a19.10:Mt 18.11
f19.38:Ps 118.26
g19.46:Is 56.7; Jer 7.11

Luke 19

Iesu ma Zacchaeus

Iesu Jericho dui resi ebu rei bogamo. Minari bi amiye roka Zacchaeus, kaere bi fore butu redo vene di amiye tora. Iniye ka bi gugura tau amiye. Ini ura bi Iesu vego, idu ina bi amiye tumu dada, vena anua regamo, amiye ka berou bi tau tora iniye dada. Mina dada ouresi raga bosi yabo tora yokoi firu boyo, Iesu vegi. Ina bi mina dakai baigo dada. Iesu yaku mina sana okiyo ri, bi ne odoro resi ina rofu niyo, “Zacchaeus, evade soka rei degiya, adina na bi gua yi yavari amegida.”

Dada evade soka resi ini yavari ada dudu moi dui reyo. Amiye tau yaku mina veyadi ri, bi ni mumugu regi kora rega nigamadi, “Ina bi vegu no redo amiye yokoi di yavari iruku irigi dui reyo.”

Zacchaeus are resi Warika Amiye rofu niyo, “Warika Amiye, nai gugura tauri berou afona moisi bi irava vene rofu magida. Resi amiye ofa dudu ini gugura fore moiyaka vo nisi, bi dubusa uru vana raro besa dairi magida.”

Iesu yaku ina rofu niyo, “Gua medari moi vegu rina bi mina yavari dui reyo, adina bi mina amiye ka Abraham di mida. 10 Amiye di Mida deyo bi forovai reyadi vene maina rei baku resi moi vegu rigo.” a 

Goro fore di mokena ago

(Mt 25.14–30)

11 Mina sina neidegamadi ri, bi yavoi resi mokena ago niyo, adina ina bi Jerusalem atafu okiyo, ma amiye yaku mokegamadi bi Sei di ourefeidena amena sana bi minari evade maka ogau nigo. 12 Ye ina yaku niyo, “Amiye yokoi, kaere bi warika amiye kana, dadisi gagani maike yokoiri diyo rofu iniye kini rigedi ma dairigo. 13 Dada ouresi ini naivo vene tauvakoi vana ufo raka nisi goro fore
19.13 goro fore:Goro fore yokoimaka bi rautu amiye di moimai meda 100 ri di ini davana kana.
yokoiyokoi masi niyo, ‘Mina fore fafau moimai refa bogo dairi okigida kumo.’
14 Idu ini gagani vene yaku bi ini ura de iniye regamadi, dada naivo vene ago ni feideyadi ma usi disi niyadi, ‘Una ura de resifa mina amiye yaku uni kini niyaine.’

15 “Kini nisi ini gaganiri dairiyo. Mina usi bi ago ni feideyo ini naivo vene rofu fore maro fafau moimai reyadi ri beika be reyadi mina ini nemokori vego vo nisi. 16 Ourena amiye yaku baisi niyo, ‘Warika amiye, yi goro fore fafau dubusa vana ufo riyaka.’ 17 Ma ina rofu niyo, ‘Ya bi buni iniye, nai naivo amiye. Ya yaku beika keika ya maraka bi nari rei mona reyo dada, taoni vana ufo bi ya yaku nari regiya.’ 18 Ina usi naivo amiye yaku baisi niyo, ‘Warika amiye, yi goro fore fafau bi dubusa vana berou autu riyaka.’ 19 Ma ina rofu niyo, ‘Taoni vana berou autu bi ya yaku nari regiya.’

20 “Kamini naivo amiye yokoi yaku baisi niyo, ‘Warika amiye, yi goro fore bi yomini. Muko yokoiri aisi moi sui reyaka. 21 Ya rofu ori reyaka adina, ya bi amiye gira. Amiye yokoi yaku fore banikari aigo ma ya yaku moigiya; amiye nokoi yaku varivari rego ma ya yaku goisi moigiya.’ 22 Ini warika amiye yaku ni kabai resi niyo, ‘Ya kaya yi sina niyo dudu yi kaunava moigiya. Ya naivo amiye bi irava iniye! Ya yaku niyo na bi amiye gira, beika banikari de aeida bi moisi beika de varida bi goisi moigida. 23 Beika resi nai fore bi banikari de moi aiyo? Kamini na dairi baiyagadu ri, bi dubusa bae moiyagadu, banika yaku fore keika fafau aiyagadu mina sa.’

