a10:4Diutolonomi 24:1-4; Metiu 5:31
b10:6Pakanemo 1:27, 5:2
c10:7-8Pakanemo 2:24
d10:19Exodus 20:12-16; Diutolonomi 5:16-20

Mark 10

Waigose ena titikuna

Yesu mba dobuna i ḡose bi i nawa Diudia bi Dioudan gaubina i damani, noi nevanemo suwala ena ani lovotava yawaninemo. Bi ḡome lava kumna a tava munaḡa bi i wai lovelovedi, mai laḡan matabuna i voivoiyena mai.

Palisi ḡesaudi Yesu wai laulubuna a ḡoye aubaina te a nato lisinemo bi aitalaye, “Eda waiḡake i wai anine ee geḡa, te oloto mwanena ya gose?”

Bi Yesu waitalamo i giuwedina gado, “Mousis waiḡake i vitevitemina bainewa i giu?”

Tedi a giuna gado, “Mousis ena waiḡake i waianina te oloto waiḡose pepana ya kuli mwanena ya vite bi muliḡa ya giukamaḡe ya nawa.” a 

Kamaina bi Yesu i giuwedina gado, “Mousis mba waiḡakena aubaimi i kulina, banina temi nopomi i ḡaiḡai aubaina. Bi niga ko noḡoti, wala pakanemo Maimaituwa dobu i voivoiye laḡannemo, tana lava i voiyedi, oloto bi waivini. b  Taunana aubaina oloto tamana bi tinana ya gosedi bi mwanena vaitena sa miya ḡemota, c  bi tedi labuidi tubuḡa ḡemota sa tubuḡa. Niganana tedi mote labu bi ḡemota. Taunana aubaina Maimaituwa tedi i wai ḡemotidina mote lava i mai dabalalidi.”

10 Muliḡa tedi a munaḡa vanuwemo bi Yesu ena tauwaikaiwatana aitalaye niḡa giuna aubaina. 11 Kamaina bi tana i giuwedi, “Bamoda oloto waivini i gose bi waivini ḡesau i naḡina, ba mwanena ya vavawaidoḡa. 12 Bi kota mainana, waivini ena oloto i gose bi oloto ḡesau i naḡina, ba mwanena ya vavawaidoḡa.”

Yesu bi libilibi kekelikidi

13 Lava ḡesaudi libilibi kekelikidi a natomedi Yesu lisinemo te tana maso nimana dabedimo i sako, bi geḡa te ena tauwaikaiwatana lava ai ḡakedi. 14 Yesu mainana i kitakitana ba ena tauwaikaiwatana lisidimo nuwana i medi bi i giuna gado, “Libilibi koi aninedi sa nato lisigumo mote komai ḡakedi, banina Maimaituwa ena waibada lava aubaidi mai niga libilibidi. 15 Yea giugiu kauwemi, bamo te aiyai Maimaituwa ena waibada mote i mai anine bi i ma vai, mai libilibi kekelikidi edi yawasana mai, ba tana kaka mote Maimaituwa ena waibada noponemo ima sola saḡa.” 16 Kamaina bi libilibi i bewedi kalonemo i sivudi bi nimana dabedimo i sako bi i laupali, te Maimaituwa ya kavisuvisudi.

Oloto waiguyauna yawasana ilailala aubaina i waitala

(Metiu 19:16-30; Luk 18:18-30)

17 Kamaina bi Yesu i modina i nawanawa etamo bi oloto i velau i tava Yesu matanemo bi tuwapekana doḡamo i wai tupagwaliye. Bi i giuwena gado, “Tauwailovelove visuvisum, bai yea voiye bi yawasana ilailalana yea vai?”

18 Bi Yesu oloto i giuwe, “Bai aubaina kuna giu visuvisugu? Aiyai mote i visu, Maimaituwa taunaḡa i visu. 19 Em waitala aubaina, waiḡake tam kuna sibedi: Mote kumai peki, mote mwanem kuma vawaidoḡa, mote kuma danene, lava mote kaiyovumo kumai wavu, mote kuma soinuwava, tamam bi tinam kwa viviledi.” d 

20 Bi oloto i giuwena gado, “Tauwailovelove, tagu ḡaubogumo te niganana mba waiḡakedi matabudi e voiye kovidi.”

21 Bi Yesu oloto i kita te nuwana i vai bi i giuwena gado, “Mwali ḡemota kwa malumaluwabiye. Kwa nawa em waiguyau matabuna kwa kune kamaḡedi bi mane waiyamoyamonidi kwa vitedi, bi galewa ena waiguyau kwa vai. Kaka kwa nato kwakaiwatagu.”

