a8:11Diutolonomi 13:1-5; 18:18-22; Judges 6:17-22; 1 Samuel 2:34; 2 Guyau 20:8-11
b8:12Metiu 12:39; Luk 11:29

Mark 8

Yesu lava 4 tausan iwai kani bagibagidi

(Metiu 15:32-39)

Sauga ḡemota lava wapewapedi ai ḡemoti munaḡedi. Lava kediya geḡa aubaina te Yesu ena tauwaikaiwatana i yogedi a tava lisinemo bi i giuwedi, “Niga lavedi vaitedi ke miya te suwala faiona a kovi bi kani geḡa aubaina te e launuwatoiyedi. Bamoda ma kani pekidi yea giukamaḡedi bi sa nawa edi vanuwemo, mba etamo sa laugulibubu. Bi kota ḡesaudi manekaḡa a tava.” Bi ena tauwaikaiwatana ai talaye, “Niga dobu daliḡaḡa bamo kani ta vai bi tai kanidi?” Bi Yesu i wai talayedi, “Temi lisimimo buledi visa sa kenakena?” Bi tedi a giuwena ḡado, “Wapedi 7.”

Kamaina bi Yesu lava kumdi i giuwedi doḡamo a miya. Bi tana buledi 7 i tanodi bi Maimaituwa i wai ebone, bi i kividi bi ena tauwaikaiwatana i vitedi, te a soiye. Bi iyana visa keikeilikidi vaitedi a natomedi Yesu lisinemo bi tana Maimaituwa i wai ebone bi ena tauwaikaiwatana i giuwedi te a soiye. Lava a kani te a kani nonoḡa. Bi ena tauwaikaiwatana kani pusepuselidi a laitupa bi poa 7 ai wanavudi. Olooloto wapedi maso ba 4 tausan ḡome, bi i giukamaḡedi te a nawa.

10 Bi kota tana ena tauwaikaiwatana vaitedi wagamo a gelu bi a nawana Damanutamo.

Palisi mataila ai baḡae

(Metiu 15:39-16:4)

11 Ḡome Palisi ḡesaudi Yesu laulubuna ḡaḡaluna a tava, bi ai tala vitavitale te Maimaituwa ena mataila maso i wai lovedi. a  12 Yesu yawasina i bunanai kamaḡe bi i giuna gado, “Temi niga kimtana, bai aubaina ko ḡoyeḡoye te mataila ko kita? Giu kauwa, yea giugiuwemi te mote mataila yea ma voiye koma kita.” b  13 Yesu ena tauwaikaiwatana vaitedi Palisi a gosedi te wagamo a gelu bi a nawa noi nevanemo.

Yesu ena tauwaikaiwatana i giuwedi te Palisi bi Alodi edi wailovelove kaikaiyovudi sa kita kauwedi.

14 Ena tauwaikaiwatana nuwedi i kaulea te mote buledi a tano. Bi ḡemota ota wagamo ai gelu. 15 Yesu i giuvavasaḡedina gado, “Koi kita kauwa Palisi bi Alodi edi mu'aa.”
8:15Diu edi noḡotemo mu'aa ba lautaulala. Mai bena palawa ya voiye te ya lusa. Mai wailovelove kaikaiyovudi bi gebogebo lava nopodimo sa didiga. Niga ḡome ba Yesu mu'aa i lauluvaena ba Palisi bi Alodi edi miyamiya i giuwata.
16 Tedi taudiḡa ai talapilina gado, “Tada mote buledi ta vai aubaina te mai i giu ee?” 17 Yesu edi noḡota i sibe bi i giuwedina gado, “Bai aubaina ko giugiu te mote buledi ko vai? Temi mote ko kita, e mote ko sibe? Temi yaḡolo ko wai nuanaina? 18 Temi waimatemi bi mote komai kita kauwa? Waibeyemi bi mote komai beyavaiya kauwa? Mote ko noḡoti? 19 Tagu buledi 5 e kividi bi lava 5 tausan a kani bi kani puselidi kona laitupa bi poa visa konai wanavudi?”

Tedi a giuna gado, “Poa 12.”
20 “Bi taugu buledi 7 e kividi bi lava 4 tausan a kani bi kani puselidi kona laitupa bi poa visa konai wanavudi?”

Tedi a giuna gado, “Poa 7.”
21 Bi i giuwedina gado, “Temi yaḡolo mote ko sibe?”

