a12.1:Mt 16.6; Mk 8.15
c12.10:Mt 12.32; Mk 3.29
d12.11–12:Mt 10.19–20; Mk 13.11; Lk 21.1415
e12.27:1 Kgs 10.4–7; 2 Chr 9.3–6
f12.35:Mt 25.1–13
h12.39–40:Mt 24.43–44
l12.53:Mic 7.6

Luke 12

Ofarosi sina di ago gira

(Mt 10.26–27)

Amiye tau tora okisi egogo resi iniyeiniye mini itei regamadi. Kamini Iesu yaku ini usi dina vene rofu nigi kora reyo, “Pharisee vene di yeast nari rei mona refa — mina bi ini ofarosi vegu. a  Gokai beika sui niyadi bi yakusi ogau nigedi ma gokai beika bou reyadi bi bou usase rego, b  mina dada beika mukunari niyo sina bi vabara sanari neidegedi. Ma beika sina, yava ideri kiya ka mumugu niyo bi yava tebo odorori raka nisi neidegedi.

Sei rofu ori regedi

(Mt 10.28–31)

“Nai asiyaka vene ya nida, rovaita maka ugedi vene ori ga refo, idu gabi vegu no yokoi ya rofu anua de regedi. Ya oteimagida kaere rofu ori regedi: Sei rofu ori refa, kaere bi ya umuyegi rego rofu gabi ini vava dudu ya ita mukunari ya maku negi rego, ina rofu maka ori refa!

“Erena keika vana berou autu di ini davana bi fore keika remanu dudu ba? Ma Sei yaku ina tau noibanu bi toto de nigo. Yi ada iye tauvakoi ka gokaisanu amedo bi Sei ina diba. Mina dada ori ga refa. Ya bi Sei di nemokori bi tora iniye, ma erena taugadegade bi keika iniye!

Keriso ni ogau nina ma fufuta mana

(Mt 10.32–33; 12.32; 10.19–20)

“Na yaku ya vene rofu nida, kaere yaku ariarari nigo ina bi nai, bi Amiye di Mida yaku ka Sei di naivonaivo vima tau di nemokori makai nigo. Idu kaere yaku amiye di nemokori, na diba de ina vo nigo bi, Amiye di Mida yaku ka Sei di naivonaivo vima tau di nemokori makai nigo.

10 “Kaere amiye yaku Amiye di Mida rofu ago no nigo Sei ya ini vegu no bi koite makugo; idu kaere yaku Vima Kikifa rofu ini roka moi no rigo Sei yaku ini vegu no de koite makugo. c 

11 “Usausa yavari o gavana o ourefeidena vene di nemokori kota regi ya afei bogedi ri, yi uka anua ga reyaine, gokai sina nigiya ba gokai ni kabai regiya ri. d  12 Adina mina nigiya medari Vima Kikifa yaku ya oteimago mironi.”

Gugura nufa ada de amiye di ago

13 Amiye taugade di fogori amiye yokoi yaku ina rofu niyo, “Oteimana amiye, nai dubuini nigiya kumo beika baika uni baba yaku fereyo mina na sa rau reyaine.”

14 Iesu yaku ni kabai resi niyo, “Vava na mana kode ya remanu di sinasina neidegi yi beika baika rau regi.” 15 Kamini ina vene tau rofu niyo, “Ya kaya nari rei mona rega beika baika tau rofu yi mokena udu ga refa. Adina amiye di vegu iniye bi mina beika baika tau yaku de mago.”

16 Kamini Iesu yaku mokena ago yokoi ina rofu niyo: “Beika baika tau amiye ini kono fafauri muro iruku toragade iniye rama niyo. 17 Dada iniye mokesi niyo, ‘Gokai kamini regida? Iruku aina sana bi koina.’ 18 Resi niyo, ‘Yomakai regida: nai iruku aina sana ukerova resi tora risi nai iruku ma sogona taugade minari aigida. 19 Resi bi na na kaya rofu nigida, lagani tauri mina beika tau bi yi. Nai veguri mina beika baika tau kiyakiya iriga vaiga ada rega ameibigida!’ 20 Idu Sei yaku ina rofu niyo, ‘Ya bi ada de amiye! Gua mina urusari umuyegiya ri, bi kaere yaku mina beika tau ya kaya moi tauri fereyo mina moigo?’”

