bKisim Bek 3:6
cLo 6:5
dWok Pris 19:18
eBuk Song 110:1

Matthew 22

A wasiso elelar una lukaro na unolin

(Lk 14:15-24)

O Iesu i wasiso melet torom det nama wasiso elelar lenri, “A matanitu tagisapat una langit i elar nama king ra i sa waninar tar a lukaro na unolin sur o nutunu, a musano. Ra i tulu ru anun a kum tultul torom det, ra di sa inanos mugu tar det, sur det in ben pas det sur a lukaro. Ikut det putut rop kut. I tulu ru i bulung anun a ramano kum tultul gisen nama wasiso lena, ‘Mot in inanos det ra di sa inanos mugu tar det lena, “A sa waninar rop tar a utna na inangon. A sa um doko tar a kum bulumakau ma a kum matok na butbut na bulumakau, a kum utna i sa waninar rop. Mot in nan urin una lukaro na unolin.” ’

“Ikut ka det tarom, det wan gisgisen kut. Ara i wan sur ana kinobot, ara kai sur anun a rumu na siuru. Ma ara taro kai ra di wan sur det, det pam ukai pasi kut a kum tultul, ma det banlaulau det ma det um doko det. A king ra, in balano i sungun doko, i tulu ru anun a taro na inaim, ra det um doko ru a kum tene umum doko taro ra, ma det tun ru anundet a tamon.

“I watungi melet tan anun a kum tultul lena, ‘Di sa waninar tar a lukaro na unolin, ikut det ra di sa inanos mugu tar det, ka det tokodos sur det in kis una lukaro. Mot nan una kum kisapi ma osi ra mot in etoromi, mot in inanosi lena in nan urin sur a lukaro.’ 10 Ra a kum tultul det wan una kum kisapi, ma det ben tomo det rop ra det etorom det, a kum sakino taro ma a kum wakak na taro kai, ma a lukaro na unolin i bukus nam det.

11 “Ra a king i ruk sur in tama a taro, i tama torom pas ara musano ra ke emar nam tin namalu na lukaro na unolin. 12 Ma i tingi lena, ‘Le, u ruk lai taru urin? Uni ka num tin namalu na lukaro na unolin.’ A musano ra ke balu i. 13 Ra a king i watungi tan anun a kum tultul lena, ‘Mot in ker pas aru kikino ma aru lamano ma mot in woro pirso ru i unago utamon una dumirum. Tiro iai di tangtangis ma di ungingit lokondi iai.’

14 “Di sa kabo pas a susut, ikut di pilok pas a pak na taro mukut.”

A iting una takis

(Mk 12:13-17; Lk 20:20-26)

15 Numur a kum Parisi det wan tomo taru, ra det epak pas lena det in lar o Iesu sur tu wasiso anunu, ra det in takuni nami. 16 Det tulu ru anundet a kum nat na ususer tomo nama kum paspasan o Erod torom o Iesu, ma det watungi lena, “Tene Ususer, met tasmani lena ui a tokodos na musano, ma u ususer a taro una kisapi anun o God nama lingmulus. Ko nuknuk bing un asau ra a taro det watungi un ui, uni a magiram i takai kut torom a taro rop. 17 Un inanos met, asau a nuknukim? I tokodos sur din pitar a takis torom a Sisa
(22:17) A Sisa i a labino mugumugu una gapman Rom, ma a taro Israel kai det kis tuntudu una nun a warkurai.
o awu?”

18 Ikut, o Iesu i tasmani lena, a nuknukindet i laulau, ra i watungi tandet lena, “Mot a kum tene torotoro, ilai ra mot nemi sur mot in lar iau? 19 Mot in ese iau un tu mani na takis.” Ra det pitar tar a mani tano. 20 Ma i ting det lena, “In masarin osi ri, ma a tumtumus ri uni anun osi?” 21 Det balu i lena, “Anun a Sisa.” Ra i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.” 22 Ra det longoro i, det kisin doko ma det wan gusuni.

A iting una nilaun melet gusun a minat

(Mk 12:18-27; Lk 20:27-40)

23 Una bung ut ra a kum Sadusi, ra det ser ipul kut lena katu nilaun melet gusun a minat, det wan torom o Iesu, ma det tingi lena, 24 “Tene Ususer, o Moses i watungi lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino ra i sa mat. 25 Ara kabo tisino a wonomawit na musano det, det kis epotor tamet. A mugano i nolin, ra i mat pas gusun anun a ino, ma katu nutunder. Ra a murmur tano bulung i nolin nama ino ra, ma i bulung i mat kut gusuni. Numur a mantul na tisino bulung. Ra i lenra torom a wonomawit, det rop det nolin nami, ikut katu nutun tu pasandet. 27 Ra numur a ino bulung i mat.

28 “Una nilaun melet gusun a minat, a ino ra, anun osi na pasandet mo? Uni det rop det sa nolin pas nami.”

29 O Iesu i balu det lena, “Mot raro doko, uni ka mot tasman a Buk Tabu ma a dekdekin o God kai. 30 Una nilaun melet gusun a minat, ka det in nolin melet mo, det in elar mukut nama kum ensel sapat una langit. 31 Ra mot ipul lena a kum minat ka det in laun melet gusun a minat, pepetlai, ka mot luki utmakai a wasiso ra o God i sa watung tari tamot? I watungi lena, 32 ‘Iau a God anun o Abaram, a God anun o Aisak ma a God anun o Jekop.’ b 

O God ausur a God anun a kum minat, i a God anundet ra det laun.”
33 Ra a kunur na taro det longoro i, det kisin doko una nun a ngas na etowo.

A warkurai ra i labo sakit

(Mk 12:28-34; Lk 10:25-28)

34 A kum Parisi det longoro i lena, o Iesu i sa duku sot pas a kum Sadusi, ra det wan tomo toromi. 35 Ma ara pasandet, a tene mananos una Warkurai, i lari nama iting lena, 36 “Tene Ususer, asi na warkurai ra i labo sakit tandet rop?” 37 Ma i balu i lena, “‘Un nem a Labino anum a God nam in balam rop, a niom rop, ma a nuknukim rop.’ c 

38 A warkurai ri i labo sakit tandet rop, ma i a mugano warkurai. 39 Ma iri i a manru na warkurai, ra i ling na elar nami, ‘Un nem a pasam elar nami, ra u nem ui ut.’ d 

40 Aru warkurai ri, der a kimkibin a kum wasiso na Warkurai rop anun o Moses ma a kum etowo anun a kum poropet.”

A Karisito i a Labino anun o Dewid

(Mk 12:35-37; Lk 20:41-44)

41 Ra a kum Parisi det kis tomo, o Iesu i ting det lena, 42 “Asau ra mot nuki una Karisito? I a nutun osi?” Det balu i lena, “A nutun o Dewid.” 43 O Iesu i watungi tandet lena, “Ra in lenra, ilai ra a Tokodos na Nion i mugu o Dewid ra i watung a Karisito lena ‘anung a Labino’? Uni o Dewid i watungi lena,

44 ‘A Labino i watungi torom anung a Labino,
“Un kis una papor sot na lamang,
tuk ra an turus pas anum a kum ebar
sur det in kis utuntudu ina num a warkurai.” ’ e 
45 O Dewid i watung a Karisito lena i anun a Labino. Ra i lenra, der tamano pepetlai?” 46 Ma kataio i nuk pas tu wasiso melet sur in balu i nami. Turpasi una bung ra, kataio melet mo i wan toromi nam tu iting, uni det ngara.

Copyright information for `KQW