Ruth 1

Elimelech ini rema mida sa Moab gaganiri roku reyadi

Senagisenagi, mirona ituari ourefeidena vene tora amegamadi ri
1.1Kini de ameyo.
, adabo minari negau niyo. Bethlehem amiye yokoi Judah ri, ini rema ma rumana mida remanu sa, Moab gaganiri roku reyadi.
Mina amiye di roka bi Elimelech ma ini rema di roka bi Naomi, ma ini mida remanu di roka bi Mahlon ma Chilion. Ina bi Ephrathah vene, Bethlehem taoni, Judah gagani vene. Ma disi Moab gaganiri amegamadi. Amegamadi ri, Naomi di maruka Elimelech muyeyo, ma ini rumana mida remanu sa amegamadi. Moab rema meyadi, ini roka bi Orpah ma Ruth. Lagani vana ufo amegamadi ri, Mahlon ma Chilion ka muyeyadi ma Naomi bi maruka ma mida de inike amegamo.

Naomi ma Ruth Bethlehem ri dairiyadi

Gabi Moab ri neideyo bi Warika Amiye yaku amiye di rauna moyari aedesi iruku rau regamo. Naomi ini radini remanu sa mina gagani ferei digi dogo reyadi. Ini radini remanu sa, ini amegamadi sana feresi Judah gagani di ida moiyadi. Kamini Naomi yaku ini radini remanu rofu niyo, “Ya remanu yi nono di yavari dairigedi. Warika Amiye buni toragade ya rofu moi ogau reibigo, na rofu ma yi muyenari regamadi kana.  Warika Amiye ya remanu rofu yi gado variyaganedi rumana bouna ya mago.”

Kamini ina remanu fuka reyo ma rema remanu isaka nigasa
10 niyadi, “Una bi yi vene rofu ya sa gogo dairigifa.”

11 Idu Naomi yaku niyo, “Dairifa nai vefa vene. Beika maina na sa baigedi? Ye nai rumana mida be moigida, ma yi maruka nigedi ba? 12 Rautu dairifa, nai vefa vene. Na bi rumana moina rofu, kamini ugava niyaka. Gokai beika nai mokenari uka mokedo gua urusari maruka nufa mida evata rigida vo nisi, 13 nari de regedi ma ina tora nigedi ri. Ya bi mena de regedi ma ina tua regedi ba? Ide, nai radiyaka, na rofu bi vegu gira tora, ya kana ide, ini adina Warika Amiye na rofu gedu maro.”

14 Mina neideyadi ri dubusa isaka niyadi. Kamini Orpah yaku ini radini fuka resi yuata niyo, idu Ruth yaku ini radini moi gira reyo. 15 Naomi yaku niyo, “Na ve kumo, yi nabore bi dairido ini vene ma ini sei
1.15sei;basei vene.
rofu. Ini vegu kana re.”

16 Idu Ruth ni kabai reyo, “Na bi na ni guba ga re ya yaku feresi dairigida bi. Goidu digiya na ka digida, ma goidu amegiya na bi ya sa amegida. Yi vene bi nai vene ma yi Sei bi nai Sei. 17 Goinari muyegiya na ka muyegida, ma mironari na guri aigedi. Warika Amiye yaku kaunava giragira na maraine, muyena yaku maka una gaima rigo vo nisi.”

18 Naomi yaku Ruth veyo ri, bi ina sa dina vata rego, mina resi dairiyainedi ni guba de reyo.

19 Ye ina remanu disi Bethlehem ri okiyadi. Bethlehem okiyadi ri, rautu vene vesi tururu reyadi ma rema vene yaku ago ni tona dudu niyadi, “Aee, mirona bi Naomi ba?”

20 Ina vene rofu niyo, “Naomi vo nisi nai roka ga nifo, idu nai roka Marah
1.20 Naomi….Marah:Hebrew agori Naomi bi “safi” idu Marah bi “gira.”
nifo, adina Warika Amiye Vava yaku nai vegu di ida moi gira reyo.
21 Na bi gugura fore nufa diyaka, idu Warika Amiye yaku notoka na moi dairiyo. Beika resi Naomi roka nidedi? Adina Warika Amiye yaku esika na maro, Warika Amiye Vava yaku no na fafau aiyo.”

22 Ye Naomi, ini Moab radini Ruth ya ota risi Moab gagani feresi Bethlehem ri dairiyadi, barley
1.22 barley:Ina bi witi o koni o raisi asini.
ini butubutu rena di medari.

Copyright information for `KQC