Luke 15

Mamoe forovai reyo

(Mt 18.12–14)

Meda yokoiri fore butu rededi vene taugade ma vegu no rededi vene be bi Iesu di sina neidegedi vo nisi ina rofu baiyadi ri, a  Pharisee vene ma ago gira oteimana vene bi ago tau nisi niyadi, “Mina amiye bi vegu no rededi vene faiva nisi ina vene sa kumo iruku irido!” Dada Iesu yaku mina mokena ago ina vene rofu niyo:

“Ya kaere amiye bi yi mamoe 100 nufa ma yokoimaka bi kamini forovai rego ri, bi beika rego? Mina mamoe 99 bi nomu ini tavara rededi sanari feresi digo rofu mina yokoimaka forovai reyo mina maina resi mamo baku rego. Baku rego ri, bi ada iniye nisi ini megea fafau aisi uakaisi rauturi okigo. Mina resi bi ini asiyaka vene ma ina atafu amededi vene raka ni egogo resi nigo, ‘Na bi nai forovai reyo mamoe mina baku reyaka dada na sa ada renadi!’ Mina asini ida yokoimaka dudu, ya nida omari amededi vene ada toragade iniye regedi adina bi amiye yokoimaka ini vegu no feresi moi etaga riyo dada. Idu mokena rorobo vene 99 bi ini vegu no de feresi moi etaga de riyadi dada omari amededi vene ada de regedi.

Fore forovai reyo

“O goina rema ini siriva fore bi vana ufo, idu yokoimaka bi moi forovai rego vo nisi, ina bi ramefa ori katusi yava guda resi maina rei bogo ma baku rego ba? Baku rego ri, bi ini asiyaka ma ina atafu amededi vene raka ni egogo resi nigo, ‘Na bi nai siriva fore forovai reyo mina baku reyaka dada na sa ada renadi!’ 10 Mina kana ida dudu ya nida, Sei di ini naivonaivo vima bi ada regedi amiye yokoimaka ini vegu no feresi moi etagae rido dada.”

Mida forovai reyo

11 Resi Iesu yaku niyo, “Amiye yokoi bi ini rumana mida remanu. 12 Usika mida yaku dadisi ini baba niyo, ‘Baba, muyegiya ri beika gugura tau bi nai vo nisi gua na ma.’ Dada mina amiye yaku ini mida remanu di ini beika gugura muyesi ferego kana bi kamini rau reyo. 13 Meda be koina niyo ri, mina usika mida yaku ini gugura tau moisi ini rautu ferei dadi diyo. Gagani maike tora yokoiri disi ini fore tau ini uka di mokena rofu maku vau reyo. 14 Ina sa beika amedo kana maku vau reyo ma mina gaganiri adabo tora yokoi are reyo ri, bi iniye sa bi beika buni irigi yokoi de. 15 Dada disi moimai reyo mina gagani amiye yokoi sa. Ina bi ini murori ni feideyo ma ini dona nari rei mago. 16 Ini mokenari bi dona iruku vana magamo iniye ini uka rauna mina moi amuta rigo, idu yokoi yaku kana beika yokoi mina mana de irigamo. 17 Gabi mamo ini mokena ina rofu dairi baiyo ri, bi dadisi niyo, ‘Nai baba di moimai rededi vene tau bi ini iruku bi toragade iridedi ma na bi yomini rauna dudu muyegi reida! 18 Dadisi bogida nai baba rofu nigida, Baba, na bi Sei rofu ma ya rofu vegu no reyaka. 19 Na bi yi mida vo ga na ni; yi moimai amiye yokoi kana na nari re.’ 20 Resi bi dadisi ini baba rofu dairiyo.

“Ina bi yava okina koderi, ini baba yaku maikeri gutu vesi ina rofu iriyeduka resi raga rei bosi ini mida buda aisi fuka reyo.
21 Ini mida yaku niyo, ‘Baba, na bi Sei rofu ma ya rofu vegu no reyaka, na bi yi mida vo ga ni.’ 22 Idu ini baba yaku raka nisi ini naivo vene rofu niyo, ‘Evade varuka burefe iniye moi desi ae mafa. Ini vanari rini yokoi ae masi ini yukari tamaka ae mafa. 23 Mina resi bosi boromakau mida vana resifa mina ufa ma irakuna tora resi ada renadi! 24 Adina nai mida mina bi muyeyo, idu gua bi vegu niyo; eva niyo idu disi dairiyo ma baku reyafa.’ Kamini irakuna ekeyadi.

25 “Mina medari ini ourena mida bi murori ameyo. Dairi baiyo ri yava adinari bi gita kukuroka ma adena udedi mina neideyo. 26 Dada naivo amiye yokoi raka nisi ni kaitesi niyo, ‘Mina bi beika rededi?’ 27 Mina naivo amiye yaku ni kabai resi niyo, ‘Yi dubuini dairi okiyo dada yi baba yaku boromakau mida vana masifa mina usi irakuna rededi, adina yi baba yaku buni dudu dairi moiyo dada.’

28 “Mina ourena mida bi gubuyo resi yava ideri de dui rei boyo; dada ini baba yaku desi ni guba reyo dui reyaine vo nisi. 29 Idu ni kabai resi niyo, ‘Ve kumo yomina lagani tau na yi moimai reyaka yi naivo amiye kana, resi yi ago mina de neidei kora regamaka. Idu ya bi gouti mida nai asiyaka vene sa irakuna regi ka de na maro! 30 Idu yi mina mida bi yi gugura fore tau koa rededi rema vene rofu maka rau rei vau resi yavari dairiyo ri, ya bi boromakau mida vana resifa mina rofu uyo!’ 31 Ini baba yaku ni kabai resi niyo, ‘Nai mida, ya bi ari neinei na sa dada beika tau nai bi yi. 32 Idu buni bi ada renadi resi irakuna renadi, adina yi dubuini bi muyeyo, idu gua bi vegu niyo; disi forovai reyo, idu, gua baku reyafa.’”

Copyright information for `KQC