Revelation of John 13

Ovo aihanite abuita

Ige di elehasege ovo aihaniteu davala kemo velemai lohonu. Ige kinave bahata seveni (7). Ige kinave kebiamo kauda teniau (10) ua. Ige kaudave kebiamo hanogo igaeigaeau ua. Ige kinaeabe kebiamo abu Dilava aiohavoale hotoe toela hisalilahalu. Ovoe toela di elehale keu bosikati nahate. Isito balugataho. Ige velove keau tagulae velo ke nahate. Isito velove keau balugatahoige aive keu balugale ovo mole laioni ai nahate. Iale ute keu au telonae vuvune au nego mai ovo ke omige keu vuvuneanu. Ige abu ovo ke kina mole hamai tahotisi huhulahai avoe, “Kena hatai.” Isito keu hatiholisito hovelahanu. Ige vatae ata bahataeau ke elehai tetelahai ovo ke ehovalu. Isi guligulilahai ute ke hoesehavolu. Kosealemo keu au vuvune mai ovo ke ominu. Iale abu ovo keta hoesehavoi loui avoe, “Ovo kou ovo negote. Atabeu bae ko nahate valivebene. Iale hamaveve humahau uoholinu.”

Abu kateai louge Seteneu vuvune omige ovo keu au ebika ebagemai hotoe toela baluga loui Dilava ivi aiohavonu. Isi vagana abuita igaeta isi bata sigisi (6) ke uvumo au vuvune kemo vatae ata nalievenu. Ovo keu Dilava ivi aiohavoi loui avoe, “Dilava keu toelanu. Ige au umale matama keta toelanu. Ige otogoe umale ata kebiata toelalu.” Ige Seteneu tota vuvune omige au tiale Dilava ata kebia aiogevei abuemo vaveve toela vai au vuvuneta vatae ata bahata malevei nalievenu. Ige vatae ata bahata iviabeau Mamoe bukamo uoholiale keau guligulilahai ovoe toela ke hoesehavolu. Buka keu abu Mamoe hamale bukaike. Iale au subuta otogo vaholisi vata vaholisito ukolikolie buka kemo au atae ivi hisalianu.

Iale oleuoleu hoto evimaleau hoto ko evive. 10 Vani kela abu oleme dibulae otoveho louale kebia abuna malei dibulaevei. Isi oleme abu haluviveveho louale kebia abuna havege abu haluvisi. Isito vaveve katealeu velemage Dilava ataeabuna abu evievimo negolahai lavisi ui.

11 Ige di elehasege ovo aihanite moleu vatamo velemai lohonu. Ige kinave kemo kauda abui mamoe kauda ke nahateau ua. Ige hotove keu ute baluga hoto ke nahate. 12 Ovo nehe abu hamai tahotiale keu au vuvune bahata mai ovo mole ke omige au kemo negoai vatae ata bahata kebiaho louge abu guligulilahai ovo nehe abu hamai tahotiale ke hoesehavolu. 13 Iale vatamo lohoale ovo keu vikoe vaveve baluga vaevenu. Au louge veneu otogomo dobai vatae lohoge ata bahataeau ke elehalu. 14 Ovo keu vaveve kateale vai vatae ata bahata lobogevege abu loui avoe, “Vaveve keu seleve.” Ovo neheu davalamo lohoale keu keve lamisi elehasege ovo mole keu vaveve kateale vai ata bahata malevenu. Isi kateai ata namigevege abu ovo nehe ke munana vai ke hoesehavolu. Ovo nehe abu sigata hamai tahotige hovelahale ke munanaike abu valu. 15 Iale ovo keu ovo mole hamai tahotiale munana ke mai au lu omige munana keu kibiai hotoanu. Ige ata degomoleau ke hoesehavoholige au kebia havege abu haluvilu. 16 Iale ovo keu louge ata bahata, ata baluga isi atae ese, kunaite isi kunaiholimale, ibinaholisito heiata lovilahamale isi abu isivi unaha vamale keau bahata abu ada inute isi abu vali kemo ovo nehe ke hisali otovelu. 17 Iale oleuoleu ovo ke hisali abu ebiamo hisaliholiale keau bae onobenobe voilahai makatilahalivebene. Hisali keu ovo ke ivi. Isito keu ivive unaha haleito nambaveta.

18 Di hoto mole louge kemo nenilahai lulelelahave. Ovo ke namba keu atae ivilike. Namba keu koseanu. Sigisi, sigisi, sigisi (666). Iale oleuoleu lulelelahale keabuna ihuve ke hilokai.

Copyright information for `KPX