a24.6–7:Mt 16.21, 17.22–23, 20.18–19; Mk 8.31, 9.31, 10.33–34; Lk 9.22, 18.31–33
f24.49:Acts 1.4
g24.50–51:Acts 1.9–11

Luke 24

Iesu dubusa dadi rae reyo

(Mt 28.1–10; Mk 16.1–8; Jn 20.1–10)

Ari uveyo ri uruyaku gorogoro iniye, rema vene dadisi guri sanari sisika buni muramura dogo reyadi mina moi boyadi. Resi bi veyadi bi mina kono guri di ida venari fore bi sena moi kurevai rei etaga riyadi. Idu dui reyadi ri, bi Iesu Warika Amiye di ini rovaita bi de baku reyadi. Mina yaku ina vene di mokena mina forovai reyo dada are regamadi ri, bi evade amiye remanu ina vene atafu are reyadi, ini varuka bi kamakama iniye mina riyadi. Ori resi ini seira kono rofu agu riyadi ri, bi mina amiye remanu yaku ina vene rofu ni kabai resi niyadi, “Beika resi vegu amedo amiye bi muyena amededi vene di fogori maina rededi? Ina bi minari de amedo; ina bi dadi rae reyo. Galilee ri amega beika sina ya nigamo bi mokededi ba ide? a  Yomakai niyo, ‘Amiye di Mida bi vegu no rededi vene di vanari aisi satauro ikoko regedi, idu meda regode koina nigo fufutari bi dadi rae rego.’”

Ini ago kamini mokesi dairiyadi ri, bi beika vata niyo tauvakoi mina amiye eleven ma ini usi dina vene be rofu ni oteimaradi. 10 Mina rema bi Mary Magdalene, Joanna ma Mary, kaere bi James di nono; ma rema be ina vene sa yaku mina vegu ni feidena vene rofu niyo. 11 Idu ni feidena vene yaku mokeyadi mina rema di ago bi tavoi reyadi, ye mokena vari gira de aiyadi dada. 12 Idu Peter bi dadisi raga bosi guri sanari ideri ne rei dui reyo ri, bi varuka buni maka veyo. Kamini beika vata niyo mina tururu rega ini yavari dairiyo.
24.12Bura bedakai bi nanaka 12 nufa de.


Emmaus rautu rofu nana rena

(Mk 16.1213)

13 Mina medari, Iesu di ini usi dina amiye remanu bi rautu roka Emmaus ri bogamadi, Jerusalem gutu ini maike bi 11 kilometre
24.13Greek agori mina bi 60 stadia.
kana.
14 Ina remanu bi mina beika tau vata niyo mina ni dodi regamadi. 15 Mina sina niga ni dodi regamadi ri, bi Iesu iniye bi ina vene atafu nisi kamini vakoi bogamadi. 16 Vegamadi mini, idu de vei mama regamadi ina bi Iesu. 17 Kamini ina vene rofu niyo, “Ya vene bi beika sina niga didedi?”

Kamini ini ne uruma bi iriyeduka dudu are reyadi.
18 Ina remanuri, bi yokoi di roka bi Cleopas, ina yaku kamini ni kabai resi niyo, “Ya bi Jerusalem ri odi okiyo amiye maka baeko, dada ya toto mina meda be koina niyo ri beika vata niyadi bi?”

19 Kamini bi ina vene rofu niyo, “Beika vata niyo?”

Ma ina rofu niyadi, “Iesu Nazareth amiye rofu nisifa, kaere bi Sei di ago nido amiye. Ina bi ini ago ma ini reremama bi yeiva iniye Sei ma amiye di nemokori.
20 Ma uni Sei ma amiye utari naivo vene di warika vene ma uni ourefeidena vene yaku gokai iniye ini vanau moisi muyena ida risi satauro ikoko reyadi. 21 Idu uni uka mokena regamafa bi ina bi Israel moi vegu rigo amiye! Mina beika vata niyo bi meda regode koina niyo mini. 22 Idu gua uni rema vene be yaku una moi tururu reyadi. Uruyaku gorogoro guri sanari bosi 23 bi ini rovaita de baku resi dairi baisi niyadi bi yaduka kana naivonaivo vima ka veyadi. Mina naivonaivo vima yaku ni oteimaradi bi ina bi vegu niyo. 24 Be vene una sa bi kamini dadi guri sanari boyadi ri, bi rema vene yaku niyadi kana makai baku reyadi, idu Iesu bi de veyadi.”

