a2.21:Lev 12.3; Lk 1.31
b2.22–24:Lev 12.6–8
c2.23:Ex 13.2, 12
d2.32:Is 42.6, 49.6, 52.10
f2.39:Mt 2.23
g2.41:Ex 12.1–27; Deut 16.1–8
h2.52:1 Sam 2.26; Prov 3.4

Luke 2

Iesu vata niyo

(Mt 1.18–25)

Mirona ariri, Caesar Augustus yaku ago ni feideyo gagani tauvakoi rofu, amiye tau roka moigedi di. Ouresi roka moiyadi ini medari bi, Quirinius yaku Syria ri gavana niyo ariri. Mina ago dada, amiye tauvakoi ini roka magedi vo nisi, yokoiyokoi iniye di taoni iniye rofu dairiyadi.

Joseph Nazareth, Galilee di taoni yokoi rofu boyo, kini David di vata nina di taoni Bethlehem, Judea gagani rofu boi okiyo, adina ina bi David di tutubena. Bethlehem taoniri, Joseph ini roka mago di, Mary kaere bi ina ni maradi mego vo nisi ka afesi, gogo boyadi. Mary niyo. Mironari amegamadi ri, bi Mary ini mida moina meda okiyo. Mary yaku ini ourena rumana mida odisi varuka dudu kumu risi, kamini boromakau di iruku iridedi mauari moi aiyo, adina bi oto vene di amena varena yava bi vata baiyo.

Naivonaivo vima ma mamoe nari rededi vene

Mamoe nari rededi vene be bi nomu tora gaganiri amegamadi. Urusa niyo ma ini mamoe tau nari regamadi. Kamini, Warika Amiye di naivonaivo vima yokoi bosi mina vene adinari ogau niyo, ma Warika Amiye di vabara yaku ina vene buru riyo ma ori yaku no iniye niyadi. 10 Resi naivonaivo vima yaku mina vene rofu niyo, “Ori ga refa, sina buni moi baiyaka dada. Mina sina yaku amiye tau ada regedi. 11 Adina gua mina mida, David di taoniri, ya vene di moi vegu rina amiye sena vata niyo. Mina bi Keriso Warika Amiye! 12 Gokai vei mama rigedi bi yomakai: Rumana mida keika baku regedi, boromakau di iruku irina maua ideri varedo, varuka dudu fafa riyadi.”

13 Kamini, minari maka, omari naivonaivo vima taugadegade ogau nisi mina naivonaivo vima sa, Sei rofu ni vakena resi yauta nigamadi:

14 “Oma Odoro Iniye Sei rofu ada tora iniye manadi,
kaere mina konori Sei yaku ada redo bi uka amuta ya rofu mago!”
15 Mina koina niyo ri, mina naivonaivo vima taugade omari dairiyadi, ma mamoe nari rededi vene iniyeiniye rofu niyadi, “Bethlehem ri bonadi, beika bi vata niyo, Warika Amiye yaku una oteimaro kana venadi.”

16 Evade kamini boyadi ri, Mary, Joseph sa baku reyadi. Ma rumana mida keika bi boromakau di iruku iridedi mauari varegamo. 17 Mina veyadi ri, mamoe nari rededi vene yaku dadisi naivonaivo vima yaku beika ni oteimaro mina mida rofu ni negau reyadi. 18 Kamini mina ago neideyadi vene tau mamoe nari rededi vene di sina neidesi tururu reyadi. 19 Ma Mary yaku mina ago ma vegu tau ini ukari mokei tora iniye reyo. 20 Kamini mamoe nari rededi vene dairiyadi, Sei rofu yauta niga ini roka ni odoro reyadi, adina neidega veyadi vegu bi rama iniye, naivonaivo vima yaku ni oteimaro kana.

Iesu di roka aiyadi

21 Meda vana berou autu regode moiyo ri, rumana mida di ini ro nugana medari, Iesu ini roka aiyadi, ini nono di uka ideri varena koderi; naivonaivo vima yaku niyo kana mina roka niyadi. a 

Iesu Sei ni vakena yava ideri afei boyadi

22 Nono ini kino nufa meda koina niyadi ruaka nigi Moses di ago gira kana, Joseph ini rema Mary sa Jerusalem rofu ini mida Iesu moi boyadi, Warika Amiye rofu magedi vo nisi. b  23 Warika Amiye di ini ago girari bura rei niyo kana, “Vata ni oureyadi rumana mida tau bi Warika Amiye rofu nigedi.” c  24 Ina boyadi, Warika Amiye di ago gira kana, pune erena remanu ba kefuta di mida remanu ori sisika rena ma Sei rofu kana magedi.

