b10.2:Mt 9.37–38
c10.3:Mt 10.16
d10.4–11:Mt 10.7–14; Mk 6.811; Lk 9.35
e10.7:1 Cor 9.14; 1 Tim 5.18
f10.10–11:Acts 13.51
g10.12:Gen 19.24–28; Mt 11.24, 10.15
h10.13:Is 23.1–18; Ezek 26.1—28.26; Joel 3.4–8; Amos 1.9–10; Zech 9.2–4
i10.15:Is 14.13–15
l10.19:Ps 91.13
n10.22:Jn 3.35, 10.15
o10.25–28:Mt 22.35–40; Mk 12.28–34
p10.27:Lev 19.18; Deut 6.5
q10.28:Lev 18.5
r.33–34:2 Chr 28.15

Luke 10

Iesu yaku amiye 72 ni feideyo

Mina fufutari, Warika Amiye yaku amiye 72
10.172;bura bedakai bi70nufa.
moiyo rofu remanuremanu dudu ina yaku digo taoni ma gagani neineiri ina vene siko ni feideyo ma diyadi.
Ma ina vene rofu niyo, “Iruku rama butu rena bi taugade, idu moimai vene bi tau de. Mina dada muro biyaguna amiye rofu usa nigedi, ina yaku nugana vene be ni feidego, ini iruku nugaraganedi. b  Difa; na yaku mamoe mida kana suma auna fogori ya ni feideida. c  Fore di pausi, o baige, o tamaka moina ga refa. Idauri ka amiye sa sina ga nifa. d  Goina yavari dui regedi ri, bi yomakai siko nifa, ‘Sei di uka amuta bi mina yavari ameyaine.’ Mina yavari uka amuta nufa amiye yokoi amedo vo nisi bi yi uka amuta niyo bi ina sa ameyaine; de vo nisi, bi yi uka amuta maro bi dairi moi. Yava idanaidana rofu di ga refa. Mina yavari maka amefa, beika ya mabigedi, irigasa adina bi moimai redo amiye yaku ini moimai reyo kana moigo bi buni. e  Goina taoni okigedi ma ya moi dui regedi ri, ina yaku beika iruku ya magedi bi irifa. Ini gauka vene moi buni resi ina vene rofu nifa, ‘Sei di ourefeidena amena sana di vegu bi ya atafu okiyo.’ 10 Idu taoni yokoi dui regedi bi amiye yaku de ya moi dui regedi ri, bi taoni ida nefau are resi nifa, f  11 ‘Ye yi taoni di budoka, uni yuka rafori usi eyaresifa mini bi ya rofu gubuyo rena kana. Yomakai ya ya diba niyaine Sei di ourefeidena amena sana bi ya atafu okiyo!’ 12 Ya rofu nida, kota rena medari Sodom di esikaesika moigo bi keika, idu mina taoni di esikaesika moigo bi toragade, Sei rofu! g 

Taonitaoni vene kaere mokena vari gira Sei rofu de aiyadi

(Mt 11.20–24)

13 “Chorazin ma Bethsaida vene ya bi iriyeduka iniye! Adina bi, mokena vegu ya vene rofu reyaka kana mina, Tyre ma Sidon ri, reyagadu bi mironari vene bi senagi ameinu resi varuka gabu risi udo yaku ini ne uruma ifi reyagadu; una oteimagedi ini vegu nori gutu kero reyadi dada! h  14 Sei di ini kota rego medari bi ya rofu esikaesika toragade mago, idu Tyre ma Sidon rofu esikaesika bi keika mago. 15 Capernaum, ya bi omari moi odoro de rego! Idu, ya yaku ita mukunari negiya!” i 

16 Iesu yaku ini usi dina vene rofu niyo, “Kaere ya neidedo bi na neidedo; ma kaere ya rofu gedu mado bi na rofu ka gedu mado; ma kaere na rofu gedu mado bi na ni feideyo amiye rofu ka gedu mado.” j 

Amiye 72 di ini dairina

17 Mina amiye 72
10.1772;bura bedakai bi70nufa (nanaka 1 baku re).
dairisi ada dudu Iesu rofu niyadi, “Warika Amiye, vima no ka uni ago neideyadi, yi roka dudu nigamafa dada!”

18 Iesu yaku niyo, “Omari gutu Satani ayena kana yareyo ma veyaka. 19 Neidefa, na yaku vava ya maraka, aruma ma kaikai fafau disi ya rofu ruda rena amiye di vava tau etei rigedi; ma beika no yaku esika de ya mago. l  20 Idu vima no yaku yi ago neidededi vo nisi ada ga refa; yi ada regedi di adina bi yi roka bi omari bura riyo dada.”

