a5:1Ais 29:11; Esi 2:9-10
b5:5Jen 49:9; Ais 11:1,10; Rep 22:16
d5:8Rep 8:3-4; Sam 141:2
e5:9Sam 33:3; 40:3; 96:1; 98:1
f5:10Eks 19:6; Ais 61:6; Rep 1:6; 20:6
g5:11Dan 7:10; Hib 12:22

Revelation of John 5

Jon köp nagɨ la ap nɨŋa

Pen naböŋ nɨŋ damem nɨŋnö, bɨ sea kiŋ adö u asɨk mɨdeia u, köp mɨlö kub naböŋ naböŋ wamla ap ñɨmagö yɨjɨg nɨpe lau adö udöl mɨdeia. Köp anɨbu, höŋ adö gau kalɨ kƚiñ rɨköm, raul yaŋ kalɨ kƚiñ rɨköm gɨla. Pen naböŋ naböŋ wamöm, nagɨ ke ke unbö mudun jɨŋ u adɨk aij yabɨƚ gɨla. a  Pen yad nɨŋnö, God ejol kƚö yabɨƚ ap wɨñ kub alöm haga, “Nɨbi bɨ an rö nagɨ lɨla i hubɨköm, köp anɨb i pɨƚai gɨnɨm rö löp?” ö ga. Anɨg haga u pen kumi kabö adö laŋ au abe, mɨnöŋ naböŋ iƚ i abe, mɨnöŋ yuö yaŋ abe, nɨbi bɨ köp anɨbu nagɨ ud ju pɨlainɨm rö ap mɨdageia. Kumi kabö adö laŋ au abe, mɨnöŋ naböŋ iƚ i abe, mɨnöŋ yuö yaŋ abe, nɨbi bɨ köp anɨbu nagɨ ud ju pɨlai gɨnɨm rö la ap uƚhai nɨŋagla rö, yad mög yabɨƚ gö mɨɫöŋ göl gɨ mɨdainö. Pen bɨ kub manö ud asɨkep mɨdeila gau ap yɨp haga, “Ne mɨɫöŋ gagmön. Nöŋ! Laiön Juda nɨbö u kiŋ Depid rɨkö rɨk dam dapɨl gɨlö, nɨp yag daula. Nɨpe kauaƚ mauaƚ nɨpe u rɨdɨk gɨ yua u me, köp anɨbu nagɨ ud ju pɨlai gɨnɨm rö löp,” a ga. b 

Jon Sipsip Pi u nɨŋa

Anɨg hagö nɨŋöl gɨ nɨŋnö, Sipsip Pi al pak lɨlö umöm uraka rö ap, sea kiŋ aŋ au mɨdeia. Nan kamɨŋ mɨdöp ke ke mɨhau mɨhau abe, bɨ kub manö ud asɨkep gau abe, mɨd gɨgabö gɨla. Sipsip Pi anɨbu kom unbö mudun jɨŋ u, amgö unbö mudun jɨŋ u la. Amgö unbö mudun jɨŋ la manö iƚ u, God nɨpe Ana nɨpe unbö mudun jɨŋ u yuö, ram mɨnöŋ gau magöŋhalö kɨd kɨd aröp. c  Pen Sipsip Pi u Bɨ sea kiŋ asɨk mɨdeia iƚ au amöm, köp ñɨn yɨjɨg nɨpe lau adö udöl mɨdeia u uda. Udö nɨŋöl gɨ, nan kamɨŋ mɨhau mɨhau abe, bɨ kub manö ud asɨkep unbö ñɨn juöl ado gɨ da mɨhau mɨhau (24) abe apöm, mɨdeia au kugom yɨmla. Bɨ kub manö ud asɨkep anɨb gau kale nan gida rö gau ke ke udöm, kɨnaŋ kabö gol udöm gɨla gau ke ke ud mɨdeila. Kɨnaŋ ud mɨdeila mɨgan anɨb gau, nan laulö in hadu göm haƚɨŋ aij auöp u, ajmaŋ rauöm mɨdeia. Nan God nɨp laulö in haƚɨŋ aij auöp anɨbu, God nɨbi bɨ nɨpe gau nɨp sabe gɨpal u. d  Pen kale kɨmap gɨsön nɨbö ap hagöm hagla,