25 Mina ariri, amiye yokoi roka Simeon Jerusalem ri amegamo. Ina bi mokena rorobo amiye ma Sei ori regamo amiye. Ina bi Israel di moi vegu rina amiye nari amegamo, ma ina bi Vima Kikifa yaku vata baiyo. 26 Vima Kikifa yaku ka ina rofu niyo, ina bi de muyego Warika Amiye ini Keriso vego mamo. 27 Vima Kikifa yaku Sei ni vakena yava ideri Simeon afei dui reyo. Mida keika Iesu bi ini nono baba yaku moi dui reyadi, Moses di ago gira di vegu regedi vo nisi. 28 Kamini Simeon yaku mida keika moisi buda aisi Sei rofu ni buni resi niyo:

29 “Warika Amiye e, yi naivo amiye gua muyena sanari uka amuta dudu digida,
yi ago niyo kana.
30 Adina bi nai nemoko yaku yi moi vegu rena ida veyaka mini.
31 Ya sena amiye tauvakoi di ini neri mina vegu dogo reyo:
32 Vabara ruaka yokoi tutubena dava bouna vene bedakai rofu moi evata reyo, d 
ma vabara yi vene Israel mago.”
33 Rumana mida di nono baba yaku Simeon di ago ina rofu neideyadi ri, bi tururu reyadi. 34 Kamini Simeon yaku ina remanu rofu buni nisi mida di nono Mary rofu nisi niyo, “Mina mida yaku Israel vene taugade moi keto rego, ma taugade tora ka moi vegu rigo. Ina bi Sei di ini rebe kana bogo, ma amiye tau tora yaku mokena no dudu ni vabi regedi. 35 Mina rofu dudu, ina yaku ini mokena no moi sui ridedi moi negau rigo. Ma mina mokena iriyeduka yaku yi uka ora kana vaga imigo.”

36 Sei di ago nido rema yokoi ka minari amegamo, ini roka bi Anna, kaere bi Panuel di ini vefa, Asher di ini rubu rema. Ina ka bi rema ugava; meyo, idu lagani viro varamaka ini maruka sa vakoi ameyadi. 37 Ini maruka muyeyo ma lagani 84 obu ni amegamo.
2.36–37lagani 84 obu ni amegamo;oini vata nisi amegamo lagani bi 84.
Ina bi Sei ni vakena yava de ferei tavoi regamo, uru ari Sei ni vakena regamo rofu iruku irina de di ago gira, moi gira regamo ma usausa vegu.
38 Mina ariri ina okiyo ri, Sei rofu buni toragade masi Jerusalem moi vegu rigo vo nisi nari rededi vene tauvakoi ni oteimaro mina rumana mida di ini sina bi.

Nazareth ri dairiyadi

39 Iesu ini nono baba yaku Warika Amiye di ago gira di ini vegu tauvakoi rei vau reyadi ri, bi kamini Galilee ri dairiyadi, ini taoni iniye Nazareth ri boyadi. f  40 Mina mida bi kamini tora nibogamo yeiva nufa ma mokena moka iniye dudu. Sei di ini buni tora iniye ina rofu magamo.

Rumana mida Iesu Sei ni vakena yava ideri

41 Lagani neinei Iesu ini nono baba sa Jerusalem bogamadi, Passover Irakuna regedi vo nisi. g  42 Kamini Iesu ini lagani tuerori, ina regode, ini tutubena yarededi kana vegu, vakoi bi mina irakuna regedi vo nisi Jerusalem boyadi. 43 Irakuna meda koina niyo ri, dairigamadi, idu rumana mida Iesu maka bi Jerusalem ri ameyo. Ini nono baba diba de. 44 Ini mokenari bi ina bi ini amiye fogori dido mironi. Meda yokoimaka koina niyo fufutari mamo, ini usika ourena vene rofu ma asiyaka vene rofu, Iesu kamini maina reyadi. 45 Baku rena de reyadi dada, Jerusalem ri maina regi dairiyadi. 46 Meda regode koina niyo ri, ina vene yaku Sei ni vakena yava ideri baku reyadi, oteimana vene di utari amegasa ini sina neidegasa ina rofu ni kaitegamo. 47 Ini ago neidegamadi vene tau bi ini mokemoke rofu ma ini ago dairi ni kabai regamo rofu tururu iniye reyadi. 48 Ini nono baba ka tururu reyadi mina veyadi ri, kamini ini nono yaku ni kabai resi niyo, “Nai mida, beika resi una rofu makai reyo? Na yi baba sa bi uka esika dudu ya maina reyafa.”

49 Ni kabai resi niyo, “Beika resi na maina rededi? Na nai Baba di yavari ameida bi, ya diba ba ide?” 50 Ini ago bi neideyadi, idu sina rama diba de.

51 Kamini Iesu ini nono baba sa Nazareth ri dairiyadi, ma ini nono baba di ago neidegamo. Ini nono yaku mina vegu tau ini uka ideri moi gira regamo. 52 Kamini Iesu tora nigamo, rovaitari, ma mokemokeri. Sei di uka ma amiye di uka ka ada regamadi ini mina vegu dudu. h 

Copyright information for `KQC