24 “Resi atafu are rededi vene rofu niyo, ‘Ini goro fore yokoimaka ina rofu moisi yorona amiye ini goro fore vana ufo mafa.’ 25 Idu niyadi, ‘Warika amiye, ina bi ka ini goro fore bi vana ufo!’ 26 Ni kabai resi niyo, ‘Ya nida, amiye kaere ini beika baika nufa bi moi tanu mago. Ma kaere ina bi de iniyeiniye ina sa, ka ina rofu keika iniye amedo bi moi dairigo. c  27 Idu nai tuma vene kaere yaku ura de reyadi na kini nigida vo niyadi, bi afei baisi minari nai nemokori u vau refa!’”

Iesu kini kana Jerusalem ri dui reyo

(Mt 21.1–11; Mk 11.111; Jn 12.12–19)

28 Iesu yaku mina sina ni vau reyo ri, dadisi Jerusalem ri ourei boyo. 29 Bethphage ma Bethany taoni keika, Olive yabo di ika adinari, bae kaira reyo ri, bi ini usi dina amiye remanu ni feidesi 30 niyo, “Rautu yokoi yi budari rofu bogedi. Mina sanari boi okigedi ri, mironari bi donkey di mida ukita riyadi mironi, ina bi keu rina kode, younesi moi baifa. 31 Amiye yokoi yaku ya ni kaitego beika resi ini maena younededi vo nigo ri, bi nifa, ‘Warika Amiye
19.31Warika Amiye;oini biyaguna.
yaku ura redo dada.’”

32 Ni feideyo ma ouresi boyadi vene boyadi ri, bi baku reyadi, ini niyo kana. 33 Donkey di mida di maena younei deyadi ri, bi ini nari rededi vene yaku ni kaiteyadi, “Beika resi ini maena younededi?”

34 Ni kabai resi niyadi, “Warika Amiye
19.34Warika Amiye;oini biyaguna.
yaku ura redo dada.”
35 Moisi Iesu rofu baisi ini bou varuka fafau you bosi Iesu donkey di mida odorori aiyadi. 36 Keu risi bogamo ri, bi amiye yaku ini bou varuka moisi idari ibu regamadi.

37 Jerusalem atafuri, Olive yabo di ika di ini ida dedo sana ri, desi kaira niyo ri, bi ini usi dina vene taugade yaku goroka tora dudu Sei ni odoro resi nigamadi, adina vena mokena vegu tau mina regamadi dada. 38 Yomakai nigamadi, “Sei kini rofu buni mado, kaere bi Warika Amiye di rokari baido! Uka amuta omari ma ini vabara Sei rofu oma odoro iniyeri ameyaine!” f 

39 Kamini Pharisee vene be mina amiye tau fogori yaku ina rofu niyadi, “Oteimana amiye, yi usi dina vene emasi nivo makai ga niyagane!”

40 Ni kabai resi niyo, “Ya nida, bere nigedi vo nisi, bi fore iniye raka nigedi.”

Iesu yaku Jerusalem rofu isaka niyo

41 Jerusalem kaira resi ne rei veyo ri, bi iriyeduka resi isaka niyo. 42 Resi niyo, “Gokai uka amuta nina di vegu gua medari ya diba niyagadu! Idu gua bi de veifategedi! 43 Ari yokoi baigo mironi ri, bi yi tuma vene yaku ya rofu kotari ya buru resi kafu tau mina biri regedi. 44 Resi yi amiye tau sa, yi kota ideri ya ukerova vau regedi. Fore yokoimaka de feregedi ma are rega ameibigo. Ini adina bi, Sei ya rofu baiyo ari bi de vei mama reyadi!”

Iesu bi Sei ni vakena yavari boyo

(Mt 21.12–17; Mk 11.15–19; Jn 2.13–22)

45 Resi bi Sei ni vakena yavari dui resi sero rededi vene umeki rei feidegi kora resi 46 ina vene rofu niyo, “Sena bura reyadi, ‘Nai yava bi usausa nina yava,’ idu ya vene yaku duma vene ini sui nina yava kana reyadi!” g 

47 Meda neinei Sei ni vakena yavari amiye oteimagamo, idu Sei ma amiye utari naivo vene di warika vene, ago gira oteimana vene, ma amiye di ini tora vene be yaku bi umuyegedi vo nigamadi. h  48 Ida de baku reyadi gokai regedi, mina adina amiye tau tora bi ini ago moi gira reyadi.

Copyright information for `KQC