“Nöp al pak lɨlö,
hagape ne lugö,
nɨbi bɨ ram mɨnöŋ ke ke mɨdpal rö,
iƚ ke ke mɨdpal rö,
manö yabɨƚ ke ke hagpal rö,
hañ ke ke löp rö,
ne rauna nɨŋöm
kale God nɨbi bɨ nɨpe mɨdpal.
Anɨb u me, ne nöp köp wam adɨk aij ga anɨbu,
hubɨk pɨƚai gɨ nɨŋmön rö mɨdöp. e 
10 Pen ne gɨna u, kale kiŋ ram rö löm,
God nɨp sabe gep nɨbi bɨ löm, God hon nɨp wög gɨ ñɨbal.
Kale hainö ne aip nɨbi bɨ mɨnöŋ naböŋ iƚ i gau,
kalɨp magöŋhalö abad mɨdeinaböl,” a gɨla. f 

Sipsip Pi u hib nɨpe haglö adö ara

11 Pen naböŋ nɨŋ damem kauyaŋ nɨŋem nɨŋnö, ejol ñɨn juöl ñɨn juöl, dausan dausan iru yabɨƚ nöp manö hageila. Sea kiŋ anɨbu abe, nan kamɨŋ mɨhau mɨhau gau abe, bɨ kub manö ud asɨkep gau abe, kalɨp bɨg gɨgabö gɨ mɨdeila. g  12 Pen meg mɨgan dap ranöm kɨmap hagöl gɨ hagla,

“Sipsip Pi al pak lɨla u, nɨpe aij yabɨƚ.
Nɨpe nan gau magöŋhalö gɨ la, a gun,
hib nɨpe hagno adö araŋ.
Nɨpe nan ap uƚep lagöp, a gun,
hib nɨpe hagno adö araŋ.
Nɨpe gasɨ aij ke yabɨƚ mɨdöp, a gun,
hib nɨpe hagno adö araŋ.
Nɨpe kƚö ke yabɨƚ mɨdöp, a gun,
hib nɨpe hagno adö araŋ.
Nɨpe aij ke yabɨƚ mɨdöp, a gun,
hib nɨpe hagno adö araŋ.
Nɨpe mailö aij ke halö mɨdöp, a gun,
hib nɨpe hagno adö araŋ.
Nɨpe hib ke halö mɨdöp, a gun,
hib nɨpe hagno adö araŋ,” a gɨla.
13 Pen yad nɨŋnö, nan nɨhön nɨhön God gɨ lö ake lab kumi kabö adö laŋ, mɨnöŋ naböŋ iƚ i, mɨnöŋ yuö yaŋ, ñɨg solwara aŋ gau magöŋhalö, kɨmap hagöm hagla,

“Bɨ sea kiŋ bɨs göp u abe,
Sipsip Pi u abe,
kale hib ke halö mɨdpil, a gun,
hib kalpe mɨhau hagno adö araŋ.
Kale aij ke yabɨƚ mɨdpil, a gun,
hib kalpe mɨhau hagno adö araŋ.
Kale mailö aij ke halö mɨdpil, a gun,
hib kalpe mɨhau hagno adö araŋ.
Kale kƚö ke yabɨƚ mɨdpil, a gun,
hib kalpe mɨhau hagno adö araŋ,” a gɨla.
14 Anɨg hageila, nan kamɨŋ mɨhau mɨhau hagla, “Anɨb unbö rö aij,” a gɨla. Anɨg hageila, bɨ kub manö ud asɨkep gau kugom yɨmöm, God Sipsip Pi kalpe mɨhau hib haglö adö ara.

Copyright information for `KPW