a3.12:Acts 20.4; Eph 6.21–22; Col 4.7–8; 2 Tim 4.12
b3.13:Acts 18.24; 1 Cor 16.12

Titus 3

Ekalesia vene are rei gira rena

Amiye tau dubusa ni oteima kumo rautu di ourefeidena vene ma gavmani vene di vava gabireri amesi ini ago neidegasa moi gira reyagane. Beika moimai buni maka regika ameibiyagane, resi amiye rofu ni fafana rena de, idu amiye sa ave nisi kumo auta regasa amena maka rebiyagane, resi mina vegu rama amiye rofu reisa yaku amiye oteimago, ya gokai kana amiye bi. Una ka sena bi, mokena buni yokoi de ago ka neidena de, rei tavoitavoi regamafa, una ofarosi regamadi ma rovaita moi ada regika vegu no yaku una ourefeidegamo. Una yaku uni mokena no magamafa ma amiye be rofu ka uka no magamafa. Una yaku amiye be rofu gubuyo regamafa, ma uniyeuniye ka gubuyo regamafa. Idu, uni moi vegu rina amiye Sei di ini uka buni ma uka mana amiye rofu di bae ogau niyo ri, vegu buni ma mokena rorobo reyafa dada una moi vegu rina de reyo, idu ini uka iriyeduka dudu yaku una moi vegu riyo. Vima Kikifa di vava dudu una koiteyo ma dubusa vata niyafa resi ruaka niyafa, makai dudu una moi vegu riyo. Iesu Keriso una moi vegu rina amiye yaku beika reyo fafau, Sei yaku ini uka noibanu dudu ini Vima Kikifa una fafau moi urafo reyo. Ye makai dudu, uni no koiteyo ini buni toragade dada, resi ini midamida nigika toga ameibobina di uka mokena moibigifa ri. Mina sina bi rama sina.

Gua ya ura reida bi, mina sina besa nigiya, kumo kaere Sei rofu di uka vari gira aiyadi vene bi ni kumo kimo mokena buni dudu vegu buni rebigedi. Amiye rofu mina moimai buni sina bi buni ma amiye tau buni baku regedi.
Idu deda kayamo ma tutubena ini vata ni baiyadi sina ma ita rafu sina ma Jew vene di ago gira dada kayamo rededi mina feregiya, adina mina sina tau beika buni yokoi ka de rigo o buni yokoi de moi vata rigo. 10 Kaere amiye yaku ekalesia vene moi etaga risi nanaka redo amiye bi ouresi nigiya; de ya neidego ri bi dubusa nigiya, mina de ya neidego ri bi kaini ferei tavoi rei. 11 Minari mamo vei mama regiya mina amiye bi mokena buni feresi vegu no redo amiye; vegu no redo dada iniye di ini no yaku moiyo.

Oteimana ago di ini metona

12 Artemas o Tychicus ni feidegida ya rofuri bi, ida maina resi na rofu baigiya Nicopolis taoniri adina bi mina itu ariri bi mironari amegida vo nisi mokeida. a  13 Zenas, kaere bi ago gira ni feidena amiye ma Apollos yaku ini dibo regedi ri aede monamona ka refo resi vefo kumo gugura fore moi mona ka reyagane. b  14 Uni vene moimai buni di mokena moi gira reyagane resi, ari neinei di gugura fore moi negau reyagane ma vare tavoi amei tavoi bi ga reyaganedi.

15 Amiye tau na sa yaku ini yuata ka ni feidededi ya rofu. Kaere vakoi mokena vari gira aiyafa dada una uka madedi, ka uni yuata ni feidesifa mina ma.

Sei di buni toragade iniye bi ya vene tau sa.

Copyright information for `KQC