨnö, mɨña kub gö, ilön kub yabɨƚ udnaböl. 23 Nɨbi bɨ nɨp hain gɨpal gau kalɨp böŋ nöp al pak leinabin me, nɨbi bɨ yad ram mɨnöŋ ke ke cöc ke ke mɨdpal gau, yɨp nɨŋ aij göm nɨŋnaböl, yad nɨbi bɨ gasɨ rɨmɨd aŋ kale yaŋ nɨŋ aij gem, magöŋhalö gɨpim rö nɨŋem, kalöp añɨ añɨ pen anɨbu rö ñɨnabin. m  24 Pen kale Daiadaira nɨbi bɨ rɨmnap, nɨbi anɨbu manö naij hag ñöb manö u udagmim, Seden manö naij yuö a gɨpal manö u udagpim rö, manö marö kalöp rɨmnap hagagnabin. 25 Pen yɨp nɨŋ udmim cɨg aij gɨpim nagɨ u ud sɨsɨ göl gɨ mɨdpe mɨdpe, hainö yad nɨnam! n  26 
  • Nɨbi bɨ yɨp cɨg aij göl gɨ nöp mɨd damöm, mɨŋör auö yɨp arö gagnaböl gau, yad kalɨp hagnö, nɨbi bɨ ram mɨnöŋ ke ke gau kalɨp abad mɨdeinaböl. o 
27 Nɨhön gɨnɨg: Bapi manö ap yɨp hagöm haga, ‘Yad hagnö, ain ilöŋ ap udöm, rin cög gau pa jö ma jö gɨpal rö, nɨbi bɨ ram mɨnöŋ ke ke gau kƚö naij yabɨƚ göm kalɨp abad mɨdeinab,’ a ga. 28 
  • Pen nɨbi bɨ yɨp nɨŋ udöm cɨg aij göm nagɨ u ud sɨsɨ göl gɨ mɨdeinaböl gau, kalɨp gapɨ pagƚɨn aij ram mɨnöŋ jɨn parɨkö nɨŋöl gɨ nɨŋbal rö u ñɨnabin. p 
29 
  • Kale nɨbi bɨ gasɨ rɨmɨd mɨdainɨm gau, God Ana nɨpe Krais nɨbi bɨ nɨpe mɨdpal ram mɨnöŋ ke ke gau kalɨp manö hagöp u nɨŋ aij gɨmim,” a göp,’ a gɨmön,” a ga.
Copyright information for `KPW