Iesu ada reyo

(Mt 11.25–27; 13.16–17)

21 Mina medari, Vima Kikifa
10.21Vima Kikifa;bura bedakai biVimanufa;fefa idana be biini vimanufa.
yaku Iesu di uka ada dudu vata baiyo ma ina bi niyo, “Baba, oma ma kono di Warika Amiye, yi roka moi odoro reida, adina ya bi mina vegu mokena keika vene rofu oteimasi mokena tora vene rofu moi sui reyo. Baba, yi ukari mokeyo kana, vata niyo dada.

22 “Nai Baba yaku beika baika tau na maro. Amiye yokoi ina toto ini Mida, idu ini Baba maka ina diba. Ma amiye yokoi de ka ini Baba toto, ini Mida maka ina diba ma ini Mida yaku ka ini ura amiye oteimagi bi rama iniye vegedi, Sei bi kaere.” n 

23 Kamini Iesu yaku kero resi ini usi dina vene maka rofu niyo, “Ya mina beika vededi vene ya bi buni toragade moiyadi! 24 Ya nida, adina senagi bi Sei di ago nidedi vene tau ma warika vene yaku ya beika vegu vededi mina, vegedi vo nigamadi, idu bi de veyadi. Resi beika neidededi mina, neidegedi vo niyadi ka, idu bi de neideyadi.”

Samaria amiye buni di mokena ago

25 Ago gira oteimana amiye yokoi Iesu di uka maina regi are resi niyo, “Oteimana amiye, beika regida ma vegu togatoga moigida?” o 

26 Ina rofu niyo, “Ago gira ideri bi gokai bura reyadi? Ya yaku bi gokai veisa?”

27 Ni kabai resi niyo, “‘Yi uka ma mokena tora noibanu, yi vima tora noibanu ma yi yeiva tora noibanu dudu Warika Amiye yi Sei uka magedi’; ma ‘Ya atafu amedo amiye uka ma, ya kaya uka maisa kana.’” p 

28 Kamini ina rofu niyo, “Ya rama niyo mini makai regiya ri, bi ameibobigiya.” q 

29 Idu mina amiye iniye moi rama regi Iesu dubusa ni kaitesi niyo, “Nai atafu amedo amiye bi kaere?”

30 Iesu yaku ni kabai resi niyo, “Amiye yokoi Jerusalem gutu Jericho negamo ri, bi dumaduma vene di vanari dui reyo. Ubobo resi muyei tamatama reyadi ri, bi ini varuka ita kutusi, moisi ferei diyadi. 31 Minari bi Sei ma amiye utari moimai amiye yokoi bi mina idari negamo. Mina ubobo reyadi amiye veyo ri, bi ida berou eta rofu boi nesi bi kamini ebu rei diyo. 32 Levi amiye yokoi ka makai mina sanari baisi veyo ri, bi ida berou eta rofu boi nesi bi kamini ebu rei diyo. 33 Samaria amiye yokoi ka mina ida baiyo. Idu mina amiye rofu okisi veyo ri, bi iriyeduka ina rofu resi r  34 bosi oira ma waini dudu uyadi sana mina koitesi fafa riyo. Ini donkey
10.34Mina bi hosi keika kana, anema doba nufa.
fafau aisi oto vene di amena varena yavari afei bosi resi nari reyo.
35 Uruyaku dadisi bi meda remanu di moimai di fore moisi yava di ini madini masi niyo, ‘Ina nari re. Beika baika ina fafau regiya bi dairi baigida ri ya magida.’”

36 Iesu yaku ini ago ni vau resi niyo, “Ya yaku mokeisa bi mina amiye regoderi kaere bi mina amiye rofu dumaduma vene di vanari dui reyo bi ini atafu amedo amiye kana?”

37 Ma ago gira ni feidena amiye yaku niyo, “Kaere ina bi mina amiye rofu iriyeduka reyo.”

Ma Iesu yaku ina rofu niyo, “Disi ya ka mina kana vegu re.”

Iesu yaku Martha ma Mary sa egoru reyo

38 Kamini Iesu ini usi dina vene sa bosi rautu yokoiri okiyadi ri, bi rema yokoi roka Martha yaku ini yavari moi dui reyo. t  39 Ina bi ini rasini nufa ini roka bi Mary. Mary bi Warika Amiye di yuka atafu amesi ini sina nigamo mina neidegamo. 40 Martha bi ini yavari amiye afei dui reyo dada, mina kero karo regamo. Dada bosi Iesu rofu niyo, “Warika Amiye, nai rasini bi beika baika bi fereyo dada na yaku maka reida, idu gokai mokeisa? Ni kumo na moi vana reyaine!”

41 Idu Iesu yaku ni kabai resi niyo, “Martha e, ya bi beika baika tau resi yi ada moi esika resi mokena tau tora moisa, 42 idu yokoimaka bi tora iniye. Mary beika mokei redo bi buni mini. Ina rofu mina vegu redo bi una yaku de moi etaga regifa.”

Copyright information for `KQC