b2.23:Deut 23.25
c2.25–26:1 Sam 21.1–6
d2.26:Lev 24.9

Mark 2

Iesu dibo anua yuka kevo amiye moi buni riyo

(Mt 9.1–8; Lk 5.17–26)

Meda be koina niyo ri, Iesu bi dubusa Capernaum taoniri dairiyo, rautu vene bi okiyo ago mina neideyadi. Ye amiye taugade egogo reyadi ri yava ida duidui sana ka vata baiyo ma Iesu yaku sina buni ni oteimagamo. Mina fuofuori amiye vana raro okiyadi, dibo anua yuka kevo amiye uakaisi Iesu urana reyadi. Idu amiye taugade dada mina amiye ina rofu moi dui rena bi anua reyadi. Dada Iesu amegamo sana ramari yava tebo maka nuruyadi. Ye dibo anua yuka kevo amiye bi ekama fafauri aisi moi feide neyadi. Ye Iesu yaku mina amiye vana raro di uka vari gira aiyadi veyo ri mina amiye rofu niyo, “Nai mida, yi vegu no bi koite makuyaka.”

Ago gira ni feidena vene be minari amegamadi ma ina kaya mokeyadi, “Gokai resi mina kana sina nido? Mina bi Sei di ini roka moi no rido! Sei maka amiye di vegu no moi koite makugo!”

Evade maka Iesu bi amiye di ini mokena ini ukari veifateyo, ye ina vene rofu niyo, “Beika resi makai yi ukari mokededi? Goina ago nigida bi buni, dibo anua yuka kevo amiye rofu, ‘Yi vegu no bi koite makuyaka,’ o ‘Dadisi yi ekama moisi nana re?’ 10 Idu, ya vei mama regedi Amiye di Mida bi vava nufa konori vegu no koite makugo.” Kamini Iesu yaku dibo anua yuka kevo amiye rofu niyo, 11 “Ya nida dadisi yi ekama vanau moisi rautu di!”

12 Ye tau noibanu vegamadi ri, mina amiye evade maka dadisi ini ekama moisi yaku diyo. Ina tau noibanu tururu resi Sei di roka moi odoro resi niyadi, “Sena mina vegu kana be de veyafa!”

Iesu yaku Levi raka niyo

(Mt 9.9–13; Lk 5.27–32)

13 Iesu bi kamini dubusa Galilee di koru moka seriri dairiyo ma amiye toragade bi ina rofu okiyadi, ma oteimagi kora regamo. 14 Ye nana rei bogamo ri fore butu redo amiye Levi veyo, Alphaeus di mida, bi ofesiri amegamo. Iesu yaku ina rofu niyo, “Na usi baivo.” Levi dadisi usi diyo.

15 Gabi bi Iesu Levi di yavari
2.15Levi di yavari;oini (mina bi Iesu di) yavari.
iruku irigamo ri fore butu rededi vene ma vegu no rededi vene toragade okisi Iesu ini usi dina vene sa ameinu resi iruku iriyadi, ini adina bi amiye toragade usi diyadi.
16 Pharisee di ago gira ni feidena vene, nei resi Iesu veyadi iruku irigamo vegu no rededi ma fore butu rededi vene sa, ye ini usi dina vene ni kaiteyadi, “Beika resi makai kana vene sa iruku irido?”

17 Iesu yaku neidesi ni kabai reyo, “Amiye buni bi gauka dogo amiye de mokegedi, idu gauka vene maka. Na bi mokena rorobo vene rofu disi raka nigi de okiyaka, idu vegu no rededi vene rofu okiyaka.”

Oyo rena ida ni kaitena ago

(Mt 9.14–17; Lk 5.33–39)

18 Meda yokoiri John Baptist ma Pharisee di usi dina vene yaku oyo regamadi. Amiye be okisi ina rofu ni kaiteyadi, “Beika resi John Baptist ma Pharisee vene di usi dina vene bi oyo rededi, idu yi usi dina vene bi de?”

19 Iesu yaku ni kabai reyo, “Ye ya bi toro de regedi, amiye bi rema voiri rauna de regedi? Ide mada! Mena rumana ina sa amegamo ri bi ina vene yaku iruku oyo de regedi. 20 Idu mina meda baigo ri mena rumana ini vene rofu moi digo, mirona medari mamo iruku oyo regedi.”

21 “Amiye yokoi de ruaka ma koitena de varuka ya varuka kori fafau faniya de rego, adina bi varuka ruaka ya moi rutu rego ma varuka kori uvesi rego ma ruba moi tora rigo. 22 Ma amiye yokoi de waini ruaka moisi waini kori di ro ideri aigo; bema rego ri, ro ufatego, ma waini ma ro bi no nigo; mina dada waini ruaka bi waini ruaka di ro ideri rausi regiya.”

Sabati di ni kaitena

(Mt 12.1–8; Lk 6.15)

23 Iesu bi Sabati medari witi muro ideri nana diyo. Ini usi dina vene ka ina sa nana diyadi. Boyadi ri ina bi witi di ada imu moiyadi. b  24 Ma Pharisee vene yaku niyadi, “Neide, Sabati meda una rofu bi tabu yi usi dina vene yaku beika reyadi?”

25 Iesu ni kabai reyo, “Ya de bura veyadi beika David ini amiye sa mirona medari yaku reyadi, iruku koina niyo ma rauna reyadi ri, c  26 ye Sei di yava ideri dui resi beredi iriyo Sei rofu maradi. Mina vata niyo ri Abiathar bi Sei ma amiye utari naivo amiye tora. Ago gira una rofu ya nido bi tabu Sei ma amiye utari naivo vene maka bi mina beredi irigedi. Idu David bi irisi ini amiye ka maro.” d 

27 Ma Iesu niyo, “Dada Sabati bi amiye di buni rofu riyo; amiye bi Sabati rofu de riyo. 28 Adina Amiye di Mida ka bi Sabati meda di ini Warika Amiye.”

Copyright information for `KQC