a2.2:Lev 19.9–10; Deut 24.19
c2.20:Lev 25.25

Ruth 2

Ruth bi Boaz di murori moimai regamo

Ma Naomi bi ini usika ourena nufa ini maruka di eta rofu, Elimelech rubu rofu, roka nufa ma gugura nufa amiye, ini roka bi Boaz. Ma Ruth Moab rema Naomi yaku niyo, “Na ni kumo murori nesi barley ada bubudo fereyadi butu rigida. Nai mokei vava reida amiye yokoi yaku na moigo ma ina sa moimai regida.” a 

Ma Naomi yaku ina rofu niyo, “Mo bovo, nai vefa.”

Ye Ruth yaku murori nesi moimai vene usi digamo, moiga ferena barley ada bubudo butu rigamo. Iniye veyo ina bi Boaz di muro, kaere bi Elimelech di ini ruburi, moimai reyo.

Mina ituari Boaz Bethlehem gutuna okisi baiyo ma moimai vene rofu niyo, “ Warika Amiye bi ya sa!”

Ina yaku ni kabai niyadi, “ Warika Amiye yaku buni toragade ya mabobigo!”

Ma Boaz yaku moimai ourefeidena amiye ni kaiteyo, “Mirona bi kaere rema ofi?”

Ourefeidena amiye yaku ni kabai reyo, “Ina bi Moab gagani rema yokoi, kaere bi Naomi sa Moab gagani gutuna dairi baiyadi.” Mina rema yaku niyo, “Na ni kumo moimai vene usi barley butu rigida.” Murori nesi moimai kora reyo uruyaku gutu uriyenau niyo, “Minari bi neitua maka duduburi asa moiyo.”

Resi Boaz yaku Ruth niyo, “Nai vefa, nai mokena sina buni ya nigida. Bouna sanari ga buturi idu mina murori maka nai moimai rema vene sa maka moimai re. Murori rumana vene yaku nugasi butu ridedi mina rema vene usi diga tuta buturi. Na bi rumana vene ni oteimaraka, ga ya avaka moiyaganedi, ma koru vaigiya ri moimai rumana vene yaku koru biyori usi aiyadi mina moisi iri.”

10 Ye Ruth neideyo ri bi kuri agu risi ini ne kono masi Boaz rofu niyo, “Beika buni baku reyaka, na bi yava ika rema ma beika resi na rofu yi uka na maisa?”

11 Boaz yaku ni kabai reyo, “Yi maruka muyeyo gutuna baiyo ya yaku yi radini rofu beika regamo bi na niyadi, gokai yi nono baba ma yi ode yava feresi ma amiye toto vene sa ameisa. 12  Warika Amiye yi beika buni reyo ini obini dairi ya mago. Warika Amiye, Israel di Sei, kaere ini ada gabireri ya rau redo, yaku ini obini tau ya mabobigo.”

13 Ruth yaku ni kabai reyo, “Nai warika amiye, ya yaku yi nemokori buni toga na mavo. Yi naivo rema rofu amuta dudu ago na ni maisa, idu na bi yi naivo rema yokoi kana de.”

14 Iruku iridedi ri Boaz yaku Ruth niyo, “Minari bae desi beredi be moigiya rofu waini ideri birisi iri.” Muro rena vene sa ameinu reyo ri, Boaz yaku barley oriyadi mina be maro. Iruku iriyo rofu uka bere nisi bafu be fereyo. 15 Mina usi dadisi neyo barley butu rigi ri, Boaz yaku ini moimai vene ni mama reyo, “Tau rigedi sanari moigo ka ga vega nifa. 16 Idu tau riyadi sanari ini rata be moisi ae magedi ma butu riyaine. Ina rofu ga ni vai refa.”

17 Ye Ruth barley butu riyo ma uriyenau niyo, kamini tau risi mina utei reyo. Ini toe bi 10 kilogramme
2.17Hebrew agori bi “ephah”.
kana.
18 Mina adodisi taoni dairiyo ma gokaisa tau moiyo mina ini radini yaku veyo. Beika irisi bafu fereyo mina ka moi yakusi ini radini maro. 19 Naomi yaku ini radini ni kaiteyo, “Ya bi gua goinari butubutu reyo? Kaere di sanari moimai reyo? Mina amiye kaere yaku ya vei mama riyo ina rofu bi buni toragade!”

Mina usi Ruth yaku ini radini ni oteimaro kaere amiye di ini sanari moimai regamo. Niyo, “Mina amiye gua ina sa moimai reyaka di roka bi Boaz.”

20 Naomi yaku ini radini rofu niyo, “ Warika Amiye yaku buni toragade ina rofu mabobigo! Ini mokei tora bi toga rei baido muyena ma vegu vene fafau.” Dubusa niyo, “Mina amiye bi uni davatu yokoi, uni usika ourena toe erufudo amiye yokoi.” c 

21 Kamini Moab rema Ruth yaku niyo, “Boaz yaku ka na rofu niyo, ‘Nai moimai vene sa amegiya bogo nai barley moimai rededi mina moi koina regedi.’”

22 Naomi yaku ini radini Ruth rofu niyo, “Nai vefa, buni bi ini ofi vene sa dibigiya, ini adina amiye be di murori digiya ri yaugedi baebu.” 23 Ye Ruth bi Boaz di ini moimai ofiofi adinau amei diga butubutu regamo boyo barley ma witi dogo reyadi koina niyo. Ma ini radini sa amegamo.

Copyright information for `KQC