22 Niga olotona ba i wai ḡonaḡona gulata, taunana aubaina Yesu ena giu i vaivaiye, ba nuwana i kuluva bi ma nuwaboyana i nawa.

23 Ḡome ena tauwaikaiwatana i kita nawedi bi i giuwedi, “I bagibagi kauwa kaka tana waiwaiguyauna Maimaituwa ena waibadamo ya sola saḡa.”

24 Tauwaikaiwatana Yesu ena giu a vaivaiye ba a tagugu.
10:24Diu edi wai sumaḡa te waiguyau, ba mataila Maimaituwa lava lisinemo i wainuwavisu bi ya kakavisuvisu. (Salamo 128, Proverb10:22) Taunana aubaina Yesu ena tauwaikaiwatana ena giu a vaivaiye ba a tagugu. Tedi ai noḡota bamoda Maimaituwa lava wai ḡuyaudi mote i mai yawasanidi, ba lava ḡesaudi kota mote i mai yawasanidi.
Bi Yesu i giuna gado, “Natunatugu, i bagibagi kauwa kaka lava Maimaituwa ena waibadamo ya sola saḡa.
25 I pilipili kauwa kaka ḡamoḡamo dididiga kamelo, siyau bwadanemo ya sola, mba mainana kota lava waiguyauna mote Maimaituwa ena waibadamo ima sola saḡa.”

26 Ḡome ena tauwaikaiwatana mai giuna a vaivaiyena ba a tatava gulata bi edi lava vaitedi ai talapilina gado, “Bamoda mai, te aiyai kaka bena ya yawasana?”

27 Yesu i kitedi bi i giuna gado, “Lava lisidimo ba mote ḡemoḡemotina te taudiḡa sai yawasanidi, bi Maimaituwa ḡemoḡemotina ya vioye. Tana lisinemo ba bai matabuna ḡemoḡemotina.”

28 Kamaina bi Pita i giuna gado, “Bi tama bainewa? Tama kaikana bai matabuna mulimaimo ke ḡosedi bi ke kaiwatam.”

29 Yesu i giuwedina gado, “Yea giugiu kauwemi, taubai ena vanuwa, ee tinatinanatuna, ee nuvunuvuna, valevaletina ee tinana bi tamana, ee natunatuna ee ena daibi ya gosedi bi tagu ya kaiwatagu, bi lava ḡesaudi lisidimo giugu visuvisuna ya giunawena, 30 tana niga laḡannemo maia dididiga otina Maimaituwa ya vite: Ena vanuwa, valevaletina, nuvunuvuna, tinatinana, natunatuna bi daibi sa wapa. Bi kota lava sa laukivigebogeboye. Bi laḡan muliḡa ya natonatona tana yawasana ilailala ya vai. 31 Lava wapewapedi mabai niganana sa wailaumatanana kaka sai laumuli, bi mabai sa wailaumulina kaka sai laumatana.”

Yesu ena peki giuna i wai faioni

(Metiu 20:17-19; Luk 18:31-33)

32 Tedi yaḡolo etaḡa a nawanawa Yelusalemmo, bi Yesu tana i dolidoli. Bi ena tauwaikaiwatana a tagugu bi lava ḡesaudi a kaikaiwatedina a naila. Yesu ena tauwaikaiwatana vaitedi a moito gebi tabudimo bi bai matabuna lisinemo sa tubuḡana ena tauwaikaiwatana i tainuwataudi.
10:32Tauwaikaiwatana a tatava banina lava tana a waidibodiboḡi. Bi lava ḡesaudi mulinaḡa a nawanawa a naila banina, a nawanawana noke Yelusalemmo bai ya tubuḡa lisinemo.
33 “Ko vaiye, niganana ta nawanawa Yelusalemmo, ḡome taukaisolu Tana Taunana Natuna kaka pilisi edi babada bi waiḡake tauwailovelove babadidi nimedimo sa sako. Tedi sa etale bi sai anine te Loum lavedi nimedimo sa sako bi tedi tana sai peki. 34 Tedi sai valavala, sa gelolo, sa kwapu bi sai peki, bi laḡan wai faioninemo tana ya kena moito.”

