a1.4:2 Cor 8.23; Gal 2.3; 2 Tim 4.10
b1.6–9:1 Tim 3.2–7

Titus 1

Na Paul, kaere bi Sei di ini moimai rei tavoi reida amiye, ma Iesu Keriso di ini ni feidena amiye mina bura reida.

Mina reida dada Sei yaku ini vo nisi niyo vene bi ini uka vari gira aigedi resi sina rama di mokena moisi Sei yaku ini mokena kana regedi. Resi toga amegifa vegu di uka mokena moigifa goina bi Sei ofa de nido yaku ari dobau sena ni tore reyo.
Ma iniye ini niyo medari ini ago moi ogau riyo, Sei, una moi vegu rina amiye di ago gira fafau mina oteimana moimai na maro.

Titus mina fefa bi ya rofu bura reida. Ya bi nai mida kana, adina ya bi na sa vakoi Sei rofu uka vari gira aisifa. a 

Sei uni Baba ma Iesu Keriso kaere yaku una moi vegu rina amiye yaku buni toragade ma uka amuta ka ya mago.

Titus di moimai Crete ri

Crete ri ya fereyaka di adina bi beika moi koina de fereyafa mina moi koina reyainedi, ma ya niyaka kana dubu ourefeidena vene taoni neineiri aiyainedi. Mina ourefeidena amiye bi ini vegu no yokoi de, rema yokoimaka meyo amiye, ini midamida kaere bi Sei rofu uka vari gira aidedi ma rei tavoi de ma anema yora midamida. b  Mina ourefeidena amiye bi Sei di moimai reibigo mina resi, ina bi vegu no yokoi de redo amiye, iniye maka mokena de redo amiye, ma evade maka gubuyo de redo amiye. Ma koru no irina amiye de, ruda rei tavoi amiye de, ofaofa dudu bakubaku de redo amiye. Idu ina bi amiye gaba redo, amiye kaere bi vegu buni rofu uka mado, ma ini yuka vana nari redo amiye, berouberou rofu rorobo nido amiye, ma ina bi akeke amiye, ma iniye moi rorobo rido amiye. Ago rama oteimadedi mina moi gira kiki rebiyaine, ye ina yaku mina ago rama dudu amiye egira rego ma amiye kaere yaku ago rama rofu tourage rededi mina vei mama reyaganedi.

10 Adina Jew vene taugade kaere ekalesia vene niyadi bi ago neidena de vene, sakua vene ma amiye ofarosi rena vene. 11 Mina vene bi moi babo rigiya, adina ofaofa dudu fore moigika beika de oteimana ago mina oteimagasa usika ourena tau di varena amena moi no ridedi. 12 Iniye di ini ago nido vene yokoi yaku ka niyo, “Crete vene bi ari neinei ofaofa nidedi vene, tuma dona kana ma amei tavoi regasa iriku vene vo niyo.” 13 Mina sina bi rama. Mina resi, mina vene rofu sina gira nigiya, ye ini mokena vari gira aibigedi ri bi rama maka rebigedi, 14 ma Jew vene di sisina sina rofu o kaere ago rama rofu fufuta madedi vene di sina rama rofu di anema aina ga reyagane. 15 Amiye kaere bi ini vegu no yokoi de Sei di nemokori bi, beika tau mina bi ina rofu no yokoi de. Idu kaere vegu no nufa amiye ma Iesu rofu uka vari gira de aidedi, bi beika tau rededi bi buni de. Mina di adina bi, ini mokena ma ini uka di mokena bi kino nufa. 16 Ina iniye ni kake rededi bi ina bi Sei diba, idu ini reremama rededi yaku bi ina bi Sei ina diba de. Ini vegu no yaku Sei ura de iniye rededi, ma Sei di ago gira neidena ura de, ma beika buni rena rofu bi anua rededi.

Copyright information for `KQC