1 Timothy 2

Dubumo guliguliaveve deiada

Vasohuta di a namihai. Vani bahata a noinoianiege ata bahata kebiaho noinoianela. Isi a isivi keta loui Dilava namihai vahaehoveta vage. Vatae kosivea isi kosive degomoleau ata nalievemale kebiataho noinoianela. Ige elike nahi kemo tobekai ue dua vaime Dilava igae huhulahai vaveve dua unaha vagei. Ige Dilavana ke elehai vahaehoai. Dilava keike nahi tedaevei nahi malevemale Kosive. Iale keu isiviale ata bahataeau hoto seleve evisi kemo elike uveve dua malei. Dilava keu Dilava seleve igae. Ige Iesu Kelisou dobai lohoaleu ata holisi ata bahatae toelae ibinaho hatai malevei abu Dilavaluvuta igaetoaveve humaha alavonu. Iale Dilavau Iesu hativeve vani ebagemale kemo nahi hilokage au isiviale ata bahataeau ukolikoli malei. Katealemoike Dilavau di hanavoi isiviale di esemuve holisi Diue ata holioholiale kebiaho hoto seleve loui kebia haivege abu evievi ata holisi. Di hoto keu lobo holioholinu. Isito hoto seleveike di ke loui a namihanu.

Di isiviale matama bahata ataeau abu vaveve hoesegevei itumuholisi hotoe toela louholimale keau kome bokoai vata bisi guligulilahagei.

Isi di isiviale keateau atae nimo ogo egete unaha hatuevegei. Isi abu kina bisi onobenobe dua avuemo otoveveve ke huhu moaga halevai. Isi ogoe dua ibina balugate keta huhu halevai. 10 Isito di isiviale Dilava ehovamale keate keau vaveve dua unaha huhuevegei. 11 Isi keate abulako abu ebika tabageve halevaito tobekai ui hoto unaha evigei. 12 Di isiviholialeike keateau malaha haivei abuemo vuvunealiho. Isito abu hotoeabe evisi tobekai ugei. 13 Kosealemo subuta Dilavau vasohuta Adamu vanu. Isito bae gabie Ivi vanu. 14 Ige Seteneu Adamu lobohavoholinu. Isito Ivi lobohavoge au Dilava menaka egumanu. 15 Katealemoike keateabuna ese maleliege vavaeabena haniagei. Isito abuna abu evievimo negolahai moleho isivilahai mole tedaevei vaveve dua unaha vage Dilavana vatetumu kemo kebia tedaevegei.

Copyright information for `KPX