1 Timothy 4

A kum torotoro na tene ususer

A Tokodos na Nion i watung puaso i lena, una kum tintinip na bung, lako taro det in nan gisen gusun a lingmulus na nurnur, ma det in mur a kum nion ra det ser torotoro, ma det in mur a kum etowo anun a kum laulau na nion. A kum etowo ri i wan tagitiro tan a kum tene torotoro, a taro ra ka det tama lele i mo a tokodos na petutna, uni a tokodos na ninunuk una nuknukindet i sa mat. A ngas na taro ri, det turbat a nolin ma det turbat a taro sur gong det wan lako kum ngas na utna na inangon. A kum utna na inangon ra, o God i ukis tari sur din nani, ra a taro na nurnur ra det tasman a lingmulus ino, det in watung wakak torom o God uni ma det in nani. Uni a kum utna rop ra o God i ukis tar det, det wakak, ra gong dat ngaran ru det. Dat in watung wakak torom o God uni, ra dat in nani. Uni a wasiso anun o God ma a niaring der uwakak a utna na inangon sur in wakak umatan o God.

A wakak na tultul anun a Karisito Iesu

Ra un ususer a kum tistisim nama kum etowo ri, ui a wakak na tultul anun a Karisito Iesu. Una pinapam ri in talapor lena u labo pat una nurnur mulus, ma a wakak na etowo ra u muri. Un nan gisen gusun a kum saksak utna ororos, ma a wasiso ra ke warut ui una nilaun torom o God. Un ulason ui sur a magiram in wakak umatan o God. Ra dat ulason a pinindat una wap, i warut a pinindat. Ikut ra dat ulason dat sur a magirandat in wakak umatan o God, i warut dat una kum utna rop. Ausur una nilaun kut ri, i warut kai una nilaun kura numur. A wasiso ri a watungi, i lingmulus sakit, i wakak sur dat in nurnur uni ma dat in muri. 10 I mo ri dat papam dekdek, uni dat kis langlang nama nurnur sur o God, i ra a lalaun ino ma a Tene Ulaun anun a taro rop, ra det nurnur uni.

11 Un inanos det ma un ususer det una kum utna ri. 12 Gong u madek tar taio sur in pas tataun tar ui, uni u barman utmakai. Una num a wasiso, anum a petutna, anum a marmaris, anum a nurnur ma anum a tokodos na nilaun, un elar nama wakak na malalar, sur a kum tene nurnur det in pam murmuri. 13 Un dekdek nama luk a Buk Tabu torom a kum tene nurnur, ma nama warawai ma a etowo torom det, tuk an nanpat. 14 Gong u madek ru a etabor na Nion, ra di pitar tari tam, una du bung ra a kum poropet det wasiso na poropet, ma a kum mugumugu det ubek tar a kum lamandet sapat netes un ui.

15 Un ulason ui una kum pinapam ri. Un pitar tar anum a nilaun uni, sur a taro rop det in tama ui lena u lubung una num a nilaun torom o God. 16 Un tumarong anum a nilaun ma anum a etowo. Un tur dekdek un der, uni, ra un pami lenra, un ulaun pas ui ut, ma det kai ra det longoro ui.

Copyright information for `KQW