Mark 3

Yesu Oloto Nimana Pekipekina I Wai Yawasani

(Metiu 12:9-14; Luk 6:6-11)

waiyawasi laḡannemo Yesu i munaḡa nawa bolu vanuwinemo. Bi ḡome oloto nimana pekipekina i miyamiya. Lava ḡome ḡesaudi Yesu a wai nene bainewa te maso ai wavu. Kamaina bi Yesu a wai kitawata te oloto maso i wai yawasani waiyawasi laḡannemo. Tana oloto nimana pekipekina i giuwe, “Ku moito kwa saḡa lava matedimo.” Yesu lava i wai talayedi, “Egu lava, eda waiyawasi laḡanna ena waiḡake bainewa ya giugiu? Lava ta sagu e ta kita kamaḡe, tai yawasani e ta kagebogebo?” Bi tedi a miya moimoisili. Lava i kita nawedi te nopodi ḡaiḡaidi aubaina te tana nuwana i lai medimedi, bi geḡa te i wai nuwapoya. Kamaina bi oloto i giuwena gado, “Nimam ku tuḡu.” Ḡome oloto nimana i tuḡutuḡu te i yawasana.

Ḡome Palisi mai a kitakitana, tedi pali vanuwina a gose bi a nawa Alodi ena muli lavedi lisidimo. Bi Yesu kana pota a yesi te maso ai peki.

Yesu ena tauwaikaiwatana vaitedi mba malagaina a gose bi a nawa gelemo, Galili topa diyanemo. Bi Galili lavedi kumna a kaiwatedi. Bai matabuna i voivoiyena a vaiye bi lava wapewapedi Diudiaḡa, Yelusalemḡa, Idumeya, bi Dioudan noi nevanemo, Taiya bi Sidon nopodiḡa lavedi a tava Yesu lisinemo. Lava kumna sa dubutawi aubaina te ena tauwaikaiwatana i giuwedi te waga sa kanonoḡi. Banina tana lava i waiwai yawasanidi, aubaina tedi mabai sidesidedi a wai bibibina te maso a taukoni bi a yawasana. 11 Ḡome lava aluwa gebogebodi sunesuneḡina tedi Yesu a kitakita te matanemo a nuwalikwa bi a galagalalana gado, “Tam, Maimaituwa natuna.” 12 Yesu aluwa gebogebodi i wai ḡakedi te mote aiyai sima giuwe te tana aiyai.

Yesu giugiukamaḡedi 12 i vinedi

(Metiu 10:14; Luk 6:12-16)

13 Yesu i nawa oya dabanemo bi tedi mabai i ḡoyeḡoyedina i yogedi bi a nato lisinemo. 14 Tedi 12 i vinedi bi i wai isedi, ‘giugiukamaḡedi.’* Tana i giuwedina gado, “Tagu e vinemi te temi tagu vaitegu. Tagu ya giukamaḡemi te ko nawa ko lauguguya, 15 bi waibada ko vai te aluwa gebogebodi ko kwavidi.” 16 Niga 12 i vinevinedi isedi ba

17 
  • Diyebedi natunatuna Diyemesi bi tasina Diyoni i wai isedina Boenadas, niga isana banina ba palele natunatuna.
  • 18 
  • Endulu,
  • Pilip,
  • Batolomiu,
  • Metiu, isana ḡesau Livai,
  • Tomas,
  • Diyemesi Alupias natuna,
  • Tadias,
  • Saimon tana ba Selot
    3:18ZelotIsa Zelot banina lava damna mabai tedi Loum gabemanina tauwai ḡaviyena.
  • 19  Bi Diudas Iskaliot tana taukaisolu.

    Lava a giu te bena aluwa gebogebodi Yesu a suneḡi

    (Metiu 12:22-32; Luk 11:14-23, 12:10)

    20 Yesu i munaḡa vanuwemo bi lava kumdi a tava ai ḡemotidi, taunana aubaina Yesu bi ena tauwaikaiwatana mote ḡemoḡemotina te maso a kani. 21 Laḡannemo ena vanuwa lavedi noi giuna a vaivaiyena ba a nawa auwai dolinemo, banina lava a giuna gado, “Yesu i bu'uwa.” 22 Waiḡake tauwailovelovena* mabai Yelusalemḡa a tavatavana a giu te laulaugavi edi bada taumudulele
    3:22Glik baibol i giunaBelsebul.Mba giuna banina ba taudou edi bada.
    Yesu i suneḡi te ḡailisi i vite bi aluwa gebogebodi ya kwavikwavidi.
    23 Kamaina bi Yesu i yogedi bi lautaulalamo i giuwedi, “Seitani bainewa taunaḡa ya kwavi munaḡe? 24 Bamo dobuna noponemo sa dailidi bi sai ḡasiḡasina, ba taudiḡa sa ka gebogebodi? 25 Bi kota vanuwa ḡemota nopona lavedi sa dailidi bi sai ḡasiḡasina, ba sai dabalalidi. 26 Bamoda Seitani ena dam sa dailidi bi taudiḡa sai ḡasiḡasina kaka bamo mote sima tava. 27 Aiyai mote oloto ḡaiḡailisina ena vanuwa ima lolo, te tana dolinemo ya panipani kaka ena pulapula ya legaudi. 28 Yea giugiu kauwemi te gebo matabudi bi lava kuvalidi ba Maimaituwa ya noḡoti kamaḡedi. 29 Bi bamoda aiyai Aluwa Waiyawa i kuvalina, ba Maimaituwa mote ima noḡoti kamaḡe. Banina tana gebo ilailala i voiye. 30 Yesu niga mainana i giuna, banina tedi a giugiuwena gado, “Tana aluwa gebogebona i suneḡi.”

    Yesu Ena Lava Otidi

    (Metiu 12:46-50; Luk 8:19-21)

    31 Yesu tinana bi tasitasina a tava didiyaumo bi ena giu a giukamaḡe. 32 Lava kumna a miyamiya kwaikwaivivilena a giuwena, “Ei, tinam bi tasitasim oloolotodi bi waiwaivinidi didiyaumo sa labelabem bi a ḡoyeḡoyena sa kitam.” 33 Kamaina bi Yesu i giuwedina gado, “Bamo tinaguna, bi bamo tasitasigudi?” 34 Tana lava ḡome a miyamiyana i kita nawedi bi i giu, “Tagu tinagu bi tasitasigu niga taudidi sa miyamiya. 35 Aiyai Maimaituwa ena ḡowana ya voivoiyena, ba tasigu, nuvugu bi tinagu.”

    Copyright information for `KQF