a15.21:Rom 16.13
b15.24:Ps 22.18
d15.28:Is 53.12
e15.29:Ps 22.7, 109.25; Mk 14.58; Jn 2.19
f15.34:Ps 22.1
g15.36:Ps 69.21
h15.38:Ex 26.31–33

Mark 15

Iesu bi Pilate di nemokori aiyadi

(Mt 27.1–2, 11–14; Lk 23.1–5; Jn 18.28–38)

Ari kuifa uruyaku niyo ri, Sei ma amiye utari naivo vene di warika vene, tora vene ma ago gira oteimana vene kanisoro vene tau sa bi ini ago evade ni rorotari reyadi. Iesu bi maena ukita nufa sa afei desi Pilate di vanari aiyadi. Pilate yaku ni kaiteyo, “Ya bi Jew vene di kini ba?”

Ma ni kabai reyo, “Ya bi mina niyo.”

Sei ma amiye utari naivo vene di warika vene bi ago gira dudu ni tourage regi kora reyadi. Ye Pilate yaku dubusa ni kaiteyo, “Ya bi de ni kabai regiya ba? Ya veisa ba de, gokaisanu ago no tau fafau ya ni kake rededi?”

Idu Iesu bi sina nokoi de ni kabai reyo, ma Pilate bi vima diyo.

Iesu di umuyena ago

(Mt 27.15–26; Lk 23.13–25; Jn 18.39—19.16)

Mina Passover di irakuna ari neineiri bi tutubena ini toutou dudu amiye yaku ini ura rededi amiye nokoi bi dibura yavari yakugo. Ma amiye roka Barabbas bi gavmani rofu ruda rena vene sa dibura yavari amegamo. Ina bi mina gavmani rofu ruda rena vegu dudu amiye umuyeyadi. Amiye tau bi Pilate rofu baiyadi ini mina ari okido ri rei baido kana ni kaiteyadi. Pilate yaku mina vene ni kaiteyo, “Yi ura rededi bi Jew vene di kini moi yakugida ba?” 10 Pilate bi sena diba niyo Sei ma amiye utari naivo vene di warika vene bi gonema dudu Iesu ini vanari aiyadi.

11 Idu Sei ma amiye utari naivo vene di warika vene bi amiye tau di uka moiyadi, ye Barabbas moi yakuyainedi. 12 Pilate dubusa ina vene ni kaiteyo, “Na bi beika regida Jew vene di kini rofu?”

13 Raka nisi niyadi, “Satauro ikoko re!”

14 Idu Pilate yaku ni kaiteyo, “Gokai, beika no be reyo?”

Idu mina vene bi imuna ni tora reyadi, “Ina bi satauro ikoko re!”

15 Ye amiye tau di uka moi ada regi Pilate yaku ina vene di bi Barabbas moi yakuyo. Ma Iesu ina vene di vanari aiyo ma uyadi resi sataurori ikoko regedi.

Ruda vene Iesu ni kuruyadi

(Mt 27.27–31; Jn 19.2–3)

16 Ruda vene yaku Iesu gavana nokoi di yava torari afei boyadi. (Mina yava di roka bi Praetorium.) Resi ruda vene tau raka ni egogo reyadi. 17 Resi varuka kaka doba ina rofu aku masi yabo imiye dudu tete resi ini adari aiyadi. 18 Ma Iesu rofu raka nigi kora reyadi, “Toga amei baido, Jew vene di kini!” 19 Dubusa ma dubusa ini adari yabo doi dudu usi ayaka su reyadi. Efuka meimisi ni kuruyadi Iesu rofu. 20 Ma kamini mina ni kuruyadi koina niyo ri bi varuka kaka doba bi kutusi iniye di varuka mina aku maradi. Kamini afesi yakuyadi satauro ikoko regi.

