a4:12:Aisaiya 6:9-10

Mark 4

Taubayau Lautaulalana

Yesu Galili topana diyanemo wai lovelove i waitubu munaḡe. Bi lava kumna a tava a dubutawi aubaina te tana waga i poupoulena dananemo i miya saḡa. Bi lava matabudi gelemo a moito. Tana lautaulalamo kauwa wapewapedi i wai lovelovedi bi e nai lovelovemo niga mai i giuwedi, “Koi beyavaiya, taubayau i nawa pesi au launaḡasedimo. Laḡannemo pesi i laulaunaḡasedi, ḡesaudi etamo a talaḡa bi mwanua a tava te a kanidi. Bi ḡesaudi doḡa waitelitelinemo a talaḡa. Ḡome doḡa sebunemo te pesi a duga makai, banina doḡa ḡaubona. Bi laḡannemo suwala i saḡa te pesi kalakalanapudi i lalawai pokidi, banina tedi lamlamdi mote a yovo gulata. Bi pesi ḡesaudi gedala nopodimo a talatalaḡana, tedi ba a duga. Bi gedala pesi i yavanidi. Taunana aubaina mote a bani. Bi kota pesi ḡesaudi doḡa visuvisunemo a talatalaḡana ba a duga saḡa, te alau bani, ḡesaudi 30, 60 bi 100.” Yesu i giuna gado, “Temi waibeyemi te koibeyavaiya.”

Bai Aubaina Yesu Lautaulalamo I Giugiu

(Metiu 13:10-17; Luk 8:9-10)

10 Muliḡa Yesu taunaḡa i miyamiya bi ena tauwai kaiwatana 12 bi lava ḡesaudi tana lisinemo a tava bi aitalaye te lautaulala banina bai.

11 Kamaina bi Yesu tedi i giuwedina gado, “Maimaituwa ena waibadana kenakena waidavonina, temi i vitemi. Lava tabudimo miyemiyedi tedi mwali matabudi lautaulalamo ya giuwedi, 12 te bai Aisaiya i giugiuwena ya tubuḡa a 

Tedi sakitakitana bi mote simakita banavi
bi kota male savaivaiyena bi mote sima sibe.
Taunana aubaina tedi male mote edi gebogebomo sima nuwavitala te maso Maimaituwa ya noḡoti kamaḡe.

Doḡa Matabudi 4 Edi Titikuna

(Metiu 13:18-23; Luk 8:11-15)

13 Yesu tedi i wai talayedina gado, “Temi niga lautaulalana mote kosibe? Lautaulala ḡesaudi ya giuedina temi bainewa bi kosibe?” 14 Taubayau pesi i launaḡasedina ba lava Maimaituwa giuna ya giugiu nawena. 15 Bi lava ḡesaudi ba maibena pesi etamo kulukuluvidi. Niga lavedi Maimaituwa giuna sa vaivaiyena bi Seitani ya saḡa makai nopodimo te giu ya kaikaikamaḡedi. 16 Lava ḡesaudi maibena doḡa waitelitelinemo, tedi manuwa visudi giu savaivaiyena 17 bi lamlamdi geḡa aubaina mote sima moimoito didina. Laḡannemo pilipili bi laukivigebogebo sa saḡana Maimaituwa giuna aubaina, tedi maḡemota sakuluva. 18 Lava ḡesaudi maibena pesi gedala nopodimo a talatalaḡana. Tedi Bada giuna savaivaiyena, 19 bi kota niga dobuna ena yawasana mai mane ḡoyena, bi mwali ḡesaudi noḡotidi sa tava te Maimaituwa giuna sa yavayavani. Taunana aubaina tedi mote sima banibani. 20 Lava ḡesaudi mai bena pesi doḡa visuvisunemo wadiwadidi. Niga lavedi ba giu savaiye, te nopodimo sa sako bi sa kaikaiwata. Tedi votedi ḡesaudi 30, 60 bi 100.”

21 Yesu lava niga mai i giuwedi, “Bai laḡannemo lava piupiu i gabuna mote i vai te gulewa dibunemo i sako e bena dibunemo i sako nawe. Geḡa te tana piupiu ḡakima dabanemo ya sako te ya yana. 22 Mwali bai kankandavona muliḡa male ya amagai. Bi mwali bai wai kwesina male ya amagai. 23 Bamoda temi waibeyemi te koibeyavaia.”