25 Kamini Iesu yaku ina vene rofu niyo, “Ya vene bi ada de iniye; yi mokena bi mukuna tora. Sei di ago nidedi vene di ago tau bi mokena vari gira de aidedi! 26 Ba rorobo ide, Keriso bi mina kana esika moisi ini vabara moigo?” 27 Kamini Moses gutu Sei di ago nidedi vene tau rofu ago buni taugaderi ina dada bura reyadi sina di ini rama mina ni itara reyo.

28 Kamini bogamadi ri, bi rautu ekaira reyadi, idu Iesu bi ebu rei digo kana dudu nana reyo. 29 Idu ni guyaguya reyadi, “Una sa amevo; uriyenau kamini niyo ma doba de urusa nigo.” Dada ina vene sa amegi dui rei boyo. 30 Ina regode iruku irigi ameinu reyadi ri, bi Iesu yaku beredi moisi ni buni resi bi okusi ina remanu maro. 31 Minari ini nemoko bi ne are reyadi bi vei mama reyadi ina bi kaere, ma ina vene di neri roro nisi diyo. 32 Iniyeiniye rofu niyadi, “Uni uka ita kana vaido, idau baigamafa, ago niga Sei di ini ago di ini adina mina ni itara regamo ri ba?”

33 Minari maka dadisi Jerusalem ri dairiyadi. Iesu ini usi dina amiye eleven ma amiye be ina sa bi minari egogo ameyadi baku reyadi. 34 Ina vene yaku ka niyadi, “Rama Warika Amiye bi dadi rae risi Simon rofu ogau niyo!”

35 Ina remanu yaku ida beika vata nigi kora reyo ma gokai vei mama reyadi beredi okuyo ri ni itara reyadi.

Iesu yaku ini usi dina vene rofu ogau niyo

(Mt 28.16–20; Mk 16.14–18; Jn 20.19–23; Acts 1.68)

36 Mina nigamadi ri, bi Iesu iniye ini fogori are resi rofu niyo, “Uka amuta ya sa amefa.”
24.36Bura bedakai biresi rofu niyo, “Uka amuta ya sa amefa”nufa de.


37 Idu ina vene bi ori yaku no iniyeiniye nisi ini mokenari bi muyena vima yokoi vegamadi. 38 Idu Iesu yaku niyo, “Beika resi yi mokena forovai redo ma yi uka deda ni kaitena ago mina baidedi? 39 Nai yuka vana vefa, mina bi na mini; na avaka moisi vefa. Adina vima bi musa nena koina ma vededi na bi nai musa nena nufa.”

40 Mina ni vau resi bi ini yuka vana oteimaro.
24.40Bura bedakai be nanaka 40 nufa de.
41 Idu tururu resi ada yaku no iniye niyadi rofu, mina bi ofa ba rama moi mokena forovai reyadi, dada Iesu yaku niyo, “Iruku keika be amedo ba, ide?” 42 Ina vene yaku oyena kiro reyadi di ini tu yokoi maradi 43 ma ini nemokori bi moisi iriyo.

44 Resi bi ina vene rofu niyo, “Mina bi nai ago ya sa amega nigamaka: na dada beika tau bura reyadi Moses di ini ago girari, Sei di ago nidedi vene di burari ma psalms bukari. Mina tau bi baisi rama aiyaine.”

45 Dada ini mokena moi vabara reyo Sei di agori beika bura reyadi vei mama reyaganedi, 46 resi ina vene rofu niyo, “Yomakai bura reyadi: Keriso bi mina kana esika moigo rofu meda regode koina nigo ri, bi muyena sanari gutu dadi rae rigo. 47 Dada Keriso ini roka dudu vegu no feresi moi etaga rina vegu no koite makuna rofu di ago ouresi Jerusalem gutuna gaganigagani tau rofuri ni odoro rei diga boga reyaine. 48 Ya vene yaku mina vegu tau bi yi nemokori veyadi rofu oteimagedi. Mina dada ya vene yaku ni oku rausi regedi. 49 Dada, nai Baba yaku ya mago vo niyo mina, bi na yaku ya vene fafau ni feidei degida. Ya bi taoni ideri tua reyaine mamo mina vava yaku ya fafau ni vai rego.” f 

Iesu bi omari afei boyo

(Mk 16.19–20; Acts 1.911)

50 Kamini Iesu yaku ina vene taoni gutu afei boyo Bethany atafu, ini vana moi odoro resi ni buni toragade maro. g  51 Mina ni buni toragade magamo ri, bi ina vene rofu etaga riyo ma oma odoro afei boyo.
24.51Bura bedakai bima oma odoro afei boyonufa de.
52 Ina vene yaku ini roka moi odoro resi ada tora iniye dudu Jerusalem rofu dairiyadi. 53 Kamini Sei ni vakena yavari ari neinei Sei rofu buni toragade magamadi.

Copyright information for `KQC