b21.22:Hos 9.7
c21.25:Is 13.10; Ezek 32.7; Joel 2.31; Rev 6.12–13
d21.27:Dan 7.13; Rev 1.7

Luke 21

Obu di ini fore maro

(Mk 12.41–44)

Iesu yaku ne odoro resi bi gugura tau vene yaku Sei ni vakena yava di fore aina mauari ini fore aigamadi mina vegamo. Resi minari ka obu irava veyo kaere bi fore keikakeika remanu aiyo. Resi niyo, “Ya nida, mina obu gugura de nufa bi tora iniye aiyo ma mina amiye tau yaku aiyadi bi ebu reyo. Adina mina vene yaku fore toratora bi ini gugura tau fafau aiyadi, idu mina rema ini gugura nufa de bi, ini tora noibanu aiyo; mina bi ini fafau ameibobigo gugura.”

Iesu yaku Sei ni vakena yava di tumuda rigo di ago niyo

(Mt 24.1–2; Mk 13.12)

Ini usi dina vene be yaku Sei ni vakena yava kamini ni dodi regamadi. Sei ni vakena yava riyadi fore bunibuni ma Sei rofu moi aigedi gugura buni tau reyadi mina ni dodi regamadi ri, Iesu yaku bi kamini niyo, “Gua beika tau vededi — bi ini ari yokoi baido mironi, mina fore yokoi ini sanari de amego; mina tau varadaugo.”

Toe ma esikaesika

(Mt 24.3–14; Mk 13.313)

Kamini Iesu ni kaitesi niyadi, “Oteimana amiye, mina bi goivaka vata nigo? Ma ini rebe bi gokai mina vata nigo ari vei mama regifa?”

Iesu yaku ina vene rofu niyo, “Nari rei mona refa. Nokoi yaku ga ya eru reyaine. Amiye taugade nai roka dudu baisi iniye ni kake rigedi, ‘Na bi Keriso!’ ma ‘Ari rama bi bae okiyo mini!’ Ina vene usi ga difa. Ruda rena ago neidegiya ri, ori ga re. Mina kana bi vata niyaine, idu meda metona bi evade baina kode.”

10 Resi bi ka niyo, “Gagani tora iniyeiniye ruda regedi, ma ourefeidena vene iniyeiniye ruda regedi.” 11 Kono yagayaga iniye rego; ma adabo ma orefado gauka amiye sana tau rofu mina vata nigedi; ma ori rena beika baika ma rebe toratora omari ogau nigedi. 12 Mina beika tau vata nina koderi, bi ya vene moisi esikaesika ya masi usausa yava ideri ma diburari ya kota rena rofu feidesi kini ma gavana vene di nemokori nai roka dada siri regedi. 13 Mina medari, bi yi ari buni mini amiye di nemokori nai ago nigedi: na sa amei digamo ri, gokai kana vegu veyo mina. 14 Gokai ina vene di ini ago dairi magedi ya rofu mokena bi moina ga refa, a  15 adina bi na yaku ago ma mokena buni ya vene rofu magida. Ye yi tuma vene tau bi yi ago kebi rina anua regedi. 16 Yi nono baba, ma yi dubuiyaka, ma yi usika ourena, ma yi asiyaka yaku ka ya siri regedi; ma ya vene be umuyegedi. 17 Ma amiye tau noibanu na dada ya gedu magedi. 18 Idu yi ada iye yokoimaka kava mina ka de rerevaida ni digo. 19 Uka vari gira mana toga rebigedi mina dudu ya kaya moi vegu rigedi.

Iesu yaku Jerusalem ukerova rigedi di ago niyo

(Mt 24.15–21; Mk 13.14–19)

20 “Iya rededi vene yaku Jerusalem baisi bururi deyo regedi vegedi ri, bi mokefa mina taoni bi evade ukerova regedi. 21 Mina ariri bi ya kaere Judea gaganiri bi omuna rofu ori difa, ma kaere taoni ideri bi feresi ori difa, ma ya kaere taoni etofaro bi ga dui refa. 22 Adina mina meda bi ‘Kaunava vata nigo Meda’, ye vegu tau rofu bura reyadi baisi rama aigedi. b  23 Mirona ituari bi gokai beika no iniyeiniye nono kaere bi rivo nufa ma nono ini mida susu irido rofu vata nigo! Adina bi esikaesika toragade iniye mina kono fafau vata nigo ma Sei di kaunava mina vene fafau yarei dego. 24 Be vene bi bainasi dudu umuyegedi, ma be bi vegu moisi gaganigagani tauri moi digedi. Tutubena dava bouna vene be yaku Jerusalem ri okisi ina vene rofu itei rigedi bogo ini ari bae koina nigo.

Amiye di Mida di dego sina

(Mt 24.29–31; Mk 13.24–27)

25 “Meda, eyo ma iya rofu bi de vena rebe mina ogau nigo. Ma davara ini koru yeiva odoro dadisi kukuroka rebigo mina neidego ri, bi gaganigagani vene tau mina kono tora fafau amededi bi mokena forovai resi ori no iniye nigedi. c  26 Beika vegu mina kono noibanu fafau vata nigedi rofu nari regedi ri, bi amiye yaku ori dudu muyei tamatama regedi. Adina bi oma iya eyo meda ka moi tururu regedi. 27 Resi bi Amiye di Mida seuyari vava tora ma vabara nufari debigo ma vegedi. d  28 Mina reremama vata nigi kora rego ri, bi dadi are resi ne odoro rifa, adina Sei ya moi vegu rigo di meda bi baisi negau niyo mini.”

Fuka yabo kana di ago

(Mt 24.32–35; Mk 13.28–31)

29 Ma Iesu yaku mokena ago yokoi niyo: “Fuka yabo kana ma yabo tau vesi mokefa. 30 Ini bobo ruika fu nisi iye imu rego ri, ya bi nigiya amona bi bae negau nido. 31 Mina makai, mina vegu ogau nibigedi ma vegedi ri, bi ya ya diba Sei di ourefeidena amena sana di ari bi negau nigi rego.

32 “Rama iniye ya vene rofu nida, gua mina ariri amededi vene bi muyena koderi mina vegu tau vata nigo. 33 Oma ma kono di vegu bi koina nigo, idu nai ago bi de muyei digo.

Nari rei mona refa!

34 “Ya kaya nari rei mona refa! Iruku ma koru gira rofu dadaga ga refa. Yi vegu di toe di mokena tau yaku ya moi forovai ga reyaine. De bi, mina meda bae evade iruruka rego ri, tururu regedi baebu ya bi ivota ideri ya moi gira rigedi kana. 35 Adina mina meda bi kono tora noibanu vene tau rofu baisi ogau nigo. 36 Mina dada ari neinei nari rega usausa nifa ya bi yeiva moisi beika tau vata nigo mina rofu ebu regi Amiye di Mida di ini nemokori are regedi.”

37 Ari neinei Iesu bi Sei ni vakena yavari amiye oteimagamo. Idu urusa nigamo ri, bi dadisi Olive yabo di ikari bosi amegamo. e  38 Ari uvegamo ri, bi amiye tau bosi Sei ni vakena yavari egogo resi ini ago nigo mina neidegi.

Copyright information for `KQC