24 Bi kota tana lava i giuwedi, “Bai ko vaivaiyena, kamaina te ko vaiye kauwe. Bamoda niga kauwina kwa komaniyena, ba Maimaituwa kaua ḡesaudi yai lovelovemi te kosibedi. Bi kota tana kaua wapewapedi ya vitemi. 25 Aiyai niga kauwidi ya vaivaiye kauwena, Maimaituwa male tedi lisidimo nuwauyauya yai lautawi. Bi mabai mote simai beyavaiya kauwa bi lisidimo ḡaubona ya kenakenana kaka sa kaikamaḡe.”

Maimaituwa Ena Waibada Ya Dididigana Titikunina

26 Bi Yesu i giuna gado, “Maimaituwa ena waibada ena lava lisidimo titikunina ba niga mai: Lava pesi ena daibimo i wadidi. 27 Dudubala bi suwala tana ya kenakena e ya miyamiya bi pesi kamaina te sa dugaduga. Bi tana mote i sibe te bai ya tubutubuḡa 28 Doḡa taunaḡa pesi ya wai dugedi bi ya wai votedi. Dolinemo sa kalanapu te lugudi sa sivudi, bi sa love te sa buso bi banidi nopodimo sa sivudi. 29 Laḡannemo pesi i tabutuna ba lava ya tava te biliukomo ya laukoiḡavuka. Banina vililubu ena laḡani i tava.”

30 Yesu i giu munaḡana gado, “Maimaituwa ena waibadana ena lava lisidimo bai ya lau koiluvae te ko sibe? E bai lautaulalana tagu yea giuwe te ko sibe? 31 Mba maibena wasiva pesina ḡaubo otina doḡamo ko wadiwadina. 32 Muliḡa mba pesina ya duga te ya didiga mote mai pesi ḡesaudi. Bi lagalagana wai yamonina damodamodimo mwanua sawasawaḡa lovolovodi sa tava te salaulau noḡi.”

33 Niga lautaulalana bi lautaulala ḡesaudi vaitedi, Yesu Maimaituwa giuna lava edi luvamo i giuwedi te maso a sibe. 34 Tana giu matabudi i giugiuwedina ba lautaulalamo i giugiuwedi, bamo mote giu bai i giu otiedi. Bi kota laḡannemo ena tauwaikaiwatana taudiḡa, tana giu bani otidi i giugiuwedi.

Yesu Yavala Bi Labama I Giu waitaudi

(Metiu 8:23-27; Luk 8:22-25)

35 Mba laḡanna ḡemotina aubiganemo, Yesu ena tauwaikaiwatana i giuwedi, “Tanawa noi nevanemo.” 36 Yesu wagamo bi ena tauwaikaiwatana tana vaitena a nawa. Bi lava kumna ḡome gelemo a gosedi. Bi tedi edi waga bi waga ḡesaudi vaitedi a nawa. 37 Tedi a nawanawa te yavala didiga i tava. Bi labama wagamo i talatalaḡa te gauba waga noponemo i waidubusaḡe, bi ḡotona te maso i wanavu. 38 Bi Yesu ḡome waga mulinemo kunuwana dabanemo i kenakena. Kamaina bi ena tauwaikaiwatana tana a lainuwesi bi a giuwe, “Tauwailovelove tam kwai nuaboyaeda e geḡa? Niga ta peki!” 39 Yesu i miya moito bi kalinana bagibaginemo yavala i giuwe, “Ku nuaḡavuka.” Bi labama i giuwe, “Ku lautautau.” Kamaina bi yavala i nuwaḡavuka bi daumola i kena 40 Yesu ena tauwaikaiwatana i giuwedina gado, “Temi bai aubaina ko nainaila? Temi ko wai sumaḡa e geḡa?”

41 Tedi a naila bi taudiḡa ai giugiuna gado, “Niga lava aiyai mai kitana? Tana yavala bi labama ya giuwedi bi kalinana sa kaikaiwata.”

Copyright information for `KQF