1 Chronicles 16

Ma dia ga kap ra bok na kunubu kai God, ma dia ga vung ia ta kana pakana ta ra bala na pal na mal nina David i ga vatut ia ure; ma dia ga tul tar ra umana tinabar di tuntun tar ia, ma ra umana tinabar na varmaram, ta ra luaina mata i God. Ma ba David i ga tar pait vapar ra umana tinabar di tuntun tar ia ma ra umana tinabar na varmaram, i ga tata vadoane ra tarai ta ra iang i ra Luluai. Ma i ga tibe ra nian pire ra tarai ma ra vaden Israel, ma i ga tul tar ia ta diat tikatikai, ra pakana gem, ra pakana kirip, ma ra kura vuai na vain di ga vuare.

Ma i ga tibe ta umana ta diat ra tarai Levi pi diat a kudakudar ta ra luaina mata i ra bok na kunubu kai ra Luluai, ma upi diat a nuk vatikene pa ra pite varpa tadav ra Luluai ra God kai Israel: Asap ra lualua ta diat, namur Sekaria, Ieiel, Semiramot, Iekiel, Matitia, Eliab, Benaia, Obed-Edom, ma Ieiel; ma dia ga ubu ra umana pagol ma ra umana ngap, ma Asap i ga lue diat ma ra umana tobo nina dia taratarenge muka; ma Benaia ma Iakasiel, a ura tena tinabar, dir ga kudakudar vatikai ta ra luaina mata i ra bok na kunubu kai God ma ra tavur.

A kakailai na pite varpa kai David

(Kak 105:1-15; 96:1-13; 106:1,47-48)

Ma ta nam ra bung David i ga tibe Asap ma ra umana turana ure ra pite varpa tadav ra Luluai.

Avat a tul tar ra pite varpa tadav ra Luluai; avat a kail upi ra iangina;
Avat a vaarike kana lavur papalum pire ra tarai.
Avat a kakailai tadav ia, avat a kaile ra kakailai na pite varpa tadav ia;
Avat a tata ure kana lavur enana papalum.
10 Avat a langlang ta ra lia na iangina;
Boina ba na gugu ra bala i diat dia tikan upi ra Luluai.
11 Avat a tikatikan upi ra Luluai ma upi ra dekdekina;
Avat a vala tikan upi ra matana.
12 Avat a nuk pa ra lavur enana papalum i ga pait ia,
Kana papalum pa padapada varvo, ma ra lavur varkurai dia arikai ta ra ngiene,
13 Avat ra umana bul mur tai Israel kana tultul,
Avat ra umana natu i Iakob, kana umana viviliai.
14 Ia iat ra Luluai kada God;
Kana umana varkurai dia kor ta ra rakarakan a gunagunan par.
15 Avat a nuk vatikene pa kana kunubu,
Ra tinata nina i ga tul tar ia ta diat ra arip na marmar na taun tarai;
16 A kunubu nina dir ga pait ia ma Abaraam,
Ma kana vavalima pire Isak;
17 Ma nina i ga vadekdek pa ia pire Iakob upi na da ra varkurai,
Ma pire Israel upi ra kunubu pa na mutu;
18 Ba i ga biti: Ina tul tar ra gunan Kanaan tam,
A gunan ba avat a kale pa ia;
19 Ba pa i ga peal boko kavava tarai,
Maia pa, a paupau tuna avat, ma ava ga ki na vaira ka tana.

20 Ma dia ga tenten vurvurbit, ma dia ga vana kan tika na vuna tarai upi ta ra tikai,
Kan tika na vuna gunan upi ta ra tika na vuna tarai;
21 Pa i ga tul tar ta tikai ba na vakaina diat;
Maia pa, i ga pit ra umana king ure diat;
22 Ma i ga biti: Koko avat a bili diat nina iau ga ku diat,
Ma koko avat a vakaina kaugu umana propet.

23 Avat par ta ra rakarakan a gunagunan avat a kakailai tadav ra Luluai;
Avat a vaarike kana valavalaun a bungbung par.
24 Avat a varvai ure kana minamar pire ra umana Tematana,
Ma ure kana lavur enana papalum pire ra lavur vuna tarai par.