Iesu satauro ikoko reyadi

(Mt 27.32–44; Lk 23.26–43; Jn 19.17–27)

21 Idau Cyrene amiye nokoi ini roka Simon kaere bi Alexander ma Rufus di baba bi mina baku reyadi. Ina bi muro gagani gutu digamo ri ni guba reyadi ma satauro uakaiyaine. a  22 Iesu bi afei okiyadi gagani roka Golgotha. Mina ago di ini adina bi “Ada Girika di Gagani.” 23 Kamini waini muramura roka myrrh sa maradi idu moina de reyo. 24 Ma kamini satauro odoro ikoko resi laki dudu isira reyadi kaere yaku bi ini varuka berou eta mina moigo. b  25 Iesu bi satauro odoro ikoko reyadi ri bi meda nemoko naini uruyaku. 26 Ini no ni kake regi bi yomakai dudu bura riyadi: “Jew vene di kini.” 27 Dumaduma amiye remanu ina sa ka satauro odoro ikoko reyadi, nokoi bi ini vana rama rofu ma nokoi bi ini enana rofu,
15.27Bura bedakai bi nanaka 28 nufa:Mina ida dudu Sei di ago bura rena bae rama aisi niyo, “Ina bi vegu no amiye sa toe moiyadi”(Lk 22.37 baku re).
,
d 

29 Amiye kaere ini adina ma digamadi bi ada buro regasa ni ninika regamadi, resi niyadi, “Ye, ya yaku bi Sei ni vakena yava ukerova regiya ma meda regodenuri dubusa akugiya vo niyo! e  30 Sataurori soka rei desi ya kaya moi vegu ri!”

31 Mina ida nokoimakari Sei ma amiye utari naivo vene di warika vene ma ago gira oteimana vene ka iniye ni ninika regasa nigamadi, “Amiye bi moi vegu riyo, idu iniye moi vegu rina be egere de! 32 Mina Keriso, Israel di kini, satauro gutu soka rei dego ma vesi uka vari gira magifa!”

Ma kaere ina sa vakoi moi satauro ikoko reyadi vene ka ni ninika reyadi.

Iesu di muyena

(Mt 27.45–56; Lk 23.44–49; Jn 19.28–30)

33 Meda nemoko tobo niyo ri, bi gagani tora noibanu bi mukuna ya fono resi meda nemoko regodenu koina niyo. 34 Ma meda nemoko regodenuri, Iesu bi ababa nisi raka ni tora reyo, “Eloi, Eloi, lema sabchthani?” ago adina bi, “Nai Sei, nai Sei, beika resi makai na ferei tavoi reyo?” f 

35 Kamini amiye be kaere ina atafu are regamadi bi neideyadi ri niyadi, “Neidefo, ina bi Elijah raka nido!” 36 Amiye nokoi bi raga resi sipanisi waini viniga safi buni de ideri aisi koduri aisi Iesu rofu moi odoro risi maro duduka reyainedi. Ina yaku niyo, “Kode, vena kumo Elijah desi moi soka rego ba de!” g 

37 Raka tora nisi asa you feideyo.

38 Sei ni vakena yava di keten varuka bi odoro gutu uvesi rei neyo doka rofu. h  39 Ma kamini ruda vene di ourefeidena amiye tora bi Iesu di nemokori are regamo ri bi Iesu di gokai muyeyo,
15.39muyeyo;bura bedakai biraka nisi muyeyonufa
mina vesi niyo, “Rama iniye mina amiye bi Sei di Mida!”

40 Rema bedakai bi maikeri gutu are vegamadi. Ina vene sa bi Mary Magdalene, Mary kaere bi usika James ma Joseph di nono ma Salome. j  41 Mina rema vene bi Galilee ri Iesu usi disi aedegamadi. Ma rema taugade kaere bi Jerusalem ri ina sa baiyadi ka minari.

Iesu guri aiyadi

(Mt 27.57–61; Lk 23.50–56; Jn 19.38–42)

42 Mina bi dogodogo meda orefasi bi Sabati. Ye uriyenau nigi regamo ri, 43 Joseph, Arimathea amiye, kaere bi kanisoro tora nokoi, ma ina bi Sei di ourefeidena amena sana baigo mina tua regamo, bi rovaita gira dudu Pilate rofu boyo, Iesu di rovaita usa niyo. 44 Pilate bi Iesu sena muyeyo ago mina neidesi tururu reyo. Bi ruda vene di tora amiye yokoi mina ni kaiteyo Iesu bi sena muyeyo ba. 45 Ruda amiye Pilate rofu niyo ri muyeyo mamo Joseph rofu niyo bi Iesu di rovaita moigi digo. 46 Ye Joseph bi varuka buni voi resi ini rovaita moi soka reyo. Kamini mina varuka dudu kumu risi kono guri bi fore ideri goiyadi bi ini rovaita mina ideri aiyo. Kamini fore moi kurevai resi guri di ida vena biri riyo. 47 Mary Magdalene ma Mary kaere bi Joseph di nono ka veyadi Iesu aiyadi sana bi.

Copyright information for `KQC