21 Resi Iesu yaku sina ni vau regi niyo, “Amiye bi makai kaere beika baika tau inaike moiyo, idu Sei di mokenari bi beika baika tau de moiyo.”

Uka vari gira Sei rofu mana

(Mt 6.25–34)

22 Resi Iesu yaku ini usi dina vene rofu niyo, “Mina dada ya nida, vegu niga amesi beika irigedi o beika varuka yi rovaita yaku akugedi mokena toe ga moifa. 23 Vegu yaku iruku bi ebu reyo ma rovaita yaku varuka ka ebu reyo. 24 Yomina gayo bora erena vefa; ina bi iruku yo varina o iruku goena de rededi; iruku aina sana o yava ka koina; idu Sei yaku vana redo. Ya bi mina erena ebu iniye reyadi! 25 Ye ya kaere yaku ini ukari mokena toe moigo ri, mina mokena yaku ini vegu moi doba rego ba? 26 Mina mokena dudu mina beika keika anua reisa, ye beika resi mokena toe tau moisa? 27 Sufari farofaro bi gokai bodedi mina vefa: ina bi moimai de rededi o varuka de ridedi. Idu ya nida kini Solomon di ini varuka burefe tau bi mina sufari farofaro kana de. e  28 Sei yaku sufari farofaro imu mado. Mina farofaro bi gua vegu amedo mini, idu agiya bi kufusi makugedi roko nigedi ri, ita mokari origedi. Ye Ina bi yi varuka dudu ya nari rei mona iniye rego. Ya bi uka vari gira mana keika vene!

29 “Mina dada beika irigedi vo nisi, yi ukari mokena toe ga togatoga refa. 30 (Adina mina beika baika tau bi mina konori amededi vene idana yaku maina rededi.) Idu yi Baba ka ina diba ya nufa de tau bi. 31 Idu Sei di ourefeidena amena sana rofu mokei tora refa kumo mina beika baika tau ka ya mago.

Omari gugura tau

(Mt 6.19–21)

32 “Ya amiye tau ori ga refa, adina yi Baba bi ini ourefeidena amena sana ya rofu magi ada redo. 33 Yi beika baika nufa bi sero resi fore bi irava vene mafa. Yi beika baika tau bi omari aifa: mironari fore dura de no nigedi ma duma amiye yaku ka moina de ma didimoro yaku de mo no rigo. Ye toga koina de nigedi. 34 Adina yi uka ka bi yi beika baika tau amededi sanari ameibigo.

Naivonaivo vene kaere nari rei mona rededi

35 “Yi varuka mitai ri gira regedi rofu yi ramefa orisi toro dudu amefa. f  36 Ini warika amiye, rema mena irakuna gutu dairigo naivonaivo vene toro rededi kana ameibifa. Ini warika amiye bi rema mena irakuna gutu dairisi fidifidi rego ri, evade maka dadisi iduara moi boka regedi. g  37 Mina kana vene rofu bi buni toragade iniye, adina bi ini warika amiye dairigo ri, bi ina vene bi varena de, ina rofu toro rega nari amededi dada! Ya vene rofu nida, ini warika yaku roka nisi moimai regi ini varuka mitai rigo ma iruku irina sanari amegedi ri, bi ina yaku dadisi ina rofu ini naivo rego. 38 Uru tobori baigo o uruyaku vabarari baigo rofu ina toro rega nari rededi vene baku rego ri, bi buni iniye moigedi! 39 Idu ya ya diba nifa, yava biyaguna amiye bi ina siko diba nigo vo nisi duma amiye baigo ari bi, ina bi ini yava nari rei mona rego, dui resi duma rego baebu. h  40 Ya vene ka toro dudu amefa, adina Amiye di Mida bi mokena de rededi ariri baigo.”

