a5.2:Mt 24.43; Lk 12.39; 2 Pet 3.10
b5.8:Is 59.17; Eph 6.13–17

1 Thessalonians 5

Warika Amiye dego mina toro refo

Ma, usika ourena, goina ari ma meda nemokori beika vata nigo bi ya vene rofu bura de regifa, adina ya ya diba kotana Warika Amiye di ini dego meda bi dumaduma amiye yaku urusa okido kana. a  Amiye yaku “Ari bi uka amuta ma buni vayavaya dudu” vo nibigedi ri, evade moi no rina meda okigo, rivo rema mida moigika esika guraudo kana; ma ori de digedi. Idu, usika ourena ya bi mukunari de, ye mina meda yaku duma vene kana de ya etururu rego. Adina ya tauvakoi bi vabara ma ariu di midamida. Una bi mukuna ma urusa di rofu de. Mina ye, una bi be vene yaku varededi kana ga rebinadi, idu ne are resi uni yuka vana nari rebinadi. Adina kaere varededi bi urusa varededi, ma kaere koru no irisi forovai rededi bi urusa koru no irisi forovai rededi. Idu una bi ariu vena di vene mina ye, uniye uni yuka vana nari regasa, ma uka vari gira ma uka mana mina uni kokoba mari kana ainadi, ma Sei ya moi vegu rina di mokena ago bi ada bou kana ainadi. b  Vegu moi rina uni Warika Amiye Iesu Keriso dudu moigifa, adina Sei yaku ini gubuyo di esikaesika moina di una vo de niyo. 10 Ina bi una dada muyeyo, mina resi muyena de o muyesifa vo nisi bi ina sa vakoi ameibigifa. 11 Mina dada ya kaya ya kaya egira regasa aedegedi, gua rededi kana.

Metona ago

12 Usika ourena, gua ya usa nisifa bi, yi fogori amiye kaere moimai rei gira resi Warika Amiye di rokari ya nari resi ya fafau oteimadedi, ya bi ina rofu vei mama resi rei mona rebifa. 13 Ina vene bi ini moimai dada, uka manari bi rei monamona resi kikifa rebifa. Ya kaya ya kaya uka amuta dudu ameibifa.

14 Ma usika ourena, amei tavoi varei tavoi rededi vene ni egira refa, uka yau egira refa, mokena yau vene aedefa ma amiye sa gubuyo ga rebifa. 15 Vei mona rebifa, amiye yokoi yaku ya rofu no rebigo ri ya yaku ina ro dairi no ga re, idu vegu buni ya kaya rofu di ma amiye tau rofu toga rebifa.

16 Ari neinei ada rebifa; 17 usausa toga niga ameibifa; 18 beika baika tauri Sei rofu buni toragade mabifa, adina mina bi Sei di ini ura ya rofu Iesu Keriso ideri.

19 Vima Kikifa di ita ga ukafefa; 20 Sei di ago nido amiye di ago rofu ga mokei itu refa. 21 Beika baika tau mina vei mona resi buni maka moi gira refa; 22 deda vegu no rofu egavoi rebifa.

23 Uka amuta di Sei iniye yaku ya moi akeke kotana reyaine, ma Warika Amiye Iesu Keriso dairi dego ri, ina yaku yi vima, uka mokena ma rovaita vegu no yokoi de nufa moi gira rei mona rego. 24 Sei ya raka nido amiye bi ini beika ago niyo mina moi gira risi rego, adina bi vegu rama redo amiye.

25 Usika ourena, una fafau usausa nifo.

26 Usika ourena tau uni yuata mafo.

27 Warika Amiye di vava gabireri, nai ago gira nida, mina bura rena bi usika ourena tauvakoi rofu bura vesi nifa.

28 Uni Warika Amiye Iesu Keriso di buni toragade bi ya vene sa ameibiyaine.

Copyright information for `KQC