aLo 8:3
bBuk Song 91:11-12
cLo 6:16
dLo 6:13
eAis 9:1-2

Matthew 4

O Satan i lar o Iesu

(Mk 1:12-13; Lk 4:1-13)

Numur a Tokodos na Nion i mugu o Iesu usa una nubual kalako taro uni sur o Satan in lari. Ra i sa wewel pas a wat na noino bung na mirum ma a wat na noino bung na waspi, i murak. Ra a tene ululam i wanpat toromi, ma i watungi tano lena, “Ra ui a Nutun o God, un inanos a kum watat ri sur det in nanpat a beret.” O Iesu i balu i lena, “Di sa tumus tari una Buk Tabu lena, ‘A taro ka det ser laun nama utna na inangon kut, det ser laun nama kum wasiso rop ra i pirso gusun a wan o God.’” a 

Numur o Satan i ben pasi usapat o Jerusalem, a tamon anun o God, ra i utur tari sapat netes sakit una rumu na etabor. Ma i watungi tano lena, “Ra ui a Nutun o God, un sirok pirso, uni di sa tumus tari una Buk Tabu lena,

‘In tulu ru anun a kum ensel sur det in tamtamabat ui.
Det in pam pas ui nama kum lamandet,
sur gong u tuka a kikim un tu wat.’” b 
O Iesu i balu i lena, “Di sa tumus tari kai una Buk Tabu lena, ‘Gong u lar a Labino anum a God.’” c 

O Satan i ben melet pasi usapat netes una labino tangai, ra i ese tar a kum matanitu rop una rakrakon bual tomo nama kum minamar indet rop kai tano. Ra i watungi tano lena, “ Ra un kis butkeke ma un lotu torom iau, a kum utna rop ri an pitar tari tam.” 10 O Iesu i watungi tano lena, “Satan, un nan gisen, uni di sa tumus tari una Buk Tabu lena, ‘Un lotu torom a Labino anum a God, ma un tarom kut toromi.’” d 

11 Numur o Satan i wan pas gusuni, ra a kum ensel det wan toromi, ma det waruti.

O Iesu i turpas anun a pinapam na warawai una papor Galili

(Mk 1:14-15; Lk 4:14-15)

12 O Iesu i longoro i lena, di sa uruk tar o Jon una karabus, ra i milet melet utong una papor Galili. 13 Ra i wan tagitong o Nasaret, i kis tiro o Kapernaum, a tamon ra i kis una usalin nisan a du tasi Galili, una piso anun a kabotaro Sebulon ma a kabotaro Naptali, 14 sur in pam sot pas a wasiso anun o God ra o Aisaia a poropet i sa wasiso mugu taru uni lena,

15 “A piso anun a kabotaro Sebulon ma a piso anun a kabotaro Naptali,
milau a kisapi ra i wan unago utasi, una papor danim Jodan utong,
der kis una papor Galili, ra a taro ra ausur a taro Juda det kis iai.
16 A taro ra det kis una dumirum
det sa tama a labino talapor,
ma det ra a dumirum na minat i pulus bat det,
a talapor i sa wanpat torom det.” e 
17 Turpasi una kilalo ra, o Iesu i warawai lena, “Mot in nukpukus, uni a matanitu tagisapat una langit i sa milau.”

O Iesu i kabo pas a wat na mugano nat na ususer

(Mk 1:16-20; Lk 5:1-11)

18 Ara bung o Iesu i usal una usalin ina du tasi Galili, ra i tama pas o Saimon, di watungi kai nam o Pita, ma a tisino o Endru. Der woro a bene sa utasi, uni der aru tene woro bene. 19 I watungi tander lena, “Mur in mur iau, sur an ususer mur sur mur aru tene ben taro.” 20 Uniutra, der katutur pas gusun anunder a kum bene, ma der muri.

21 Ra i wan tagitiro, i tama pas o Jems ma o Jon dersino, aru nutnutun o Sebedi. Detul tamano kis taru una pot ma detul mabon anundetul a kum bene. Ra o Iesu i kabo der. 22 Uniutra, der katutur pas ma der wan gusun a pot ma a tamander, ra der mur o Iesu.

O Iesu i ulangolango a kum misait

(Lk 6:17-19)

23 O Iesu i wan tuptupukus una papor Galili rop, ma i ususer a taro una nundet a kum rumu na lotu. I warawai nama Wakak na Wasiso una matanitu anun o God. Ma i ulangolango pas a taro gusun a kum wur ngas na misait. 24 Ma a wasiso un o Iesu i wan sarara una papor Siria rop. Ra det ben rop pas a taro ra a kum wur ngas na misait i banlaulau det, a taro ra a dekdek na ngunungut i banlaulau det, ma det ra a kum laulau na nion kura un det, det kai ra det ser mat lalang ma det ra a pinpinindet i mat. Ra o Iesu i ulangolango pas det rop. 25 Ma a labino kunur na taro taginin una papor Galili ma tagitiro una papor Dekapolis, ma tagisapat o Jerusalem, ma tagun a papor Judia ma tagitong una ara papor danim Jodan det mur o Iesu.

Copyright information for `KQW