a3.1:Acts 17.15
b3.6:Acts 18.5

1 Thessalonians 3

Mina dada, una bi makai toga de amega nari regamafa ri, uni mokena buni moiyafa bi unikemaka Athens ri amegifa. a  Timothy bi ni feidesifa, kaere bi uni dubuini ma Keriso di ago buniri Sei di vakoi moimai resifa amiye, yi uka vari gira moi gira ma ya egira reyainedi, ye mina esikaesika yaku ga ya moi no riyainedi. Ya ya diba mina deda vegu bi Sei di mokenari baigedi. Adina, una ya sa amegamafa ri, sena ya togatoga nigamafa bi una rofu esikaesika magedi. Ye niyafa kana bi vata niyo, bi ya diba. Mina dada, toga de amega nari regida ri, Timothy ni feideyaka yi uka vari gira bi gokai mina. Na bi ori reyaka be bi Satani yaku ya yi mokena maina rego ri, uni moimai reyafa bi no nigo baebu!

Idu Timothy bi ruika mamo una rofu bae okiyo ri, ago buni moi baiyo, yi gokai uka vari gira ma uka madedi. Ina niyo bi ya yaku mokena buni dudu una mokededi, ma yi ura una vegi rededi una ka gokai ya vegifa kana. b  Ye, usika ourena, uni toe ma esikaesika tauri una egira reyadi ya fafau, adina yi uka vari gira aina dada. Ya vene bi Warika Amiye ideri are rei gira rededi vo nisi, ye rama una gua mamo veguri ameinu regifa. Una bi gokai Sei buni toragade magifa ya fafau; uni Sei di ini nemokori ya dada ada reyafa rofu buni toragade masifa. 10 Urusa ariu una bi usausa ni yeiva resifa, gokai dubusa ya vegifa rofu goinari yi uka vari gira yau nido sana ya egira regika.

11 Ma gua bi uni Baba Sei iniye ma Warika Amiye Iesu yaku uni ida ya vene rofu bae negifa ina vene bi riyagadu! 12 Warika Amiye ya kaya ya kaya ma amiye tauvakoi rofu uka madedi tora nisi rausi reyaine, una yaku ka ya rofu resifa kana. 13 Ye ina yaku yi uka ideri yeiva ya mago, ye ya bi vegu no yokoi de nufa ma akeke ameibigedi, uni Baba Sei di ini nemokori uni Warika Amiye Iesu ini akeke vene tau sa dego ri.

Copyright information for `KQC