Yesu Betsaidamo oloto matapotapotana i wai yawasani

22 Tedi Betsaida malagainemo a tava, bi ḡome lava edi tau matapotapotana ai doli tavaite bi Yesu ai baḡa vavasaḡe te maso matana i taukoni. 23 Bi tana oloto nimanemo i kaididi bi i wai doli te malagai a potiyovo kamaḡe. Ḡome Yesu oloto matana i gelolo bi nimana matanemo i sako bi i wai talayena gado, “Bai kwa kitakita e geḡa?”

24 Tana matana i taulageti bi i giuna gado, “Tagu lava e kitedi sa nawanawa kitedi mai kai.”

25 Yesu nimana i sako munaḡe oloto matanemo. Maḡemota oloto matana i yana i visuvisu bi i wai kita kauwa.

26 Yesu oloto i giuwena gado, “Kwa nawa em vanuwemo, mote kuma nawa malagaimo.”

Pita Yesu i ka maḡati

(Metiu 16:13-16; Luk 9:18-20)

27 Yesu bi ena tauwaikaiwatana a nawa Seselia Pilipi malagaidi diyediḡa. Tedi a nawanawa etamo bi Yesu i wai talayedina gado, “Lava sa giugiu te tagu aiyai?”

28 Tedi a giuna gado, “Ḡesaudi sa giugiu te tam Diyoni Taukabulu, ḡesaudi Elaidiya bi ḡesaudi taugiuwatana ḡemota.”

29 Bi i wai tala munaḡedina gado, “Temi bainewa ko noḡonoḡoti, te tagu aiyai?”

Bi Pita i giuna gado, “Tam ba Maimaituwa ena Vinevine!”
30 Yesu i giu vavasaḡedi te mote sima giu te tana aiyai.

Yesu ena peki bi ena kenamoito i giuwata

(Metiu 16:21-23; Luk 9:21)

31 Tana wai lovelovedi i waitubu bi i giuwedina gado, “Tana Taunana Natuna male kauwa wapewapedi yai nuwatoiyedi bi babada laukaidi, Pilisi edi babada bi waiḡake tauwailovelovena sa miya tautaulie bi, tana male sai peki, bi laḡani wai faioninemo ya kenamoito munaḡa.” 32 Yesu mba kauwidi i giu kaukauwedi, taunana aubaina Pita i wai doli nawe tabudimo bi i kaipasini.

33 Yesu i tauvitale bi ena tauwaikaiwatana i kitedi bi Pita lisinemo i kaipasina: “Seitani! Ku taulia muligumo. Mba noḡotidi mote Maimaituwa lisinaḡa sima yovoyovo bi lava edi noḡota mai.”

Yesu kaiwatana banina

(Metiu 16:24-28; Luk 9:23-27)

34 Yesu lava kumna bi ena tauwaikaiwatana i yogedi a nato lisinemo bi i giuwedina gado, “Bamoda aiyai muliguḡa ya natona ba ena ḡowana matabudi sa kena bi ena kolosi ya kailageti bi ya kaiwatagu.”
8:34Niga giuna kolosi kailagetina ba lautaulala. Mba giuna banina ba Yesu taukaiwatana laukivigebogebo bi wainuatoi nopodiḡa sa nawana, banina Yesu sa kaikaiwata. Tana mote ima giugiu te taukaiwatana sa pekina mai tana kolosimo i pekipekina.
35 Lava aiyai bi ena yawasana i nuwamunaḡena, ba muliḡa ya kulayakasi. Bi aiyai ena yawasana ya nuwakamaḡe tagu aubaigu bi giu visuvisuna aubaina ba muliḡa ya vai munaḡe. 36 Bamoda lava niga dobuna ena ḡowana matabuna i vai kovi bi ena yawasana i ka gebogebo, mba kauwidi damodimo bai visuna ya tubuḡa? 37 Bi kota bai mwalina ya vite bi ena yawasana ya vai munaḡe? Geḡa geḡa ota. 38 Lava niganana laḡannemo sa miyamiyana ba Maimaituwa giuna sa laulau kasaḡaiḡaiye bi gebo sa voivoiyena. Tedi ba mai lava wai matawapewapedi. Bi bamo te tam tagu kwai tunimayaḡegu bi giugu wailovelovena kwai tunimayaḡena, ba Tana Taunana Natuna ena nato munaḡa sauginemo yai tunimayaḡem. Mba laḡannemo tana tamana namalinemo ya natona aneya waiyawa vaitedi.

Copyright information for `KQF