Vegu rama redo naivo amiye o vegu rama de redo naivo amiye

(Mt 24.45–51)

41 Peter yaku Iesu rofu ni kaitesi niyo, “Warika Amiye, mina mokena ago bi una rofu maka nisa ba amiye tau noibanu di nisa?”

42 Warika Amiye yaku ni kabai resi niyo, “Kaere bi vegu rama redo mokena tora nufa naivo amiye ini warika amiye yaku vava mago, ini yava nari regi ma naivo vene be di iruku bi ina yaku ini meda ramari rau rego. 43 Ini warika amiye yaku dairisi baku rego mina vegu rega ameibigo ri, bi mina naivo amiye bi ada iniye rego! 44 Rama iniye ya nida, ini warika amiye yaku mina naivo amiye bi vava mago, dada ini beika baika tau mina ina yaku ada risi nari rego. 45 Idu mina naivo amiye yaku iniye rofu mokesi nigo, ‘Nai warika amiye bi ari dobari dairigo,’ kamini naivo rena rumana rema tau usi kora resi iruku iriga koru no moiga rega ameibigo ri 46 ini mokena de redo ariri ma meda nemokori diba de, ini warika amiye dairisi mina naivo amiye di ini rovaita utama nugasi
12.46di ini rovaita utama nugasi;oyou makusi
mokena vari gira de aina vene di sanari aigo.

47 “Ma mina naivo amiye, kaere bi ini warika amiye di mokena diba, idu yomakai kana dogo de resi de rego, bi ubobo toragade rego. 48 Idu kaere naivo amiye, ini warika amiye di mokena ina toto resi de reyo ma ubobo keika rego. Ma kaere moimai toragade ina rofu maro ina ka bi moimai taugade reyaine; ma kaere besa moimai toragade maro ka bi moimai besa reyaine.

Iesu bi amiye moi ututama okuyo amiye

(Mt 10.34–36)

49 “Na nai deyaka bi mina konori ita origi. Nai mokenari bi ori katugo kumo! 50 Nai babatiso
12.50 babatisoMina ini adina bi ini esikaesika moina.
mago; ma nai mokena toe evade moigida kumo! k 
51 Ya yaku mokededi bi na bi mina konori uka amuta vegu maka moi deyaka, ba? Ide, idu amiye iniyeiniye utama okugida rofu. 52 Gua mina medari gutu kaere ini rema mida sa bi vana berou autu amededi mina okugida; regode berou remanu sa utama ma remanu berou regode sa utama okugida. 53 Iniye maka utama okugedi: baba vene ini rumana mida sa, rumana mida ini baba vene sa; nono vene ini vefa vene sa, vefa vene ini nono vene sa; radiyaka tora vene ini radiyaka sa, radiyaka vene ini radiyaka tora vene sa.” l 

Meda di ari vei mama rena

(Mt 16.2–3)

54 Iesu yaku ka amiye tau tora rofu niyo, “Meda nedo eta rofu gutu seuya yokoi dadi baigo ri vesi evade nigiya, ‘Mina bi miya regi redo,’ resi bi miya redo. 55 Ma meda baido rama eta gutu aura rebigo ri, bi nigiya, ‘Meda sei regi redo,’ resi bi sei redo. 56 Ofarosi vene! Ya oma ma kono vesi bi beika ari gua una mago bi nigedi. Beika resi gua yomina meda di ari bi de vei mama rededi ba?

Yi tuma amiye rofu uka amuta ni

(Mt 5.25–26)

57 “Beika resi ya kaya vegu bi rama ba ide mina de moidedi? 58 Ya sa uka yokoimaka de nido amiye kaere yaku ya kota aigi rego koderi, amiye sa evade vakoi yi mokena moi yokoimaka refa idau gogo kota sanari bodedi ri, adina bi, makai de regiya ri, bi kota nido amiye di vanari ya aigo baebu. Ina yaku bi dibura yava nari redo amiye di vanari ya ma bi dibura yavari ya aigo. 59 Na ya rofu ago nida, mina sanari de yakugiya bogo fore keikakeika mai vau regiya mamo yakugiya.”

Copyright information for `KQC