Diyemesi bi Diyoni edi wai baḡa

(Metiu 20:20-28)

35 Diyebedi natunatuna Diyemesi bi Diyoni a tava Yesu lisinemo bi a giuna gado, “Tauwailovelove, tama ka ḡoyeḡoyena bai kaibaḡayemna tam aubaimai kwa voiye.”

36 Yesu i waitalayedina gado, “Bai mwalina ko ḡoyeḡoyena aubaimi yea voiye?”

37 Tedi ena giu ai munena gado, “Kwai aninemai te aiyai kataiyammo ya miya bi aiyai ḡeniyammo ya miya em waibada laḡannemo.”

38 Yesu i giuwedina gado, “Temi mote ko sibe bai ko waibaḡae. Temi ḡemoḡemotina wainuwatoi leduna yea tegona mai ko tego? E yea buluna mai ko bulu?”
10:38Yesu ledu lau tegoyena bi waibulu i giuwena ba mote ledu ota bi asiwa ota, bi ena wainuwatoi bi ena peki i giu wata.
39 Tedi ena giu ai munena gado, “Tama ḡemoḡemotina.”

Kamaina bi Yesu i giuwedina gado, “Temi ḡolaḡolana yea tegona mai temi ko tego, bi peki yea pekiyena mai ko peki.” Bi Yesu i giuwedina gado,
40 “Kamaina bi tagu mote egu waibada ima kenakena te yea lauvina, te aiyai kataiyagumo bi aiyai ḡeniyagumo. Niga gabuna tedi mabai Maimaituwa i vinevinedina aubaidi i ka nonoḡi.”

41 Tauwaikaiwatana 10 mai giuna a vaivaiyena, tedi Diyemesi bi Diyoni lisidimo a medi. 42 Yesu matabudi i yogedi bi i giuwedina gado, “Kona sibe tedi mabai eteni sa wai badaedina, ba lisidimo sa wai bada teyala. 43 Temi mote maso mai ko voiye, aiyai i ḡoye te ya didigana, maso i sako yovo munaḡe bi i waitaunoya. 44 Aiyai bi doli i ḡoyena ba ya yovo te yai taunoyayababa lava ḡesaudi aubaidi.” 45 Mainana Tana Taunana Natuna i yovona mote lava aubaina sima noya, bi tana lava aubaidi ya noya, bi ena yawasana ya vite munaḡe bi lava wapawapa yai yawasanidi.”
10:45Yesu ena wainuwatoi bi ena peki gebogebo lavada eda gabu i vai, mai Aisaiya 53:8 i giugiuna.


Yesu Batimiyas matana potapotana i wai yawasani

(Luk 18:35-43)

46 Yesu ena tauwaikaiwatana vaitedi a tava Deliko malagainemo. Ḡome ena tauwaikaiwatana bi lava kumna dididiga vaitedi Deliko a gosegose bi oloto matapotapotana isana Batimiyas tana eta diyanemo i miya i waigigimana, Batimiyas tana Timiyas natuna. 47 Laḡannemo tana Nasalet Yesuna giuna i vaiye, tana binau i waitubu, “Yesu Deivida Natuna
10:47Giu ‘Deivida Natuna’ ba mote natu otina bi Deivida ena dammo i tubuḡa.
kwa launuwatoiyegu!”
48 Lava wapewapedi ḡome Batimiyas a kaipasini. “Ku miya moimoisili!” Bi tana yaḡolo kalinana dididiginemo i binabinau gado. “Deivida Natuna kwa launuwatoiyegu!” 49 Kamaina bi Yesu i vamoito bi lava i giuwedi, “Ko giuwe ya saḡa niga ḡome.” Tedi oloto matapotapotana a giuwe, “Ya binabinauwem, ma nuwa visum kumiya moito kwa nawa lisinemo.”

50 Kamaina bi tana ena kwama i ḡiḡi i pwalaḡe kamaḡe, i laupotisaḡa, bi i nato Yesu lisinemo. 51 Ḡome Yesu Batimiyas i waitalaye, “Bai kwa ḡoyeḡoyena aubaim yea voiye?” Kamaina bi oloto mata potapotana i giuwena gado, “Tauwailovelove, tagu ya ḡoyeḡoyena yai kita munaga.” 52 Yesu i giuwena gado “Kwa nawa em sumaḡa i wai yawasanim.” Maḡemota oloto i wai kita munaḡa, bi Yesu i kaiwata te etaḡa a nawa.

Copyright information for `KQF