25 Tago ra Luluai i ngala, ma i kat ba da manga pite pa ia,
I topa ia ba da ru ia, ma ra umana god pata.
26 Tago ra lavur god kai ra tarai par, a umana magit vakuku diat;
Ma ga ra Luluai i ga pait ra bala na bakut.
27 A variru ma ra minamar dir tur ta ra luaina matana,
A dekdek ma ra gugu dir ki ta kana pal i gomgom.
28 Avat a lavur apik na tarai,
Avat a tul tar ra minamar ma ra dekdek tai ra Luluai.
29 Avat a tul tar ra minamar tai ra Luluai ba na topa ra iangina;
Avat a kap ra tinabar, ma avat a pot ta ra luaina matana.
Avat a lotu tadav ra Luluai ma ra gomgom na minong.
30 Avat par ta ra rakarakan a gunagunan, avat a dadadar ta ra luaina matana;
I tar vaki bulu ra rakarakan a gunagunan, ma pa na takari.
31 Boina ba ra bala na bakut na gugu, ma ra rakarakan a gunagunan na ga;
Boina ba diat a biti livuan ta ra lavur Tematana: A Luluai i ki na king.
32 Boina ba ra ta na roro, ma ra lavur mangana i kor tana;
Boina ba ra pupui na kukula ma ra gugu, ma ra lavur magit dia ki tana;
33 Kari a lamlavur davai ta ra lokalokor diat a kakailai na gugu ta ra luaina mata i ra Luluai,
Tago i vut upi na kure ra rakarakan a gunagunan.
34 Avat a pite pa ra Luluai, tago ia ra tena varmari;
Tago kana varmari i tur tukum.
35 Avat a biti: Ea, u ra God ure kaveve valavalaun, una valaun avet,
Ma una varurue avet, ma una valaun avet kan ra umana Tematana,
Upi avet a pite pa ra lia na iangim,
Ma upi avet a gugu mat ma ra varmananai piram.
36 Da pite pa ra Luluai ra God kai Israel,
Vatikai ma pa na mutu.

Ma ra tarai par dia ga biti, Amen, ma dia ga pite pa ra Luluai.

Di tibe ra tarai Levi ure ra bok na kunubu

37 Ma David i ga nur tar Asap ma ra umana turana pi diat a kudakudar ta ra luaina mata i ra bok na kunubu kai ra Luluai ta ra lavur bungbung par da da mainge diat, 38 varurung ma Obed-Edom ma ra laptikai na vinun ma lavutul na tura i diat; Obed-Edom natu i Iedutun, ma Kosa, di ga tibe dir pi dir a ura tena varbalaurai na matakilalat.

39 Ma di ga vaki Sadok ra tena tinabar ma ra umana turana, a umana tena tinabar, ta ra luaina mata i ra Pal kai ra Luluai ta ra tavul a lotu Gibeon, 40 upi diat a tul tar ra tinabar di tuntun tar ia tadav ra Luluai ta ra lavur bungbung na malana ma ra lavur bungbung na ravian, ta ra ul a uguugu na vartabar ure ra tinabar di tuntun tar ia, da di ga tumu ia ta ra tinata na varkurai kai ra Luluai, nina i ga vartuluai ure pire Israel. 41 Ma Eman ma Iedutun, ma diat nina di ga pilak pa diat ma di ga vatang ra iang i diat tikatikai, dia ga varagur ma Sadok upi diat a tul tar ra pite varpa tadav ra Luluai, tago kana varmari i tur tukum; 42 ma Iedutun ma Eman dir ga vatur ra umana tavur, ma ra umana tobo, ma ra umana enana magit ure ra kakailai kai God, pi Ir a tur maravut ra umana tena kakailai me; ra umana natu i Iedutun di ga tibe diat pi diat a balaure ra mataniolo.

43 Ma ra tarai par dia ga vana, tikatikai ta ra kubana iat; ma David i ga lilikun pi na tata vadoane diat ta ra kubana.

Copyright information for `KSD