Revelation of John 5

Beiba mole viliale ke alavoveve deiada

Abu kateisege di elehasege telonamo ugulamoale Kosive keu beiba mole egetana viliale ke matahanu. Beiba kemo abu uvuve isi iave kemo hisaliai ke omovai silu bahata seveni (7) malei kemo otovelu. Otovei isiviholialeike atabeu beiba ke alavoi hisali ke dodaveliho. Ige di tota elehasege anelu vuvuneteu baita hoai loui avoe, “Ata ole duatena vali silu ke bahata bodievei beiba ke alavoi.” Au kateai louge abu otogomo kaovai vatamo kaovai kumoe kaovalage beiba ke alavoi hisali ke dodaveveve atabeu uoholinu. Ige di ke elehai nina baluganu. Kosealemo beiba ke alavoi hisali ke dodaveveve atabeu uoholinu. Di kateige eloda moleu daho loui avoe, “Nina haleito ukeve nianela. Ata mole negote laioni ke nahateu Diudame Deividime valadamo lohoale vaveve bahatamo negoanu. Iale auna bae silu kebia bodievei beiba ke alavoi.”

Ige di niasege Mamoe Ese moleu Kosive telonae vavamo lamisi ua. Isege ovo mole voa (4) ni moagamoagate isi eloda tuenti voa (24) keau ke evilikahavoi ua. Mamoe ke abu subuta hamale samaguveu ua. Ige Mamoe kemo kaudave seveni (7) isi nive seveni (7). Nive keau koselahalu. Dilavau au munanae tumu seveni (7) kebia hanavege abu vata bahatae tilu. Iale Mamoe keu tiale telonamo ugulamoale ke ada inuteve beiba ke manu. Keu kateisege oe nehebia voa (4) ni moagamoagate isi eloda tuenti voa (24) keau lohoale Mamoe ke vudimo kome bokoai vata bisi hoesehavolu. Keau bahata igaegaeai gita ke nahate matagevei baidisi golota vale keta malelu. Baidisi kebia uvumo oele hagote balugau ua. Oele hagote kebiabulike Dilava ataeau noinoiamale. Ige oe nehe keau nogolie doga louale keu koseanu. Avoe,

“Au ata duate.
Iale au beiba ke mai silu bodievei alavoge duave.
Kosealemo a hatiale kemo a atae toelae ibina vai malevei Dilava ominu.
Valada bahata, hoto bahata, vata bahata, ata bahata kebiamo ata kebia malevenu.”
10 A kebia malevege keau dubumo loviamale kebia nahate vai Dilava lovi vama.
Isime abuna bae vatae ata bahata nalievei.”
11 Ige di tota niavevela anelu moagataho seleve dodavevesite elegevege keau Kosive telona isi oe nehebia ni moagate isime eloda kebia evilikahavolu. 12 Abu isuta loui avoe,

“Mamoe nehe abu hamale keu baluga.
Iale Dilavana vuvune, kunai, lulele, nego malei omisi.
Isege ataeabuna ivive ebagevai hoesehavoi loui kosea,
‘Keu kosive baluga.’”
13 Ige di evisege otogoe umale, vatamo umale, kumoe umale isi davalamo umale keau bahata nogoli mole louale keu koseanu. Avoe,

“Telonamo ugulamoale isi Mamoe Ese keau atagai vuvune balugalu.
Iale nahi iviabe ebagevei vani bahata hoesegevegei.”
14 Abu katelahai lousege oe nehe voa (4) ni moagate keau avoe, “Ito, no isivialeike hoto keu seleve holisi.” Ige eloda keau kome bokoai vata bisi hoesehavolu.

Copyright information for `KPX