1 Timothy 4

Loboe ata

Munanae Tumuu nahie haive seleveige nahi hilokage vanie gabila munanae toela keabuna loboe hoto loui ata namigevege hotoeabe kemo ekalesia ata degomole abuna abu evievi halevai hotoeabe ke evisi ehovei. Loboe ata kebia hotou seleve nahate. Isito huhuihuhuiabemo loboe hotou moaganu. Katealemo loboe vaveve keau uvuiabe lahoevege abu vaveve dua momahavo selevealu. Loboe ata keau ata haivei loui avoe, “Lana mahinuvulahaliege menaka eguvave.” Isi loui avoe, “Lainaho lovi degomole igelive.” Isito nahi hilokage Dilavau lovi ke bahata ilihoike au vaevenu. Iale oleuoleu evievi ata holisi hoto seleve ke male keabuna Dilava hoesehavoito bae lovi ke isi. Dilavau lovi ke bahata vaeveale keu duave unaha. Iale nahi bae bebe halevalivebene. Isito nahiabuna ke malei Dilava hoesehavoito bae isi. Kosealemo Dilavau lovi ke bamuholinu. Iale nahi ke hoesehavoito ige keu Dilava nimo duave.

Iesu Keliso esemue dua

Di hilokage a keu hoto seleve ke evisi Iesu ehomai a evievimo negoanu. Iale ana hoto ke loui evievi ata kebia haiveniege a kena Iesu Keliso esemue dua holinela. Isi subuta buluveau teniae toela loumale hoto ke aehanela. Isito vani bahata negoai Dilava vaveve ke ehomai vagenela. Ana a vava hoesehavoliho bibuai oige a vava unahana dua vai. Isito ana Dilava vaveve ke vai kemo negoige a uvu a vava keabuna bahata dua vai. Ana kateaniege novae uveve isi gabie uveve kemo a uvevena dua vai. Di hoto louale keau seleve. Iale ke evisi mataha tumutumuanela. 10 Nahi nahie uvu malei ukolikolie Dilava ke omige keu nahi malevenu. Isi isiviale ata bahata malevei tedaevei. Iale oleuoleu abu uvu mai omige auna kebia tedaeve dua vai. Katealemoike nahi negolahaime lovive vama. 11 Iale hoto ke isuta loui ata haivenela.

12 Timoti, au atae doga. Iale evievi ataeabuna a elehai aho loui kosea, “A keu luleleholinu.” Abu kateai louge ainaho hotoeabe evilive. Isito abuho hotoe dua loui isivi ovei vaveve dua unaha vanela. Isi a evievimo negoai ata tedaevege abuna a vaveve dua ke elehai a hoto evisi. 13 Isi dubumo lamisi Bukae Hoto dodavei kemo hotoe dua loui kebia haivegenela. Kateai kebia haivelage di bae lohoi. 14 Elodaeau a Kosive lovi vaveve hoto loui abu ada malei a tatamo otovege Dilavau a lovi ke vaveve vuvune aoale ke ainaho kabebihavolive. 15 Isito hovelahai abu louale kemo negoai vani bahata ke vagenela. Isi a vaveve a hoto louveve kemo a ebika nenihavonela. Ige elike ata bahatae abuna a vaveve dua elehai a hoto evisi. Ana negobedai kateale valage Dilavana a tedahoi a haivemale kebiata auna tedaevei.

Copyright information for `KPX