a4.15–17:1 Cor 15.51–52

1 Thessalonians 4

Sei ada reyaine vegu dudu ameibina

Usika ourena, una yaku gokai ameyaganedi bi ago ya marafa mina yaku Sei moi ada regedi, bi gua amededi mini. Ye metonari bi ya usa nisi ago ni gira resifa Warika Amiye Iesu ideri bi mina vegu bi besabesa rebiyaine. Adina ya ya diba beika ago gira bi Warika Amiye Iesu di vava dudu ya marafa. Ye mina bi Sei di ini ura dudu ya mina akeke niyaganedi: ya bi koa di vegu mina egavoi reyaganedi; ya kaya ya kaya yi yuka vana nari reyaine, ida akeke ma rorobo dudu, ma tutubena dava bouna vene kaere bi Sei ina diba de, ina vene di koa mokena kana de. Ma mina idari bi amiye yokoi vegu no ga reyaine o ofaofa vegu ga boyaine, ini dubuini fafau. Adina una makai sena ya rofu nisi ni diba reyafa mina kana vegu no bi Warika Amiye yaku toe mago. Adina Sei yaku vegu no rena di una vo de niyo, idu vegu akeke dudu ameibina di vo niyo. Mina resi, kaere amiye mina ago masifa mina fufuta mago, bi amiye rofu mina fufuta de mado, idu mina bi Sei rofu fufuta mado, kaere yaku ini Vima Kikifa ya mado.

Ma gua usika ourena rofu uka mana bi ya rofu de bura regifa, adina mina bi Sei yaku ya kaya ya kaya uka maraganedi ya sena oteimaro. 10 Ma mina makai Macedonia gagani tauri usika ourena tauvakoi rofu rededi. Idu, usika ourena ya guyaguya nisifa, mina bi besabesa reyaganedi. 11 Ya sena niyafa kana yi mokena tora rifo kumo kimo ameibina vegu niyaine, yi moimai iniye maka resi yi vana dudu maka moimai refo. 12 Mina resi yi ameibobigedi ri, ya dubu etofaro vene ya rofu kikifa regedi, ye amiye yokoi rofu de gauna moigika de regedi.

Warika Amiye di ini dena

13 Usika ourena, uni ura bi ya diba niyainedi kaere de neyadi vene rofu di resi bi ga uka esika refo, kaere be bi dadi rae rena di uka mokena aina de mina vene kana ga reyagane. 14 Adina una bi uka vari gira aisifa Iesu bi muyesi dubusa dadiyo, ye Sei yaku mina de neyadi vene kaere bi ini uka vari gira Iesu rofu aisi muyeyadi mina ina sa moi dego.

15 Warika Amiye iniye di ini ago kana, mina ya nisifa una kaere vegu ameibogifa Iesu dairi dego ri, bi rama muyeyadi vene ouresi dadi rae regedi ma gabi una bi dadi rae regifa. muyeyadi vene ouresi una siko de bogifa. a  16 Adina Warika bi oma gutuna imuna niga dego, naivonaivo vima tora di ini goroka dudu, ma Sei di ini kibi kukuroka rena dudu, ma Keriso rofu mokena vari gira aisi muyeyadi mina siko dadigedi. 17 Mina usi bi, una kaere vegu ameibobigifa una afei bogo ma ina vene sa seuya odorori Warika Amiye egogo baku regifa. Mina resi makai Warika Amiye sa toga amegifa. 18 Mina resi ya kaya ya kaya mina ago dudu egira rebifo.

Copyright information for `KQC